ട്വന്റി 20 ലോകകപ്പിനുള്ള ഇന്ത്യന്‍ ടീമിലേക്ക് എം.എസ് ധോനിയെ പരിഗണിക്കുകയാണെങ്കില്‍ അതിനു മുമ്പ് അദ്ദേഹം ഏതാനും മത്സരങ്ങള്‍ കളിക്കണമെന്ന ആവശ്യവുമായി മുന്‍ ക്യാപ്റ്റന്‍ കപില്‍ ദേവ്.

ധോനി ആരാധകനെന്ന നിലയില്‍ അദ്ദേഹം ട്വന്റി 20 ലോകകപ്പില്‍ കളിക്കുന്നത് കാണാന്‍ ആഗ്രഹമുണ്ട്. എന്നാൽ ഒരു ക്രിക്കറ്ററെന്ന നിലയില്‍ അടുത്ത ഒരു 10 വര്‍ഷത്തേക്ക് നമുക്ക് നോക്കിക്കാണാവുന്ന യുവതാരങ്ങള്‍ക്ക് അവസരം നല്‍കണമെന്നാണ് തന്റെ അഭിപ്രായമെന്നും കപില്‍ കൂട്ടിച്ചേര്‍ക്കുന്നു. ടീം മാനേജ്‌മെന്റാണ് ഇക്കാര്യത്തില്‍ തീരുമാനമെടുക്കേണ്ടതെന്നും അദ്ദേഹം അഭിപ്രായപ്പെട്ടു.

''ഒരു വര്‍ഷത്തോളമായി ധോനി കളത്തിലില്ല. (ട്വന്റി 20 ലോകകപ്പ്) ടീമില്‍ ഉള്‍പ്പെടണമെങ്കില്‍ അതിനു മുമ്പ് അദ്ദേഹം കൂടുതല്‍ മത്സരങ്ങള്‍ കളിക്കേണ്ടതുണ്ട് . ഓരോ കളിക്കാരനും ഓരോ തരത്തിലുള്ള നിയമമാകരുത്. ധോനി അദ്ദേഹത്തിന്റെ കരിയറിന്റെ അവസാന കാലത്താണ്. ഞാന്‍ അദ്ദേഹത്തിന്റെ ആരാധകനാണ്. അദ്ദേഹം ഐ.പി.എല്ലില്‍ കളിക്കുന്നത് കാണാന്‍ ആഗ്രഹിക്കുന്നുണ്ടെങ്കിലും ഞാന്‍ നോക്കുന്നത് അടുത്ത തലമുറയെയാണ്'', കപില്‍ തന്റെ പ്രസ്താവന വ്യക്തമാക്കുന്നു.