സഞ്ജുവിനെ ഒഴിവാക്കി 16 അംഗ ടീമിനെ സെലക്ഷന്‍ കമ്മിറ്റി പ്രഖ്യാപിച്ചു... ന്യൂസിലന്‍ഡ് പര്യടനത്തിനുള്ള ട്വന്റി-20 ടീമില്‍ മലയാളി താരം സഞ്ജു സാംസണ് ഇടം ലഭിച്ചില്ല. ഈ മാസം 24ന് തുടങ്ങുന്ന ഇന്ത്യയുടെ ന്യൂസിലന്‍ഡ് പര്യടനത്തില്‍ അഞ്ച് ട്വന്റി-20യും മൂന്ന് ഏകദിനവും രണ്ട് ടെസ്റ്റുമാണുള്ളത്.

ട്വന്റി-20 പരമ്ബരക്ക് മാത്രമുള്ള ടീമിനെയാണ് പ്രഖ്യാപിച്ചത്. ടെസ്റ്റ്, ഏകദിന ടീമിനെ പിന്നീട് പ്രഖ്യാപിക്കുമെന്ന് ബിസിസിഐ അറിയിച്ചു. ടീം: വിരാട് കോഹ്ലി (ക്യാപ്റ്റന്‍), രോഹിത് ശര്‍മ (വൈസ് ക്യാപ്റ്റന്‍), കെ.എല്‍.രാഹുല്‍, ശിഖര്‍ ധവാന്‍, ശ്രേയസ് അയ്യര്‍, മനീഷ് പാണ്ഡെ, ഋഷഭ് പന്ത്, ശിവം ദുബെ, കുല്‍ദീപ് യാദവ്, യുസ്വേന്ദ്ര ചഹല്‍, വാഷിംഗ്ടണ്‍ സുന്ദര്‍, ജസ്പ്രീത് ബുംറ, മുഹമ്മദ് ഷമി, നവ്ദീപ് സെയ്‌നി, രവീന്ദ്ര ജഡേജ, ശാര്‍ദൂല്‍ താക്കൂര്‍. ലങ്കയ്‌ക്കെതിരായ മൂന്നാം ട്വന്റി-20യില്‍ ഇറങ്ങിയ സഞ്ജു പക്ഷേ, ഒരു സിക്‌സര്‍ പറത്തി പുറത്തായിരുന്നു.

എന്നാല്‍, വിക്കറ്റിനു പിന്നില്‍ ഭേദപ്പെട്ട പ്രകടനം കാഴ്ചവച്ചതോടെ സഞ്ജു ടീമിലെത്തുമെന്ന് പ്രതീക്ഷകള്‍ ഉയര്‍ന്നിരുന്നു. നേരത്തെ, ബംഗ്ലാദേശിനെതിരായ ട്വന്റി-20 ടീമില്‍ എത്തി തുടര്‍ന്ന് എട്ട് മത്സരങ്ങള്‍ കാത്തിരുന്ന ശേഷമാണ് സഞ്ജു ലങ്കയ്‌ക്കെതിരായ മൂന്നാം മത്സരത്തില്‍ പ്ലേയിംഗ് ഇലവനില്‍ ഉള്‍പ്പെട്ടത്.