അടുത്തിടെയായി ഇന്ത്യന്‍ ക്രിക്കറ്റ് ആരാധകര്‍ ഉത്തരം കണ്ടുപിടിക്കാന്‍ ശ്രമിക്കുന്ന ചോദ്യമാണ് ഇന്ത്യയിലെ ഏറ്റവും മികച്ച വിക്കറ്റ് കീപ്പര്‍ ബാറ്റ്സ്മാനും രണ്ടു ലോകകപ്പുകള്‍ ഇന്ത്യന്‍ ഷോക്കേസില്‍ എത്തിച്ച നായകനുമായ മഹേന്ദ്രസിംഗ് ധോനി ക്രിക്കറ്റില്‍ നിന്നും വിരമിക്കുന്നത് എന്നാണ് എന്നത്. ഇതിന് ഉത്തരവുമായി ഐപിഎല്ലിലെ വമ്പന്മാരും ധോനിയുടെ ക്ളബ്ബുമായ സിഎസ്‌കെ എത്തുന്നു. ഇന്ത്യന്‍ ടീമില്‍ കളിപ്പിച്ചാലും ഇല്ലെങ്കിലും 2021 ഐപിഎല്‍ വരെ വിരമിക്കാന്‍ ഉദ്ദേശമില്ലെന്നാണ് താരത്തിന് വേണ്ടി അദ്ദേഹത്തിന്റെ ഐപിഎല്‍ ടീമായ ചെന്നൈ സൂപ്പര്‍കിംഗ്സ് പറയുന്നത്.

ധോനിയുടെ അവസാന ഐപിഎല്‍ ടൂര്‍ണമെന്റാകും 2020 ഐപിഎല്‍ എന്ന് വിചാരിച്ചിരുന്ന അനേകം ചെന്നൈ സൂപ്പര്‍കിംഗ്സ് ആരാധകര്‍ക്കാണ് വാര്‍ത്ത ആവേശമാകുന്നത്. താന്‍ 2021 ഐപിഎല്‍ വരെ കളിക്കുമെന്നാണ് ധോനി സിഎസ്‌കെ മാനേജ്മെന്റിനെ അറിയിച്ചിരിക്കുന്നത്. ഐപിഎല്ലിലെ 2021 സീസണിലേക്കുള്ള ലേലം തുടങ്ങാനിരിക്കെയാണ് താന്‍ കളിക്കുമെന്ന് ധോനി മാനേജ്മെന്റിനെ അറിയിച്ചിത്. അതുകൊണ്ടു തന്നെ വിരമിക്കലിനെക്കുറിച്ച് ചോദ്യമില്ലെന്ന് അവര്‍ പറയുന്നു.

ഏകദിന ലോകകപ്പില്‍ ഇംഗ്ളണ്ടില്‍ സെമിയില്‍ തോറ്റതിന് ശേഷം ഇന്ത്യന്‍ ടീമില്‍ കളിച്ചിട്ടില്ലാത്ത ധോനി 2020 ഐപിഎല്‍ സീസണ്‍ ലക്ഷ്യമിട്ട് റാഞ്ചിയില്‍ പരിശീലനവും തുടങ്ങിയിട്ടുണ്ട്. ഇന്ത്യന്‍ ടീമില്‍ അവസരം കിട്ടിയാലും ഇല്ലെങ്കിലും 2021 ഐപിഎല്‍ സീസണിലേക്ക് സിഎസ്‌കെ ടീമിനെ പുന:സൃഷ്ടിക്കാന്‍ സഹായിക്കാനുള്ള ഉദ്ദേശത്തിലാണ് ധോനി. നിലവില്‍ ഹര്‍ഭജന്‍ സിംഗ്, ഷെയിന്‍ വാട്സണ്‍, ഡൈ്വന്‍ ബ്രാവോ, ഇമ്രാന്‍ താഹിര്‍ ഉള്‍പ്പെടെയുള്ള മിക്ക താരങ്ങളും 30-കള്‍ കടന്നവരാണ്. അതുകൊണ്ടു തന്നെ 2021 സീസണ്‍ ലക്ഷ്യമിട്ടുള്ള നീക്കമായിരിക്കും ഇത്തവണ സിഎസ്‌കെ നടത്തുക.

പുതിയവരെ പരീക്ഷിക്കാനും ടീമിന്റെ സ്ഥിരത ഉറപ്പുവരുത്താനുമാകും 2020 സീസണ്‍ ധോനി ഉപയോഗിക്കുക എന്നാണ് വിവരം. ഈ സാഹചര്യമെല്ലാം കണക്കിലെടുത്താണ് താരം 2021 ഐപിഎല്ലിന് ശേഷമേ താരം വിരമിക്കൂ എന്ന് സിഎസ്‌കെ പറയുന്നത്. ക്രിക്കറ്റില്‍ നിന്നും വിരമിച്ചാലും ഉപദേശകനായി തങ്ങള്‍ക്കൊപ്പം ധോനിയുണ്ടാകുമെന്നുമാണ് സിഎസ്‌കെ പറയുന്നത്.

നിലവില്‍ സിഎസ്‌കെ 15 കോടിയ്ക്കാണ് ധോനിയെ കൂടെ നിര്‍ത്തിയിരിക്കുന്നത്. സിഎസ്‌കെയ്ക്കായി 160 മത്സരങ്ങള്‍ കളിച്ച താരം ഐപിഎല്ലില്‍ 3,858 റണ്‍സ് നേടിയിട്ടുണ്ട്. ഇത്തവണ തന്നെ ലേലത്തിലേക്ക് വിട്ടുകൊണ്ട് കുറഞ്ഞ വിലയ്ക്ക് ചെന്നൈയ്ക്ക് നേടിയെടുക്കാന്‍ അവസരമുണ്ടാക്കുന്ന പദ്ധതിയാണ് ധോനിയുടെ മനസ്സിലുള്ളത്. എന്നാല്‍ തങ്ങളുടെ ഏറ്റവും വിജയകരമായ നായകനെ വിടാന്‍ സിഎസ്‌കെ കൂട്ടാക്കുന്നില്ല. ധോനിയെ ലേലത്തിന് വിടില്ലെന്നാണ് ടീം പറയുന്നത്.

പക്ഷേ അടുത്ത ടി20 ലോകകപ്പ് ലക്ഷ്യമിടുന്ന ടീം ഇന്ത്യ ധോനിക്കപ്പുറത്ത് ടീമിന്റെ ഭാവി ലക്ഷ്യമിട്ടുള്ള താല്‍പ്പര്യമാണ് നോക്കുന്നത്. അതുകൊണ്ടു തന്നെ ധോനിക്ക് മേല്‍ അവര്‍ പന്തിന് കൂടുതല്‍ പ്രാധാന്യം നല്‍കുകയും ചെയ്യുന്നു. എന്നാല്‍ ഐപിഎല്ലില്‍ മികച്ച പ്രകടനം കാഴ്ച വെയ്ക്കുന്നത് താരത്തെ ഡിസംബറില്‍ നടക്കുന്ന ടി20 ലോകകപ്പിലേക്കും വഴി തുറക്കുമെന്നും വിലയിരുത്തുന്നവര്‍ ഏറെയാണ്.