മഹേന്ദ്രസിങ് ധോണിക്ക് സമൂഹമാധ്യമങ്ങളില് ഉള്പ്പെടെ ആശംസാപ്രവാഹം, 'വിമാനം പിടിച്ച്' എത്തി പാണ്ഡ്യ ബ്രദേഴ്സിന്റെ സര്പ്രൈസ്!
മുന് ഇന്ത്യന് നായകന് മഹേന്ദ്രസിങ് ധോണിയുടെ 39-ാം ജന്മദിനമായിരുന്ന ഇന്നലെ സമൂഹമാധ്യമങ്ങളില് ഉള്പ്പെടെ ആശംസാപ്രവാഹം. സൂപ്പര്താരം സച്ചിന് തെന്ഡുല്ക്കറും ബിസിസിഐ പ്രസിഡന്റ് സൗരവ് ഗാംഗുലിയും ഇന്ത്യന് ക്യാപ്റ്റന് വിരാട് കോലിയും ഉള്പ്പെടെയുള്ളവര് മഹേന്ദ്രസിങ് ധോണിയെന്ന വന്മരത്തിന് ജന്മദിനാശംസ നേര്ന്നു.
ഇതിനിടെ, റാഞ്ചിയിലെ വീട്ടിലുള്ള ധോണിയെ നേരിട്ട് ആശംസ അറിയിക്കാന് ഇന്ത്യന് താരങ്ങളും സഹോദരങ്ങളുമായ ഹാര്ദിക് പാണ്ഡ്യയും ക്രുനാല് പാണ്ഡ്യയുമെത്തി. ഹാര്ദിക്കിന്റെ ഭാര്യയും ബോളിവുഡ് താരവുമായ നടാഷ സ്റ്റാന്കോവിച്ചും ഇവര്ക്കൊപ്പമുണ്ട്.
സ്വദേശമായ ബറോഡയില്നിന്ന് ധോണിയുടെ നാടായ റാഞ്ചിയിലേക്ക് ചാര്ട്ടേഡ് വിമാനം ഏര്പ്പാടാക്കിയാണ് ഇവര് എത്തിയതെന്ന് ബിസിസിഐ വൃത്തങ്ങളെ ഉദ്ധരിച്ച് പിടിഐ റിപ്പോര്ട്ട് ചെയ്തു. കോവിഡ് വ്യാപനവും അനന്തരഫലമായ ലോക്ഡൗണും നിമിത്തം വിമാനങ്ങള് റദ്ദാക്കിയിരിക്കുന്നതിനാലായിരുന്നു വിമാനം ചാര്ട്ടര് ചെയ്തത്.
ഹാര്ദിക് പുലര്ച്ചെ തന്നെ ട്വിറ്ററിലൂടെ ധോണിക്ക് ആശംസ നേര്ന്നിരുന്നു. നല്ലൊരു മനുഷ്യനാകാന് തന്നെ പഠിപ്പിച്ച വ്യക്തിയാണ് ധോണിയെന്ന് ഹാര്ദിക് ആശംസാ സന്ദേശത്തില് കുറിച്ചു. മോശം സമയത്തിലൂടെ കടന്നുപോയപ്പോള് ഒപ്പം നിന്നയാളാണ് ധോണിയെന്നും ഹാര്ദിക്കിന്റെ കുറിപ്പിലുണ്ട്.
ഇതിനു പിന്നാലെയാണ് സഹോദരന് ക്രുനാല് പാണ്ഡ്യയ്ക്കും ഭാര്യ നടാഷയ്ക്കുമൊപ്പം ധോണിക്ക് നേരിട്ട് ആശംസ നേരാന് ചാര്ട്ടേഡ് വിമാനത്തില് റാഞ്ചിയിലേക്ക് എത്തിയത്. 'തുടക്കം മുതല് ധോണിയെ മാതൃകയാക്കുന്ന താരമാണ് ഹാര്ദിക് പാണ്ഡ്യ. അദ്ദേഹവുമായി പാണ്ഡ്യയ്ക്ക് അഭേദ്യമായ ബന്ധവുമുണ്ട്.
വിമാനത്താവളത്തിലെത്തിയ ഇവര്ക്ക് ആരാധകര് വന് വരവേല്പ്പ് നല്കുന്നതിന്റെ വിഡിയോ സമൂഹമാധ്യമങ്ങളില് പ്രചരിക്കുന്നുണ്ട്. വിമാനത്താവളത്തിനു പുറത്ത് ധോണിയുടെ വീട്ടിലേക്ക് പോകാനായി മൂവര്സംഘം കാറില് കയറുന്ന വിഡിയോയാണ് പുറത്തുവന്നത്. താരങ്ങളെ കാണാന് ഒട്ടേറെ ആരാധകര് വിമാനത്താളവത്തിനു പുറത്തു തടിച്ചുകൂടുന്നതും വിഡിയോയിലുണ്ട്.
https://www.facebook.com/Malayalivartha