കൊറോണക്കാലത്തെ ആദ്യ ടെസ്റ്റ് ക്രിക്കറ്റില്‍ ഇംഗ്ലണ്ടിനെതിരേ സന്ദര്‍ശകരായ വെസ്റ്റ് ഇന്‍ഡീസിന് മേല്‍ക്കൈ. ഇംഗ്ലണ്ടിന്റെ 204ന് എതിരേ വിന്‍ഡീസിന് 114 റണ്‍സ് ലീഡ്. വിന്‍ഡീസിന്റെ ഒന്നാം ഇന്നിംഗ്‌സ് 102 ഓവറില്‍ 318 റണ്‍സില്‍ അവസാനിച്ചു. രണ്ടാം ഇന്നിംഗ്‌സില്‍ ബാറ്റിംഗിനിറങ്ങിയ ഇംഗ്ലണ്ട് വിക്കറ്റ് നഷ്ടപെടാതെ 15 റണ്‍സെന്ന നിലയിലാണ്. ഒന്നിന് 57 എന്ന നിലയില്‍ മൂന്നാം ദിനം തുടങ്ങിയ സന്ദര്‍ശകര്‍ക്ക് അടിത്തറയിട്ടത് ഓപ്പണര്‍ ക്രെയ്ഗ് ബ്രാത്വെയ്റ്റാണ് (65). ബ്രാത്വെയ്റ്റിനെ വീഴ്ത്തി ബെന്‍ സ്റ്റോക്‌സ് ക്യാപ്റ്റനെന്ന നിലയില്‍ ടെസ്റ്റിലെ ആദ്യ വിക്കറ്റെടുത്തു.

പിന്നീട് ക്രീസിലെത്തിയ ഷെയ്ന്‍ ഡൗറിച്ച്(61), റോഷ്ടന്‍ ചേസ് (47), ഷമാര്‍ ബ്രൂക്‌സ്(39) എന്നിവരും മികച്ച രീതിയില്‍ ബാറ്റുവീശിയതോടെ വിന്‍ഡീസ് ലീഡെടുത്തു. ഇംഗ്ലണ്ടിനായി സ്റ്റോക്‌സ് നാല് വിക്കറ്റ് നേടി. ജയിംസ് ആന്‍ഡേഴ്‌സന്‍ മൂന്നും സ്പിന്നര്‍ ഡോം ബെസും രണ്ടും മാര്‍ക് വുഡ് ഒരു വിക്കറ്റും നേടി.