ദക്ഷിണാഫ്രിക്കയ്‌‌ക്ക് എതിരെ നടക്കുന്ന ഏകദിന പരമ്പരയില്‍ സ്റ്റാര്‍ ഓള്‍റൗണ്ടര്‍ ഹാര്‍ദിക് പാണ്ഡ്യ തിരിച്ചെത്തും. ഡി വൈ പാട്ടീല്‍ ടി20 ടൂര്‍ണമെന്‍റില്‍ പാണ്ഡ്യ മികച്ച പ്രകടനം പുറത്തെടുത്തു. സുനില്‍ ജോഷി അധ്യക്ഷനായ പുതിയ സെലക്ഷന്‍ കമ്മിറ്റി ടീമിനെ തെരഞ്ഞെടുക്കുന്ന ആദ്യ ടൂര്‍ണമെന്‍റാണ് പ്രോട്ടീസിന് എതിരെയുള്ളത്.ടൂര്‍ണമെന്‍റില്‍ തിളങ്ങിയ ശിഖര്‍ ധവാനും ഭുവനേശ്വര്‍ കുമാറും പാണ്ഡ്യക്കൊപ്പം മടങ്ങിയെത്തുമെന്നാണ് പുറത്തു വരുന്ന വിവരം. ഡി വൈ പാട്ടീല്‍ ടി20 ടൂര്‍ണമെന്‍റിലൂടെയായിരുന്നു മൂവരും ക്രീസിലേക്ക് തിരിച്ചെത്തിയത്. തോളിലെ പരിക്കുമൂലമായിരുന്നു ധവാന് ന്യൂസിലന്‍ഡ് പര്യടനത്തിലെ ഏകദിന-ടെസ്റ്റ് പരമ്പരകള്‍ നഷ്‌ടമായതും.

എന്നാൽ സ്‌പോര്‍ട്‌സ് ഹെര്‍ണിയ പിടിപെട്ടതും ഭുവിക്ക് തിരിച്ചടിയായി. ഡി വൈ പാട്ടീല്‍ ടി20യില്‍ ബാറ്റിംഗിൽ മികവ് പ്രകടിപ്പിച്ചിരുന്നു ഹാര്‍ദിക് പാണ്ഡ്യ. ഇന്നലെ നടന്ന മത്സരത്തില്‍ 58 പന്തില്‍ 20 സിക്‌സും ആറ് ഫോറും സഹിതം 158 റണ്‍സായിരുന്നു താരം നേടിയത്. മറ്റൊരു മത്സരത്തില്‍ 39 പന്തില്‍ 101 റണ്‍സും അഞ്ച് വിക്കറ്റും നേടി പാണ്ഡ്യ. കഴിഞ്ഞ വര്‍ഷം ഒക്‌ടോബറില്‍ ലണ്ടനില്‍ ശസ്‌ത്രക്രിയക്ക് വിധേയനായ ഹാര്‍ദിക് പാണ്ഡ്യ അഞ്ച് മാസം കളത്തിന് പുറത്ത് പോയി. സെപ്റ്റംബറില്‍ ദക്ഷിണാഫ്രിക്കയ്‌ക്ക് എതിരെയായിരുന്നു പാണ്ഡ‍്യ അവസാനമായി അന്താരാഷ്‌ട്ര മത്സരം കളിച്ചത്. ദക്ഷിണാഫ്രിക്ക, ബംഗ്ലാദേശ്, ശ്രീലങ്ക, ഓസ്‌ട്രേലിയ, ന്യൂസിലന്‍ഡ് ടീമുകള്‍ക്കെതിരായ പരമ്പര ഹാര്‍ദിക് പാണ്ഡ്യക്ക് നഷ്‌ടമാകുകയായിരുന്നു .