ഈ ഡുപ്ലേസിയുടെ ഒരു കാര്യം, ടീമംഗങ്ങളിലൊരാള് ഡുപ്ലേസിയുടെ പെങ്ങള്ക്കൊപ്പം കിടക്കയിലാണ്, അതിനാല് ഇന്ന് കളിക്കാനിറങ്ങില്ലെന്ന്...!
ദക്ഷിണാഫ്രിക്കയിലെ ആഭ്യന്തര ട്വന്റി20 ലീഗായ മാന്സി സൂപ്പര് ലീഗിനിടെ ദക്ഷിണാഫ്രിക്കന് നായകന് കൂടിയായ ഫാഫ് ഡുപ്ലേസി നടത്തിയൊരു പ്രസ്താവന കേട്ടവരെല്ലാം തലയില് കൈവച്ച് പറഞ്ഞുപോയി...എന്നാലും എന്റെ ഡുപ്ലേസീീീീീീ....!
നെല്സണ് മണ്ഡേല ബേ ജയന്റ്സിനെതിരായ മത്സരത്തിനു മുന്നോടിയായി ടോസിങ്ങിനെത്തിയപ്പോഴാണ് ലീഗില് പാള് റോക്സിന്റെ നായകനായ ഡുപ്ലേസി, രസകരമായ ഈ 'വൈറല് പരാമര്ശം' നടത്തിയത്.
മത്സരത്തിനു മുന്നോടിയായി ടോസിങ്ങിനായി ഡുപ്ലേസിയും ബേ ജയന്റ്സ് ക്യാപ്റ്റന് ട്രവര് സ്മുട്സും കളത്തിലെത്തി. ടോസ് നേടിയത് സ്മുട്സ്. ഫീല്ഡിങ് തിരഞ്ഞെടുക്കുന്നതായി അറിയിച്ച് സ്മുട്സ് പവലിയനിലേക്കു മടങ്ങി. തുടര്ന്ന് അവതാരകന് ഡുപ്ലേസിയുടെ നേര്ക്ക് മൈക്ക് നീട്ടി. ടീമില് എന്തെങ്കിലും മാറ്റമുണ്ടോ എന്ന് ആരാഞ്ഞു. ഡുപ്ലേസിയുടെ മറുപടി ഇങ്ങനെ:
'ഒരു മാറ്റമുണ്ട്. വില്ജോയന് ഇന്ന് കളിക്കുന്നില്ല. അദ്ദേഹം എന്റെ പെങ്ങള്ക്കൊപ്പം കിടക്കയിലാണ്....
ഡുപ്ലേസിയുടെ മറുപടിയുടെ ആദ്യഭാഗം കേട്ടപ്പോള് അമ്പരന്ന് വാപൊളിച്ചുപോയി അവതാരകന്. ഡുപ്ലേസി തുടര്ന്നു പറഞ്ഞു, 'അവരുടെ വിവാഹം ഇന്നലെയായിരുന്നു'.
ഇത് കേട്ട അവതാരകന് പൊട്ടിച്ചിരിയോടെയാണ് പ്രതികരിച്ചത്. ഡുപ്ലേസിയുടെ മറുപടി കേട്ട ആരാധകരുടെ കാര്യവും അങ്ങനെ തന്നെ. എന്തായാലും ഡുപ്ലേസിയുടെ മറുപടിയും അതിന്റെ വിഡിയോയും സമൂഹമാധ്യമങ്ങളില് വൈറലായിക്കഴിഞ്ഞു.
ദക്ഷിണാഫ്രിക്കന് താരം ഹാര്ദുസ് വില്ജോയനും ഡുപ്ലേസിയുടെ സഹോദരി റെമി റൈനേഴ്സും തമ്മില് പ്രണയത്തിലായിരുന്നു. അവരുടെ വിവാഹം മേല്പ്പറഞ്ഞ മത്സരത്തിന്റെ തൊട്ടുതലേന്നുമായിരുന്നു. വിവാഹത്തിന്റെ പശ്ചാത്തലത്തില് മത്സരത്തിന് വില്ജോയന് ഉണ്ടാകില്ലെന്നാണ് ഡുപ്ലേസി പറഞ്ഞത്. അത് 'ഡുപ്ലേസി ശൈലി'യില് അവതരിപ്പിച്ചെന്നേ ഉള്ളൂ! ഡുപ്ലേസിയുടെ മറുപടിക്കു പിന്നാലെ പോയ ആരാധകര്ക്ക് അങ്ങനെ കാര്യങ്ങളുടെ കിടപ്പുവശം പിടികിട്ടി.
ഫാഫ് ഡുപ്ലേസിയുടെ 'നവ അളിയന്' ഹാര്ദുസ് വില്ജോയന് അത്ര നിസാരനല്ല. 2016-ല് ദക്ഷിണാഫ്രിക്കന് ജഴ്സിയില് അരങ്ങേറ്റം കുറിച്ച ടെസ്റ്റ് മത്സരത്തില് ആദ്യ പന്തില്ത്തന്നെ വിക്കറ്റ് വീഴ്ത്തിയ താരമാണ് അദ്ദേഹം. മുന് ഇംഗ്ലണ്ട് ഓപ്പണര് അലസ്റ്റയര് കുക്കിനെയാണ് അന്ന് വില്ജോയന് മടക്കിയത്. ഈ നേട്ടം കൈവരിക്കുന്ന 20-ാമത്തെ മാത്രം താരവുമായിരുന്നു. പക്ഷേ, മുപ്പതുകാരനായ വില്ജോയന്റെ രാജ്യാന്തര കരിയറിലെ ഏക വിക്കറ്റ് നേട്ടമായി ഇപ്പോഴും അത് അവശേഷിക്കുന്നു. ആ മത്സരം ഏക രാജ്യാന്തര മത്സരവും!
അതേസമയം, രാജ്യന്തര കരിയറില് ഒരേയൊരു മത്സരം മാത്രമേ കളിച്ചിട്ടുള്ളൂവെങ്കിലും ഇന്ത്യന് ആരാധകര്ക്ക് സുപരിചിതനാണ് വില്ജോയന്. ഇന്ത്യന് പ്രീമിയര് ലീഗില് കഴിഞ്ഞ സീസണില് കിങ്സ് ഇലവന് പഞ്ചാബിന്റെ പ്രധാന ബോളറായിരുന്നു വില്ജോയന്. ആറു മത്സരങ്ങള് കളിച്ച വില്ജോയന് ഏഴു വിക്കറ്റും വീഴ്ത്തി. ഈ സീസണില് ടീം നിലനിര്ത്തിയ വിദേശ താരങ്ങളില് ഒരാളുമാണ് വില്ജോയന്.
https://www.facebook.com/Malayalivartha
