നീണ്ടകാലത്തിനു ശേഷം ഇന്ത്യക്കായി കളിക്കാന്‍ അവസരം കിട്ടിയ മലയാളി താരം സഞ്ജു സാംസണ് തിളങ്ങാനായില്ല. വണ്‍ ഡൗണായി ഇറങ്ങിയ സഞ്ജു സാംസണ്‍ ആദ്യ പന്തില്‍ സിക്‌സ് അടിച്ചു പ്രതീക്ഷ നല്‍കി. എന്നാല്‍ രണ്ടാം പന്തില്‍ വിക്കറ്റിനു മുന്നില്‍ കുരുങ്ങി പുറത്തായി. ഹസരംഗ ആയിരുന്നു സഞ്ജുവിന്റെ വിക്കറ്റ് എടുത്തത്.

ടോസ് നേടിയ ശ്രീലങ്ക ഇന്ത്യയെ ബാറ്റിംഗിനയച്ച മത്സരത്തില്‍ ഇന്ത്യ 202 റണ്‍സ് വിജയ ലക്ഷ്യമായി ഉയര്‍ത്തി. ഓപണറായ രാഹുലും ധവാനും അര്‍ധ സെഞ്ച്വറിയുമായി തിളങ്ങിയതാണ് ഇന്ത്യക്ക് തുണയായത്. 36 പന്തില്‍ നിന്ന് 5 ഫോറും ഒരു സിക്‌സുമായി രാഹുല്‍ 54 റണ്‍സും, 36 പന്തില്‍ ഒരു സിക്‌സും ഏഴു ഫോറുമായി ധവാന്‍ 52 റണ്‍സും എടുത്തു.

17 പന്തില്‍ 26 റണ്‍സ് എടുത്ത ക്യാപ്റ്റന്‍ കോഹ്ലി റണ്‍ ഔട്ടായി. അവസാനം താകൂറും മനീഷ് പാണ്ടെയും ആക്രമിച്ചു കളിച്ചത് ഇന്ത്യയെ മികച്ച സ്‌കോറിലേക്ക് എത്തിച്ചു.