മുത്തലാഖ് ക്രിമിനല്‍ കുറ്റമാക്കുന്ന ബില്‍ ലോക്‌സഭ പാസാക്കി, ഇനി രാജ്യസഭയും ബില്‍ പാസാക്കി രാഷ്ട്രപതി ഒപ്പു വയ്ക്കുമ്പോള്‍ നിയമമാകും
സുപ്രീംകോടതിയുടെ ഭരണഘടനാ ബെഞ്ച് റദ്ദാക്കിയ മുസ്ലിം വിവാഹമോചന രീതിയായ മുത്തലാഖ് ക്രിമിനല്‍ കുറ്റമാക്കുന്ന ബില്‍ ലോക്‌സഭ പാസാക്കി. മുത്തലാഖ് നടത്തുന്നവര്‍ക്ക് മൂന്ന് വര്‍ഷത്തെ ജയില്‍ ശിക്ഷയും പിഴയും വ്യവസ്ഥ ചെയ്യുന്നതാണ് ബില്‍. കേന്ദ്ര നിയമമന്ത്രി രവിശങ്കര്‍ പ്രസാദ് അവതരിപ്പിച്ച ബില്‍ ശബ്ദവോട്ടോടെയാണ് പാസായത്. ബില്ലിന് പ്രതിപക്ഷം നിര്‍ദ്ദേശിച്ച ഭേദഗതികള്‍ സഭ വോട്ടിനിട്ട് തള്ളി.
ബില്ലിലെ വ്യവസ്ഥകളോട് എതിര്‍പ്പ് രേഖപ്പെടുത്തി എ.ഡി.എം.കെ, മുസ്ലിം ലീഗ്, ബി.ജെ.ഡി, ആര്‍.ജെ.ഡി തുടങ്ങിയ കക്ഷികള്‍ വോട്ടെടുപ്പ് ബഹിഷ്‌കരിച്ചു. രാവിലെ അവതരിപ്പിച്ച ബില്‍ നാലര മണിക്കൂര്‍ നീണ്ട ചര്‍ച്ചയ്ക്ക് ശേഷം വൈകിട്ട് തന്നെ പാസാക്കുകയായിരുന്നു. ബില്‍ ഇനി രാജ്യസഭയും പാസാക്കി രാഷ്ട്രപതി ഒപ്പു വയ്ക്കുമ്പോഴാണ് നിയമമാകുക.
ബില്ലിനെ കോണ്‍ഗ്രസ് സ്വാഗതം ചെയ്‌തെങ്കിലും വ്യവസ്ഥകള്‍ പരസ്പര വിരുദ്ധമാണെന്ന് ലോക്‌സഭയിലെ കക്ഷി നേതാവ് മല്ലികാര്‍ജുന്‍ ഖാര്‍ഗെ ചൂണ്ടിക്കാട്ടി. ബില്‍ പൊതു ചര്‍ച്ചയ്ക്ക് വിധേയമാക്കാതെ തിടുക്കത്തില്‍ അവതരിപ്പിക്കുന്നതിനെ അദ്ദേഹം ചോദ്യം ചെയ്തു. വ്യവസ്ഥകള്‍ പരിശോധിക്കാന്‍ ബില്‍ സ്റ്റാന്‍ഡിംഗ് കമ്മിറ്റിക്ക് വിടണമെന്നും കോണ്‍ഗ്രസ് അടക്കമുള്ള പ്രതിപക്ഷം ആവശ്യപ്പെട്ടു.
എന്‍.കെ.പ്രേമചന്ദ്രന്‍, എ. സമ്പത്ത്, ജോയ്‌സ് ജോര്‍ജ് തുടങ്ങിയവരാണ് ഭേദഗതികള്‍ നിര്‍ദ്ദേശിച്ചത്. എല്ലാം വോട്ടിനിട്ട് തള്ളി. ഇ.ടി.മുഹമ്മദ് ബഷീര്‍ ബില്ലിനെ പൂര്‍ണമായി എതിര്‍ത്തു. എം. ഐ. ഷാനവാസ്, സുസ്മിത ദേവ്, അഹിര്‍ രഞ്ജന്‍ ചൗധരി തുടങ്ങിയവര്‍ ബില്ലിലെ വ്യവസ്ഥകളെ വിമര്‍ശിച്ചു. ബില്ലിനെ ശക്തമായി എതിര്‍ത്ത എ.ഐ.എം.ഐ.എം നേതാവ് അസാദുദ്ദീന്‍ ഒവെയ്‌സിയുടെ ഭേദഗതികളും വോട്ടിനിട്ട് തള്ളി.
'മുസ്ലിം വിമന്‍ ( പ്രൊട്ടക്ഷന്‍ ഒഫ് റൈറ്റ്‌സ് ഓണ്‍ മാര്യേജ് ) ബില്‍' എന്നാണ് നിയമത്തിന്റെ പേര്. ജമ്മു കാശ്മീര്‍ ഒഴികെയുള്ള സംസ്ഥാനങ്ങള്‍ക്ക് ബില്‍ ബാധകമായിരിക്കും. ആഗസ്റ്റ് 22നാണ് മുത്തലാഖ് ഭരണഘടനാവിരുദ്ധമാണെന്ന് സുപ്രീംകോടതി വിധിച്ചത്. അതിന് ശേഷവും മുത്തലാഖിലൂടെ നൂറ് വിവാഹമോചനങ്ങള്‍ നടന്ന സാഹചര്യത്തിലാണ് ബില്‍ കൊണ്ടുവന്നതെന്നാണ് ഔദ്യോഗിക വിശദീകരണം
ബില്ലിലെ വ്യവസ്ഥകളിങ്ങനെ
വാമൊഴി, എഴുത്ത്, ഫോണ്‍, ഇമെയില്‍, എസ്.എം.എസ്, വാട്ട്‌സാപ്പ് തുടങ്ങി ഏത് മാര്‍ഗത്തിലൂടെ മുത്തലാഖ് ചൊല്ലിയാലും കുറ്റം. മുത്തലാഖ് ചൊല്ലിയാല്‍ മൂന്ന് വര്‍ഷം വരെ തടവും പിഴയും, ജാമ്യമില്ലാ കുറ്റം
പ്രായപൂര്‍ത്തിയാകാത്ത മക്കളുടെ സംരക്ഷണം ഭാര്യയ്ക്ക്, ഭാര്യയ്ക്കും കുട്ടികള്‍ക്കും ജീവനാംശം നല്‍കേണ്ടിവരും. ജീവനാശം ഒന്നാം ക്‌ളാസ് ജുഡിഷ്യല്‍ മജിസ്‌ട്രേട്ട് നിശ്ചയിക്കണം.
മുത്തലാഖ് ചെയ്യുന്ന സമയത്ത് കുട്ടി പ്രായപൂര്‍ത്തിയായിട്ടില്ലെങ്കില്‍ സംരക്ഷണം ഭാര്യയ്ക്ക് ആയിരിക്കും. ഇക്കാര്യത്തിലും മജിസ്‌ട്രേട്ടിന് തീരുമാനമെടുക്കാം.
രാജ്യസഭ എന്ന കടമ്പ
മുത്തലാഖ് ബില്‍ രാജ്യസഭയിലും പാസാകണം. സര്‍ക്കാരിന് രാജ്യസഭയില്‍ ഭൂരിപക്ഷമില്ലെങ്കിലും ബില്ലിന് കോണ്‍ഗ്രസ് പിന്തുണ നല്‍കുന്ന സാഹചര്യത്തില്‍ അവിടെയും പാസാക്കാവുന്നതേയുള്ളൂ. എന്നാല്‍ ബില്ലിലെ വ്യവസ്ഥകള്‍ പരിശോധിക്കാന്‍ സ്റ്റാന്‍ഡിംഗ് കമ്മിറ്റിക്ക് വിടണമെന്നാണ് കോണ്‍ഗ്രസ് ഇന്നലെ ലോക്‌സഭയില്‍ ആവശ്യപ്പെട്ടത്. ഇതേ നിലപാട് അവര്‍ രാജ്യസഭയിലും സ്വീകരിച്ചാല്‍ ബില്‍ സെലക്ട് കമ്മിറ്റിക്ക് പോയേക്കാം. എ.ഡി.എം.കെ, ബി.ജെ.ഡി തുടങ്ങിയ കക്ഷികളുടെ എതിര്‍പ്പും രാജ്യസഭയില്‍ തിരിച്ചടിയാകാം. ബില്‍ സെലക്ട് കമ്മിറ്റിക്ക് വിട്ടാല്‍ ജനുവരി അഞ്ചിന് തീരുന്ന നടപ്പ് സമ്മേളനത്തില്‍ ബില്‍ അവതരിപ്പിക്കാനാവില്ല.
https://www.facebook.com/Malayalivartha
