ഐപിഎല്ലില്‍ യുവതാരങ്ങളോടുള്ള സീനിയര്‍ താരങ്ങളുടെ സമീപനത്തിന് എത്ര കൈയ്യടി നല്‍കിയാലും മതിയാവില്ല. കഴിഞ്ഞ ദിവസം കളിക്കിടെ ഡല്‍ഹിയുടെ ഋഷഭ് പന്തിന്റെ ഷൂലെയ്‌സ് അഴിഞ്ഞപ്പോള്‍ ഗ്രൗണ്ടില്‍ മുട്ടുകുത്തി നിന്ന് അത് കെട്ടിക്കൊടുന്ന യുവരാജിനെ ആരും മറന്നിട്ടുണ്ടാകില്ല. ഋഷഭിനേക്കാള്‍ 15 വര്‍ഷത്തിന്റെ പരിചയസമ്പത്തുണ്ടായിട്ടും അതിന്റെ ജാഡയൊന്നുമില്ലാതെയാണ് യുവി ഷൂ ലെയ്‌സ് കെട്ടിക്കൊടുത്തത്.
ഗുജറാത്ത് ലയണ്‍സും ഡല്‍ഹി ഡെയര്‍ഡെവിള്‍സും തമ്മിലുള്ള മത്സരത്തിനിടയിലും അങ്ങനെയൊരു നിമിഷമുണ്ടായി. ഇത്തവണയും സീനിയര്‍ താരത്തിന്റെ സ്‌നേഹം ലഭിച്ചത് പത്തൊമ്പതുകാരന്‍ ഋഷഭിന് തന്നെയാണ്. പക്ഷേ ആ സ്‌നേഹം നല്‍കിയത് ഗുജറാത്തിന്റെ ക്യാപ്റ്റന്‍ സുരേഷ് റെയ്‌നയാണ്.
ഗുജറാത്ത് മുന്നോട്ടുവെച്ച 209 റണ്‍സ് വിജയലക്ഷ്യം പിന്തുടര്‍ന്ന ഡല്‍ഹിക്കായി പത്തൊമ്പതുകാരന്‍ മികച്ച ബാറ്റിങ്ങാണ് പുറത്തെടുത്തത്. മനോഹരമായ ഷോട്ടുകളിലൂടെ 43 പന്തില്‍ 97 റണ്‍സെടുത്ത് ഋഷഭ് പുറത്തായി. ബേസില്‍ തമ്പിയുടെ പന്തില്‍ ദിനേഷ് കാര്‍ത്തിക് സ്റ്റമ്പ് ചെയ്തതോടെ ഋഷഭിന് മൂന്ന് റണ്‍സകലെ സെഞ്ചുറി നഷ്ടമായി.