ഘാനയിലെ ബെഞ്ചമിന്‍ ഐഡൂവിന്റേയും സംഘത്തിന്റേതും വെറൈറ്റി ജോലിയാണ്. ശവസംസ്‌കാര ചടങ്ങുകളില്‍ ജോലി ചെയ്യുന്ന സംഘമാണിവരുടേത്. മരിച്ചയാളുടെ മൃതദേഹവുമായി നൃത്തം ചെയ്യലാണ് പണി. സംഘത്തിന്റെ നേതാവായ ബെഞ്ചമിന്‍ ഐഡൂ ഇത്തരത്തിലെ കൊറിയോഗ്രാഫി തുടങ്ങിയ സമയത്ത് ബിബിസി ഇന്റര്‍വ്യൂ ചെയ്തിരുന്നു. അന്നദ്ദേഹം പറഞ്ഞത് തന്റെ കീഴില്‍ ഇങ്ങനെ നൂറോളം പേര്‍ ജോലി ചെയ്യുന്നുണ്ട് എന്നാണ്. ബന്ധുക്കള്‍ മരിച്ചാല്‍ പലരും ബഞ്ചമിനെയും കൂട്ടരേയും തേടിയെത്തും. അവര്‍ ശവമടക്ക് കളറാക്കിക്കൊള്ളും!

മരിച്ചുപോയ വ്യക്തി ആഘോഷമായി ജീവിക്കാന്‍ ആഗ്രഹിച്ചിരുന്ന ആളായിരുന്നുവെങ്കില്‍ അവരുടെ മരണസമയത്തും ഇത്തിരി ആഘോഷമാകുന്നതില്‍ എന്താണ് തെറ്റ് എന്നായിരുന്നു പലരുടെയും ചോദ്യം. സ്റ്റെപ്പുകളും ഭാവാഭിനയങ്ങളുമടക്കം വെല്‍ ട്രെയിന്‍ഡാണ് സംഘം. ഇവരെ വിളിക്കുന്നവര്‍ പറയുന്നത് ഇവര്‍ ശവപ്പെട്ടി ചുമക്കുമ്പോള്‍ ചെയ്യുന്ന നൃത്തവും പ്രകടനങ്ങളും തങ്ങള്‍ക്കെല്ലാം ഭയങ്കര ഇഷ്ടമാണ് എന്നാണ്.

ഏതായാലും തങ്ങളുടെ പ്രവര്‍ത്തനങ്ങളെ കുറിച്ച് ഇവരുടെ നേതാവായ ബെഞ്ചമിന്‍ ഐഡൂ ബിബിസിയോട് പറഞ്ഞത് ഇതാണ്: ഇങ്ങനെ ചടങ്ങുകളില്‍ കുറച്ച് കൊറിയോഗ്രഫി കൂടി ചേര്‍ക്കാം എന്ന് ഞാന്‍ ഒരു തീരുമാനമെടുക്കുകയായിരുന്നു. സംസ്‌കാരത്തിന് വരുന്ന ആളുകളോട് ഞാന്‍ ചോദിക്കുന്നത് ഇത്രയുമാണ്. നിങ്ങള്‍ക്കൊരു സാധാരണ ചടങ്ങാണോ വേണ്ടത്. അതോ അതില്‍ക്കൂടുതലെന്തെങ്കിലും വേണ്ടതുണ്ടോ എന്ന്. കുറച്ച് കൊറിയോഗ്രാഫി കൂടി വേണ്ടതുണ്ടോ എന്ന് എടുത്തു ചോദിക്കും. വേണമെന്ന് പറഞ്ഞാല്‍ ഞങ്ങളത് ചെയ്തുകൊടുക്കും.

യുവതീയുവാക്കള്‍ക്കായി ഏകദേശം നൂറോളം വ്യത്യസ്തമായ തൊഴിലുകള്‍ ബഞ്ചമിനുണ്ടാക്കിക്കൊടുത്തുകഴിഞ്ഞു. ഘാനയിലെ വര്‍ധിച്ച തൊഴിലില്ലായ്മയ്ക്ക് തന്നെക്കൊണ്ടാവുംവിധത്തിലുള്ള പ്രതിവിധി എന്നാണ് ബഞ്ചമനിതിനെ പറയുന്നത്.

തന്റെ ടീമിന് കൃത്യമായ ഡ്രസും സംവിധാനങ്ങളുമെല്ലാം അദ്ദേഹം ഒരുക്കിയിട്ടുണ്ട്. ഘാനയിലെ ശവസംസ്‌കാര ചടങ്ങുകള്‍ വലിയ രീതിയിലുള്ള സാമൂഹികമായ കൂടിച്ചരലുകളുടെ ഇടങ്ങളാണ്. ബഞ്ചമിന്റേതുപോലെയുള്ള സംഘങ്ങള്‍ കൂടിയെത്തിയതോടെ നിരവധി കുടുംബങ്ങള്‍ തങ്ങളുടെ പ്രിയപ്പെട്ടവരുടെ അവസാനത്തെ യാത്ര സ്‌റ്റൈലാക്കിയിരുന്നു എന്നു വേണം പറയാന്‍.