ഇന്ത്യന്‍ പ്രീമിയര്‍ ലീഗിന്റെ 13-ാം പതിപ്പിന് വേദിയാകുന്ന യു.എ.ഇയിലേക്ക് പറക്കുന്നതിന് മുമ്പ് ചെന്നൈ സൂപ്പര്‍ കിങ്‌സ് സംഘടിപ്പിക്കുന്ന ആറു ദിവസത്തെ ക്യാമ്പിനായി ഇന്ത്യന്‍ താരങ്ങള്‍ ചെന്നൈയിലെത്തി. ക്യാപ്റ്റന്‍ എം.എസ് ധോനി, സുരേഷ് റെയ്‌ന, ദീപക് ചാഹര്‍, പിയൂഷ് ചൗള തുടങ്ങിയവരാണ് ചെന്നൈയിലെത്തിയത്.

വിമാനമാര്‍ഗമാണ് ഡല്‍ഹിയില്‍ നിന്ന് ഇവര്‍ ചെന്നൈയിലെത്തയത്. വിമാനത്തില്‍ നിന്നുള്ള ചിത്രങ്ങള്‍ റെയ്‌ന ട്വീറ്റ് ചെയ്തിട്ടുണ്ട്. ധോനി എയര്‍പോര്‍ട്ടില്‍ വന്നിറങ്ങുന്ന ചിത്രം ചെന്നൈ സൂപ്പര്‍ കിങ്‌സും പങ്കുവെച്ചിട്ടുണ്ട്. ഓഗസ്റ്റ് 15 മുതല്‍ 20 വരെ ചെന്നൈ എം.എ ചിദംബരം സ്റ്റേഡിയത്തിലാണ് ക്യാമ്പ് നടക്കുന്നത്. ബൗളിങ് പരിശീലകന്‍ എല്‍ ബാലാജിയുടെ നേതൃത്വത്തിലാണ് ക്യാമ്പ് നടക്കുക.

അതിനുശേഷം താരങ്ങള്‍ ഈ മാസം 22-ന് ചാര്‍ട്ടേഡ് വിമാനത്തില്‍ യു.എ.ഇയിലേക്ക് പോകും. മുഖ്യ പരിശീലകന്‍ സ്റ്റീഫന്‍ ഫ്‌ളെമിങ്, ബാറ്റിങ് പരിശീലകന്‍ മൈക്ക് ഹസ്സി എന്നിവര്‍ ടീമിനൊപ്പം ചേരാനായി ഓഗസ്റ്റ് 23-ന് യു.എ.ഇയിലെത്തും. അതേസമയം വ്യക്തിപരമായ കാരണങ്ങള്‍ ചൂണ്ടിക്കാട്ടി രവീന്ദ്ര ജഡേജ ക്യാമ്പില്‍ നിന്ന് പിന്മാറിയിട്ടുണ്ട്. ജഡേജ പിന്നീട് യു.എ.ഇയിലെത്തും. സെപ്റ്റംബര്‍ 19-നാണ് ഐ.പി.എല്‍ തുടങ്ങുന്നത്.