ഇന്ത്യന്‍ പ്രീമിയര്‍ ലീഗ് ഫൈനലില്‍ 'മഹാരാഷ്ട്ര ഡാര്‍ബി.' ഒരേ സംസ്ഥാനത്തു നിന്നുള്ള മുംബൈ ഇന്ത്യന്‍സും റൈസിങ് പുണെ സൂപ്പര്‍ ജയന്റും നേര്‍ക്കുനേര്‍. മൂന്നാം കിരീടം ലക്ഷ്യമിട്ടിറങ്ങുന്ന മുംബൈയ്ക്കു കനത്ത വെല്ലുവിളിയാണ് ഓസ്‌ട്രേലിയന്‍ നായകന്‍ സ്റ്റീവ് സ്മിത്തും മുന്‍ ഇന്ത്യന്‍ നായകന്‍ മഹേന്ദ്ര സിങ് ധോണിയും ഉള്‍പ്പെടുന്ന പുണെ ടീം. ഈ സീസണില്‍ മൂന്നുതവണ മുംബൈയെ അവര്‍ മറികടന്നിട്ടുണ്ട്. എങ്കിലും കലാശക്കളിയില്‍ ഇത്തരം കണക്കുകള്‍ പ്രസക്തമല്ല, കിരീടത്തിന്റെ തിളക്കത്തിലേക്കു കണ്ണുംനട്ട് ഇരു ടീമുകളും പോരടിക്കുമ്പോള്‍ വീറുറ്റ ഒരു ഫൈനല്‍ തന്നെ പ്രതീക്ഷിക്കാം. രാത്രി എട്ടിനാണു മല്‍സരം ആരംഭിക്കുന്നത്.

രണ്ടുതവണ കിരീടം നേടിയ മുംബൈ നാലാം ഫൈനലാണു കളിക്കുന്നത്. എന്നാല്‍ മഹേന്ദ്ര സിങ് ധോണിയുടെ റെക്കോര്‍ഡാണ് ഏറ്റവും ശ്രദ്ധേയം. ഏഴാം ഐപിഎല്‍ ഫൈനലിലാണു ധോണി കളിക്കുന്നത്. ക്യാപ്റ്റന്‍ രോഹിത് ശര്‍മ, കീറോണ്‍ പൊള്ളാര്‍ഡ്, ഹര്‍ഭജന്‍ സിങ്, അമ്പാട്ടി റായുഡു എന്നിവരടങ്ങുന്ന മുംബൈ ടീമിനു വമ്പന്‍ മല്‍സരങ്ങള്‍ ജയിക്കാനുള്ള പരിചയസമ്പത്തുണ്ട്.

ലെന്‍ഡല്‍ സിമ്മണ്‍സ്, മിച്ചല്‍ മക്‌ലീനഘന്‍ (19 വിക്കറ്റ്), നിതീഷ് റാണ (333 റണ്‍സ്) എന്നിവരും കൂടി ഉള്‍പ്പെടുമ്പോള്‍ ടീം അതിശക്തം. പാണ്ഡ്യ സഹോദരന്മാരാണ് ആപല്‍ഘട്ടങ്ങളില്‍ ടീമിന്റെ രക്ഷകര്‍.

ഫൈനല്‍ കളിച്ചുശീലിച്ച ധോണി വീണ്ടും മികച്ച ഫോമിലെത്തിയതാണു മുംബൈ ഏറ്റവും ഭയക്കേണ്ടത്. വമ്പന്‍ അവസരങ്ങളില്‍ ഏറ്റവും മികവിലേക്കെത്താന്‍ ധോണിക്കറിയാം. ലോകകപ്പ് ഫൈനല്‍ അടക്കം എത്രയോ ഉദാഹരണങ്ങള്‍. അത്തരത്തിലൊന്നിനാണു തയാറെടുപ്പെന്ന് ആദ്യ ക്വാളിഫയറിലെ പ്രകടനം സൂചന തരുന്നു.

ക്യാപ്റ്റന്‍ സ്മിത്ത് (421 റണ്‍സ്), മനോജ് തിവാരി (317), രാഹുല്‍ ത്രിപാഠി (388), ഇമ്രാന്‍ താഹിര്‍ (18 വിക്കറ്റ്), ജയ്‌ദേവ് ഉനദ്കട് (22 വിക്കറ്റ്) എന്നിവര്‍ കൂടി ചേരുമ്പോള്‍ പുണെ ടീമും അതിശക്തം.