മഹാരാഷ്ട്രയില്‍ കനത്ത മഴയില്‍ മുംബൈ-ഗോവ ഹൈവേ കടന്നുപോകുന്ന പാലം തകര്‍ന്നുണ്ടായ ദുരന്തത്തില്‍ കാണാതായ രണ്ടു പേരുടെ മൃതദേഹം കണ്ടെത്തി. 20 പേര്‍ക്കായി തെരച്ചില്‍ ഊര്‍ജിതമായി നടക്കുകയാണ്. ഇന്നലെ രാത്രിയാണ് പാലം തകര്‍ന്നുവീണത്. രണ്ടു ബസുകള്‍ അടക്കം നിരവധി വാഹനങ്ങള്‍ ഒഴുക്കില്‍പെട്ടതായാണ് പ്രാഥമിക വിവരം.

എന്നാല്‍ നാല്പതോളം പേര്‍ ഒഴുക്കില്‍പെട്ടിട്ടുണ്ടെന്നാണ് അനൗദ്യോഗിക വിവരം. റയ്ഗഡ് ജില്ലയിലെ മഹദില്‍ സവിത്രി നദിക്കു കുറുകേയുള്ള പാലം ചൊവ്വാഴ്ച രാത്രി 11.30നാണ് തകര്‍ന്നുവീണത്. ബ്രിട്ടീഷ് ഭരണകാലത്തുള്ള പാലം കാലപ്പഴക്കത്തെ തുടര്‍ന്ന് അപകടാവസ്ഥയിലായിരുന്നു. മുംബൈയും ഗോവയും തമ്മില്‍ ബന്ധിപ്പിക്കുന്ന പാലത്തിന്റെ അമ്പത് അടിയോളം ഭാഗമാണ് അടര്‍ന്നുവീണത്.

മഹാരാഷ്ട്ര സര്‍ക്കാരിന്റെ രണ്ട് ബസുകളും നാല് കാറുകളും നദിയില്‍ പതിച്ചതായാണ് പ്രാഥമിക വിവരമെന്ന് കേന്ദ്ര ആഭ്യന്തരമന്ത്രി രാജ്‌നാഥ് സിംഗ് പാര്‍ലമെന്റില്‍ അറിയിച്ചു. 11 വീതം യാത്രക്കാരുമായി മുംബൈയില്‍ നിന്ന് പുറപ്പെട്ട രണ്ട ബസുകള്‍ ലക്ഷ്യസ്ഥാനത്ത് ഇതുവരെ എത്തിച്ചേര്‍ന്നിട്ടില്ല. ഇവ നദിയില്‍ വീണതായാണ് കരുതുന്നത്.

രക്ഷാപ്രവര്‍ത്തനത്തിന് ദേശീയ ദുരന്ത നിവാരണ സേനയും സജീവമായി സ്ഥലത്തുണ്ട്. 80 ഓളം രക്ഷാപ്രവര്‍ത്തകരും മുങ്ങല്‍ വിദഗ്‌രും എത്തിയിട്ടുണ്ട്. രണ്ട് എയര്‍ക്രാഫ്ടുകളും ഒരു ചേതക് ഹെലികോപ്ടറും നിരീക്ഷണം നടത്തിവരികയാണ്. പ്രധാനമന്ത്രി നരേന്ദ്ര മോഡി മഹാരാഷ്ട്ര മുഖ്യമന്ത്രി ഫഡ്‌നവീസിനെ വിളിച്ച് എല്ലാ സഹായവും വാഗ്ദാനം ചെയ്തു. കഴിഞ്ഞ അഞ്ചു ദിവസമായി കൊങ്കണ്‍ മേഖലയിലും മഹാരാഷ്ട്രയുടെ വടക്കുപടിഞ്ഞാറന്‍ മേഖലയിലും കനത്ത മഴയാണ് പെയ്യുന്നത്.