കിവീസ് ക്രിക്കറ്റിലെ സ്വവര്ഗ ദമ്പതികള്ക്ക് പെണ്കുഞ്ഞ്
സ്വവര്ഗ വിവാഹത്തിലൂടെ രാജ്യാന്തര ശ്രദ്ധ നേടിയ ന്യൂസീലന്ഡ് വനിതാ ക്രിക്കറ്റ് ടീം താരങ്ങളായ ആമി സാറ്റര്ത്വൈറ്റ് - ലീ തഹൂഹു ദമ്പതികള്ക്ക് പെണ്കുഞ്ഞ് ജനിച്ചു. ജനുവരി 13-നാണ് കുഞ്ഞു പിറന്നെങ്കിലും ഇപ്പോഴാണ് ഇക്കാര്യം പരസ്യമാക്കിയത്. ദമ്പതികളിലെ ലീ തഹൂഹുവാണ് കുഞ്ഞു ജനിച്ച വിവരം ഇന്സ്റ്റഗ്രാമിലൂടെ പുറത്തുവിട്ടത്. കുഞ്ഞിന്റെ ജനനവുമായി ബന്ധപ്പെട്ട് ആമി സാറ്റര്ത്വൈറ്റ് ദേശീയ ടീമില്നിന്ന് നീണ്ട ഇടവേളയെടുത്തിരുന്നു.
കുഞ്ഞിന്റെ വിരലുകള് ചേര്ത്തുപിടിക്കുന്ന ഇരുവരുടെയും കരങ്ങളുടെ ചിത്രം സഹിതം തഹൂഹു ഇന്സ്റ്റഗ്രാമില് കുറിച്ചത് ഇങ്ങനെയാണ്.
'ജനുവരി 13ന് ഗ്രേസ് മേരി സാറ്റര്ത്വൈറ്റ് ഞങ്ങളുടെ ജീവിതത്തിലേക്ക് കടന്നുവന്ന വിവരം അറിയിക്കുന്നതില് എനിക്കും ആമിക്കും അതിയായ ആഹ്ലാദമുണ്ട്. എല്ലാവര്ക്കും ഞങ്ങളുടെ സന്തോഷവും കൃതജ്ഞതയും' .
ന്യൂസീലന്ഡ് ദേശീയ ടീമില് അംഗങ്ങളായിരിക്കെ 2017 മാര്ച്ചിലാണ് ഇരുവരും വിവാഹിതരായത്. കുഞ്ഞു ജനിക്കാന് പോകുന്ന വിവരം ഇക്കഴിഞ്ഞ ഓഗസ്റ്റിലാണ് ആമി സാറ്റര്ത്വൈറ്റ് പുറത്തുവിട്ടത്. ഇതിനുള്ള തയാറെടുപ്പിനായി സജീവ ക്രിക്കറ്റില്നിന്ന് ഇടവേളയെടുക്കുകയാണെന്നും ആമി അറിയിച്ചിരുന്നു.
ന്യൂസീലന്ഡ് ക്രിക്കറ്റ് അസോസിയേഷനും താരങ്ങളുടെ സംഘടനയും തമ്മിലുള്ള ഉടമ്പടി പ്രകാരം പ്രസവവുമായി ബന്ധപ്പെട്ടുള്ള ഇടവേളയുടെ കാലയളവില് പ്രതിഫലത്തോടു കൂടിയ അവധി ലഭ്യമാണ്.
https://www.facebook.com/Malayalivartha