ജി.എസ്.ടി ബില്ലിന് രാജ്യസഭയുടെ അംഗീകാരം
രാജ്യത്തെ നികുതി ഘടനയില് സമൂലമാറ്റമുണ്ടാക്കുന്ന ചരക്കുസേവന നികുതി (ജി.എസ്.ടി) ബില് രാജ്യസഭ പാസാക്കി. അംഗങ്ങളുടെ വിശദമായ ചര്ച്ചക്കും ധനമന്ത്രി അരുണ് ജെയ്റ്റ്ലിയുടെ മറുപടി പ്രസംഗത്തിന് ശേഷം നടന്ന വോട്ടെടുപ്പില് ഭേദഗതികളെ കോണ്ഗ്രസ് പിന്തുണച്ചു. സര്ക്കാര് കൊണ്ടുവന്ന എല്ലാ ഭേദഗതികളും പാസായി.
അതേസമയം, എ.ഐ.എ.ഡി.എം.കെയുടെ 13 അംഗങ്ങള് സഭാ നടപടികള് ബഹിഷ്കരിച്ച് ഇറങ്ങിപ്പോയി. കഴിഞ്ഞ വര്ഷം ലോക്സഭ പാസാക്കിയ ബില്ലില് ഭേദഗതികള് വരുത്തിയ ബില്ലാണ് എന്.ഡി.എ സര്ക്കാര് രാജ്യസഭയില് വെച്ചത്.
ഏറ്റവും നവീനമായ നികുതി പരിഷ്കരണമാണ് ഇതെന്ന് ബില് രാജ്യസഭയുടെ മേശപ്പുറത്തു വെച്ച് ധനകാര്യ മന്ത്രി അരുണ് ജെയ്റ്റ്ലി പറഞ്ഞു. ഏകീകൃത നികുതി സംവിധാനം കൊണ്ടുവരാനും നികുതി ഘടന പരിഷ്കരിക്കാനം ജി.എസ്.ടിക്കു കഴിയുമെന്ന് ജയ്റ്റ്ലി പറഞ്ഞു. വികസനരംഗത്തിന് വന്കുതിപ്പേകുവാന് ജി.എസ്.ടിക്കു കഴിയുമെന്ന് സാമ്പത്തിക വിദഗ്ധര് അഭിപ്രായപ്പെട്ടിട്ടുണ്ടെന്നും ആമുഖമായി ജെയ്റ്റ്ലി പറഞ്ഞു. ഭൂരിപക്ഷം അടിസ്ഥാനമാക്കുന്നതിന് പകരം വാദങ്ങളുടെ അടിസ്ഥാനത്തില് ജിഎസ്ടി പാസാക്കുമെന്ന് പ്രതീക്ഷിക്കുന്നതായി പി ചിദംബരം പറഞ്ഞു. മുഖ്യ പ്രതിപക്ഷത്തിന്റെ പിന്തുണയില്ലാതെ ബില് പാസാക്കാന് ഒന്നര വര്ഷമായി സര്ക്കാര് നടത്തിയ ശ്രമം പരാജയപ്പെട്ടതില് സന്തോഷമുണ്ടെന്നും ചിദംബരം കൂട്ടിച്ചേര്ത്തു.
ബില്ലിന്മേല് അഭിപ്രായ ഏകീകരണമുണ്ടാക്കാന് സഹായിച്ച പാര്ലമെന്റംഗങ്ങള്, സംസ്ഥാന മുഖ്യമന്ത്രിമാര്, ഉന്നതാധികാര കമ്മിറ്റി അംഗങ്ങള്, സംസ്ഥാന ധനമന്ത്രിമാര് എന്നിവരെ ധനമന്ത്രി നന്ദി അറിയിച്ചു. വിവിധ തരം നികുതികള് ഒഴിവാകുന്നതാണ് ജിഎസ്ടിയുടെ കാതല്.
https://www.facebook.com/Malayalivartha
