ഡ്രീം ഇലവന് ഇന്ത്യന് പ്രീമിയര് ലീഗിന്റെ 2020-ലെ ഔദ്യോഗിക സ്പോണ്സര്മാര്
ഇന്ത്യന് പ്രീമിയര് ലീഗിന്റെ 2020-ലെ ഔദ്യോഗിക സ്പോണ്സര്ഷിപ്പ് മുംബൈ ആസ്ഥാനമായി പ്രവര്ത്തിക്കുന്ന സ്പോര്ട്സ് ഗെയിം കമ്പനിയായ ഡ്രീം ഇലവന് കരസ്ഥമാക്കി. 222(29.7 ദശലക്ഷം ഡോളര്) കോടിക്കാണ് ഡ്രീം ഇലവന് സ്പോണ്സര്ഷിപ്പ് സ്വന്തമാക്കിയത്.
അപേക്ഷകളില് നിന്ന് ടൈറ്റില് സ്പോണ്സറെ തെരഞ്ഞെടുത്തത് ബി.സി.സി.ഐയും ഐ.പി.എല്. സമിതിയും ചേര്ന്നാണ്. ടാറ്റാ സണ്സാണ് സ്പോണ്സര്ഷിപ്പിനായുള്ള പോരാട്ടത്തില് മുന്നിലെന്നായിരുന്നു റിപ്പോര്ട്ടുകള്. എന്നാല് വാശിയേറിയ പോരാട്ടത്തില് 222 കോടിക്ക് ഡ്രീം ഇലവന് സ്പോണ്സര്ഷിപ്പ് നേടിയെടുക്കുകയായിരുന്നു.
ഡ്രീം ഇലവന്റെ അംബാസഡര് മുന് ഇന്ത്യന് നായകന് എം.എസ്. ധോണിയാണ്. ഡ്രീം ഇലവന്റ പരസ്യങ്ങളിലും ധോണിയാണുള്ളത്. രോഹിത് ശര്മ, ബെന് സ്റ്റോക്സ് തുടങ്ങിയവരും കമ്പനിയുടെ അമ്പാസഡര്മാരാണ്. 2008-ല് രൂപം കൊണ്ട ഡ്രീം ഇലവന് 2018 മുതല് ബി.സി.സി.ഐയുമായി ബന്ധപ്പെട്ടു പ്രവര്ത്തിക്കുന്നുണ്ട്. ഡ്രീം ഇലവന് ഐ.പി.എല്ലിന്റെ ഔദ്യോഗിക പങ്കാളികളിലൊന്നു കൂടിയാണ്.
ഓണ്ലൈന് ക്രിക്കറ്റ് ഗെയിമുകളാണു ഡ്രീം ഇലവന് നല്കുന്നത്. 2019-20 സീസണില് ന്യുസിലന്ഡിലെ ആഭ്യന്തര ട്വന്റി20 ലീഗായ സൂപ്പര് സ്മാഷിന്റെ സ്പോണ്സറായിരുന്നു ഇവര്. കോവിഡ്് മഹാമാരിക്കുശേഷം ആരംഭിച്ച ആദ്യ ക്രിക്കറ്റ് ടൂര്ണമെന്റായ കരീബിയന് ടി ടെണ് വിന്സി പ്രീമിയര് ലീഗ് സ്പോണ്സര് ചെയ്തതും ഡ്രീം ഇലവനായിരുന്നു.
ഇന്ത്യന് ടീമിന്റെ ജഴ്സി സ്പോണ്സര്മാരായ ബൈജൂസ് ആപ്പിനൊപ്പം അണ് അക്കാദമി, ടാറ്റാ സണ്സ് എന്നിവരായിരുന്നു ഐ.പി.എല്. സ്പോണ്സര്ഷിപ്പിനായി സജീവമായി രംഗത്തുണ്ടായിരുന്നത്.
അതിര്ത്തി പ്രശ്നത്തെത്തുടര്ന്ന് രാജ്യത്ത് ചൈനാ വിരുദ്ധ മനോഭാവം ശക്തമായിരുന്നു. ഈ സാഹചര്യത്തില് ഐ.പി.എല്. സ്പോണ്സര് സ്ഥാനത്ത് നിന്നു ചൈനീസ് കമ്പനിയായ വിവോ പിന്മാറിയതോടെയാണ് പുതിയ സ്പോണ്സര്ക്കായി ബി.സിസിഐ. അന്വേഷണം തുടങ്ങിയത്. കൊറോണ മഹാമാരിയുടെ പശ്ചാത്തലത്തില് സെപ്റ്റംബര് 19 മുതല് നവംബര് 10 വരെ യു.എ.ഇയിലാണ് 13-ാം ഐ.പി.എല്. നടക്കുന്നത്.
https://www.facebook.com/Malayalivartha