എം.എസ്. ധോണി ദീര്‍ഘകാലത്തെ ഇടവേളയ്ക്കു ശേഷം മത്സരക്രിക്കറ്റിലേക്കു തിരിച്ചു വരുന്നു. ഐപിഎല്‍ സീസണിന്റെ മുന്നൊരുക്കമായി ധോണി മാര്‍ച്ച് രണ്ടിന് പരിശീലനം തുടങ്ങുമെന്ന് ചെന്നൈ സൂപ്പര്‍ കിങ്‌സ് അറിയിച്ചു. ചെന്നൈ എംഎ ചിദംബരം സ്റ്റേഡിയത്തിലെ പരിശീലന സെഷനുകളില്‍ സുരേഷ് റെയ്‌ന, അമ്പാട്ടി റായുഡു തുടങ്ങിയവരും ധോണിക്കൊപ്പമുണ്ടാകും. റെയ്‌നയും റായുഡുവും നേരത്തേ പരിശീലനം തുടങ്ങി. കുറച്ചു ദിവസം പരിശീലിച്ച ശേഷം ഇടവേള എടുക്കുന്ന ധോണി പിന്നീട് മാര്‍ച്ച് 19-നു തുടങ്ങുന്ന ടീം ക്യാംപില്‍ ചേരും.

മുപ്പത്തിയെട്ടുകാരനായ ധോണി 2019 ഏകദിന ലോകകപ്പ് സെമിയില്‍ ന്യൂസീലന്‍ഡിനോടു തോറ്റ ശേഷം, ഇന്ത്യയ്ക്കു വേണ്ടി കളിച്ചില്ല. രാജ്യാന്തര കരിയറിനെക്കുറിച്ച് മൗനം തുടരുന്നതിനിടെയാണ് ഐപിഎല്ലിലേക്കുള്ള ധോണിയുടെ വരവ്. ഇടക്കാലത്ത് ധോണി വിരമിക്കുമെന്ന് ശക്തമായ അഭ്യൂഹങ്ങള്‍ പരന്നെങ്കിലും താരം പ്രതികരിച്ചിരുന്നില്ല. അതേസമയം, ഐപിഎല്ലില്‍ ധോണി മികച്ച പ്രകടനം കാഴ്ചവച്ചാല്‍ ദേശീയ ടീമിലേക്ക് മടങ്ങിയെത്തിയേക്കുമെന്ന തരത്തില്‍ ബിസിസിഐ പ്രസിഡന്റ് സൗരവ് ഗാംഗുലിയും ഇന്ത്യന്‍ ടീം പരിശീലകന്‍ രവി ശാസ്ത്രിയും പലതവണ സൂചന നല്‍കിയിരുന്നു.

ചെന്നൈ സൂപ്പര്‍ കിംഗ്‌സ് ഇത്തവണ താരലേലത്തില്‍ ഓസ്‌ട്രേലിയന്‍ പേസ് ബോളര്‍ ജോഷ് ഹെയ്‌സല്‍വുഡ്, ഇന്ത്യന്‍ ലെഗ് സ്പിന്നര്‍ പീയൂഷ് ചൗള, ഇംഗ്ലണ്ട് ഓള്‍റൗണ്ടര്‍ സാം കറന്‍ തുടങ്ങിയവരെ സ്വന്തമാക്കിയിട്ടുണ്ട്. മാര്‍ച്ച് 29-ന് സീസണ്‍ ഉദ്ഘാടന മത്സരത്തില്‍ ധോണിയുടെ ക്യാപ്റ്റന്‍സിയില്‍ മൂന്നു വട്ടം ഐപിഎല്‍ കിരീടം നേടിയ ചെന്നൈ മുംബൈയെ നേരിടും. മുംബൈയിലാണ് മത്സരം.