ഇന്ത്യന് പ്രീമിയര് ലീഗ് 13-ാം സീസണിനു വേദിയാകുന്നതു സംബന്ധിച്ച് ബി.സി.സി.ഐയുടെ കത്ത് ലഭിച്ചെന്ന് എമിറേറ്റ്സ് ക്രിക്കറ്റ് ബോര്ഡ്
ഐ പി എല് 13-ാം സീസണിനു വേദിയാകുന്നതു സംബന്ധിച്ച് ഇന്ത്യന് ക്രിക്കറ്റ് കണ്ട്രോള് ബോര്ഡിന്റെ കത്ത് ലഭിച്ചതായി എമിറേറ്റ്സ് ക്രിക്കറ്റ് ബോര്ഡ് അറിയിച്ചു. ഐ.പി.എല്. ഭരണസമിതി ചെയര്മാന് ബ്രിജേഷ് പട്ടേലിന്റേതാണു കത്ത്. രണ്ടു രാജ്യങ്ങളിലെയും ക്രിക്കറ്റ് ബോര്ഡുകളും തമ്മില് പലവട്ടം ചര്ച്ച നടത്തിക്കഴിഞ്ഞതായും എമിറേറ്റ്സ് ക്രിക്കറ്റ് ബോര്ഡ് സെക്രട്ടറി ജനറല് മുബാഷിര് ഉസ്മാനി പറഞ്ഞു. രാജ്യത്തിനു പുറത്ത് ടൂര്ണമെന്റ് നടത്തുന്നതു സംബന്ധിച്ച ഇന്ത്യന് സര്ക്കാരിന്റെ തീരുമാനത്തിനായി കാത്തിരിക്കുകയാണ്.
കഴിഞ്ഞ മാര്ച്ചില് തുടങ്ങേണ്ടിയിരുന്ന ഐ.പി.എല്. നീട്ടിവച്ചത് കോവിഡ് വ്യാപനത്തിന്റെ പശ്ചാത്തലത്തിലാണ്. ഈവര്ഷം ഓസ്ട്രേലിയയില് നിശ്ചയിച്ചിരുന്ന ട്വന്റി20 ലോകകപ്പ് രാജ്യാന്തര ക്രിക്കറ്റ് കൗണ്സില് (ഐ.സി.സി) മാറ്റിവച്ചതോടെ ഐ.പി.എല്. ഈവര്ഷംതന്നെ നടത്താന് ബി.സി.സി.ഐ. തീരുമാനിക്കുകയായിരുന്നു.
കഴിഞ്ഞ ഏപ്രിലില്ത്തന്നെ കോവിഡിന്റെ പശ്ചാത്തലത്തില് ടൂര്ണമെന്റ് ഇന്ത്യക്കു പുറത്തു നടത്താന് ആലോചിക്കുന്നപക്ഷം തങ്ങളെ പരിഗണിക്കണമെന്ന് എമിറേറ്റ്സ് ബോര്ഡ് ബി.സി.സി.ഐയെ ധരിപ്പിച്ചിരുന്നതായാണ് സൂചന. ഇതിനുമുമ്പ് 2014 എഡിഷന് ആതിഥേയത്വം വഹിച്ച ചരിത്രവും യു.എ.ഇക്കു തുണയായി.
കേന്ദ്രസര്ക്കാരിന്റെ അനുമതി ലഭിച്ചശേഷം മത്സരക്രമം ഔദ്യോഗികമായി പ്രഖ്യാപിക്കും. നിലവില് സെപ്റ്റംബര് 19 നു തുടങ്ങി നവംബര് എട്ടിനു ഫൈനല് അരങ്ങേറുംവിധമാണ് ടൂര്ണമെന്റ് സംഘടിപ്പിക്കാന് ആലോചിക്കുന്നത്. ധാരണപ്രകാരം എട്ടു ടീമുകളുടെയും പരിശീലനവും മുന്നൊരുക്കങ്ങളും യു.എ.ഇയിലായിരിക്കുമെന്ന് ഐ.പി.എല്. ഭരണസമിതി ചെയര്മാന് ബ്രിജേഷ് പട്ടേല് പറഞ്ഞു.
https://www.facebook.com/Malayalivartha