മകളുടെ വിവാഹവേളയിൽ പകർത്തിയ വിഡിയോയിലെ ഒരു രംഗം മോശമായി ചിത്രീകരിച്ച് നടി താരാ കല്യാണിനെ വ്യക്തിഹത്യ ചെയ്യാൻ ശ്രമിച്ച സംഭവം കുറച്ച് മണിക്കുറുകൾ കൊണ്ടാണ് സോഷ്യൽ മീഡിയയിൽ ചർച്ചാവിഷയമായത്. ലൈവിൽ വന്ന് പൊട്ടിക്കരഞ്ഞ താരാ കല്യാൺ, തനിക്ക് നേരെ നടന്ന അശ്ലീല പ്രചരണത്തിനെതിരെ പൊട്ടിത്തെറിക്കുകയായിരുന്നു. മലയാളികൾക്ക് ഏറെ നാണക്കേടുണ്ടാക്കിയ സംഭവമാണിത്. ഇത് ഒരു ഒറ്റപ്പെട്ട സംഭവമല്ലെങ്കിലും ഇത്തരക്കാർക്കെതിരെ ആരും പരാതി നൽകാനോ പ്രതികരിക്കാനോ പോകാറില്ല. ഫെയ്സ്ബുക്, വാട്സാപ് തുടങ്ങിയവയിലുടെയാണ് ഇത്തരക്കാരുടെ സൈബർ ആക്രമണം. അശ്ലീല കുറിപ്പോടെ വ്യാജ അക്കൗണ്ടിൽ നിന്ന് സ്ത്രീകളുടെ ഫോട്ടോകൾ പോസ്റ്റ് ചെയ്ത് കമന്റിട്ട് ആസ്വദിക്കുന്നത് സൈബർ സൈക്കോകളുടെ പതിവ് ഹോബിയാണ്. ചിത്രങ്ങൾ മോർഫ് ചെയ്തു മോശം അടിക്കുറിപ്പുകളോടെ പ്രചരിപ്പിക്കുന്നവരും കുറവല്ല.

സ്ത്രീകളുടെ പേരും ഫോട്ടോകളും ഉപയോഗിച്ച് പേജുകളുണ്ടാക്കി അശ്ലീല പോസ്റ്റുകൾ ചെയ്യുന്നവർ നിരവധിയാണ്. ഇത്തരത്തിലാണ് വിൻസെന്റ് ഇകെഎം എന്ന വ്യാജ അക്കൗണ്ടിൽ നിന്ന് ഫെബ്രുവരി 24ന് താരാ കല്യാണിനെതിരായ, അപകീർത്തിപ്പെടുത്തുന്ന ഫോട്ടോ പുറത്തുവന്നത്. ഈ ഫോട്ടോ പിന്നീട് നിരവധി ഗ്രൂപ്പുകളിലും വാട്സാപ് വഴിയും പ്രചരിക്കുകയായിരുന്നു. അപകീർത്തിപ്പെടുത്തുന്ന കുറിപ്പോടെ പോസ്റ്റ് ചെയ്ത ഫോട്ടോയ്ക്ക് താഴെ അശ്ലീല കമന്റുകളും തെറിവിളികളുമായിരുന്നു. കമന്റ് ചെയ്യാൻ വന്നത് മിക്കതും വ്യാജ അക്കൗണ്ടുകൾ തന്നെ. സൈബർ സൈക്കോകളാണ് ഇതിനു പിന്നിലെന്ന് വ്യക്തമാണ്. ഇതിനെതിരെയാണ് താരാ കല്യാൺ ഫേസ്ബുക്ക് ലൈവിലെത്തിയത്.

‘‘സമൂഹമാധ്യമങ്ങളിൽ എന്നെ കുറിച്ചുള്ള ഒരു ഫോട്ടോ വൈറലാകുന്നുണ്ട്. എന്റെ മകളുടെ കല്യാണം ഒറ്റയ്ക്ക് നടത്താനുള്ള ധൈര്യമില്ലാഞ്ഞിട്ടാണ് ഭഗവാനെ കൂട്ടുപിടിച്ച്, ഗുരുവായൂരപ്പന്റെ കൈപിടിച്ച് നടത്തിയത്. ആ വിവാഹത്തിനിടയിലെ ഒരു വിഡിയോ ക്ലിപ്പിന്റെ ഒരു ഭാഗമൊടുത്ത് ചിത്രമാക്കി വൈറലാക്കിയിരിക്കുന്നു. അത് വൈറലാക്കിയ മഹാനോട് ചോദിക്കട്ടേ, നിന്റെയൊക്കെ മനസ്സ് കല്ലാണോ. നിനക്കുമില്ലേ വീട്ടിൽ അമ്മയൊക്കേ. ഈ ജന്മം ഞാനെന്ന വ്യക്തി ഒരിക്കലും നിന്നോട് പൊറുക്കില്ല.  നിന്റെ അമ്മയ്ക്ക് എന്റെ ഗതികേട് വരാതിരിക്കട്ടേ. സമൂഹമാധ്യമങ്ങൾ നല്ലതാണ്. പക്ഷേ, ഇങ്ങനെ നിങ്ങൾ ആരോടും ചെയ്യരുത്. അത് പലരുടെയും ഹൃദംഭേദിക്കും. ഇത് പ്രചരിപ്പിക്കുകയും ആഘോഷമാക്കുകയും ചെയ്തവരെ വെറുക്കുന്നു. ഒരു സ്ത്രീയാണ് എന്നെങ്കിലും ഇതു ചെയ്യുന്നവർ ചിന്തിക്കണം’ എന്നായിരുന്നു കണ്ണീരണിഞ്ഞുകൊണ്ട് താരാ കല്യാൺ പ്രതികരിച്ചത്.