മനുഷ്യനെന്ന നിലയിലും ക്രിക്കറ്റ് താരമെന്ന നിലയിലും തന്റെ വളര്‍ച്ചയ്ക്കു പിന്നില്‍ സി എസ്സ് കെ, 'തല'യെന്ന വിളി ഇഷ്ടം: ധോണി
ഏകദിന ലോകകപ്പ് സെമിയില്‍ ഇന്ത്യ പുറത്തായശേഷം താരതമ്യേന ദൈര്‍ഘ്യമേറിയ ഇടവേളയ്‌ക്കൊടുവില്‍ ഐപിഎല്ലിലൂടെ കളത്തിലേക്കു തിരികെ വരാനൊരുങ്ങുന്ന ധോണി സൂപ്പര്‍കിംഗ്‌സിനെ കുറിച്ച് വാചാലനായി. കഴിഞ്ഞ ദിവസം ചെന്നൈ എം.എ. ചിദംബരം സ്റ്റേഡിയത്തില്‍ പരിശീലനത്തിനെത്തിയ ധോണിയെ ആവേശത്തോടെയാണ് ആരാധകര്‍ വരവേറ്റത്. ധോണിയുടെ പരിശീലനം കാണാന്‍ ഒട്ടേറെപ്പേര്‍ സ്റ്റേഡിയത്തിലെത്തുകയും ചെയ്തു.
'കളത്തിലായാലും പുറത്തായാലും ബുദ്ധിമുട്ടേറിയ നിമിഷങ്ങളെ സധൈര്യം നേരിടാന്‍ എന്നെ പ്രാപ്തനാക്കിയത് ചെന്നൈ സൂപ്പര്‍ കിങ്‌സാണ്. എല്ലാ മേഖലകളിലും സ്വയം മെച്ചപ്പെടാന്‍ ചെന്നൈ സൂപ്പര്‍ കിങ്‌സുമായുള്ള ബന്ധം എന്നെ സഹായിച്ചിട്ടുണ്ട്. മനുഷ്യനെന്ന നിലയിലും ക്രിക്കറ്റ് താരമെന്ന നിലയിലും എന്റെ വളര്‍ച്ചയ്ക്കു പിന്നില്‍ ഈ ടീമിനും ചെറുതല്ലാത്ത പങ്കുണ്ട്.' - ധോണി പറഞ്ഞു.
ചെന്നൈ സൂപ്പര്‍ കിങ്‌സ് ആരാധകര്‍ ധോണിയെ സ്‌നേഹപൂര്‍വം വിളിക്കുന്നത് 'തല' എന്നാണ്. ഇതിനെക്കുറിച്ചും ധോണി പ്രതികരിച്ചു: ചെന്നൈ സൂപ്പര്‍ കിങ്‌സിന്റെ ആരാധകരില്‍നിന്ന് തനിക്ക് ലഭിക്കുന്ന സ്‌നേഹവും ബഹുമാനവും വളരെ സ്‌പെഷലാണെന്നും ധോണി പറഞ്ഞു.
'തല എന്നാല്‍ അടിസ്ഥാനപരമായി സഹോദരന്‍ എന്നാണ് അര്‍ഥം. അതുകൊണ്ടുതന്നെ ഈ വിളിയിലൂടെ എനിക്കു ലഭിക്കുന്നത് അവരുടെ സ്‌നേഹവും ബഹുമാനവും തന്നെയാണ്. എപ്പോഴൊക്കെ ഞാന്‍ ചെന്നൈയിലെത്തിയാലും എന്നെ പേരുചൊല്ലി വിളിക്കുന്നവര്‍ തീര്‍ത്തും വിരളമാണ്. എല്ലാവരും 'തല' എന്നാണ് അഭിസംബോധന ചെയ്യാറ്. ഒരേസമയം ചെന്നൈ സൂപ്പര്‍ കിങ്‌സിനെയും എന്നെയും സ്‌നേഹിക്കുന്നവരാണ് ആ പേരു വിളിച്ച് എന്നോടുള്ള സ്‌നേഹം പ്രകടിപ്പിക്കുന്നത്' - ധോണി ചൂണ്ടിക്കാട്ടി.
ക്രിക്കറ്റ് കളത്തില്‍നിന്ന് ഇടവേളയെടുത്തത് തന്റെ കളിയെ മെച്ചപ്പെടുത്തുമെന്നും ധോണി ആത്മവിശ്വാസം പ്രകടിപ്പിച്ചു. രാജ്യാന്തര ക്രിക്കറ്റില്‍നിന്നും ഇടവേളയെടുത്ത ധോണിയുടെ നീക്കം കളിക്കാരനെന്ന നിലയില്‍ അദ്ദേഹത്തെ സഹായിക്കുമെന്ന് മുന്‍ ഇന്ത്യന്‍ താരവും ദേശീയ ടീമിന്റെ ബാറ്റിങ് പരിശീലകനുമായിരുന്ന സഞ്ജയ് ബംഗാര്‍ അഭിപ്രായപ്പെട്ടിരുന്നു.
https://www.facebook.com/Malayalivartha
