ബാഗു വിപണിയില്‍ എന്നും പുതുമകളാണ്. ബാഗ് വിപണിയിലെ പുതിയ താരം രാജസ്ഥാനി ക്ലോത്ത് ബാഗുകളാണ്. പാരമ്പര്യവും ഫാഷനും ഇടകലര്‍ത്തി മനോഹരമാക്കിയിരിക്കുന്ന രാജസ്ഥാനി ക്ലോത്ത് ബാഗുകള്‍ ലക്ഷ്യമിടുന്നതും കോളജ് കുട്ടികളെ തന്നെയാണ്. കോട്ടണ്‍ തുണിയില്‍ തുന്നിയെടുത്തിരിക്കുന്ന ഇത്തരം ബാഗുകളുടെ സവിശേഷത കണ്ണഞ്ചിപ്പിക്കുന്ന നിറക്കൂട്ടുകള്‍ തന്നെയാണ്. കടുംനിറങ്ങളില്‍ ലഭിക്കുമെന്നതിനാല്‍ ഡ്രസ് മാച്ച് അനുസരിച്ചും ഉപയോഗിക്കാം. ചുവപ്പ്, വൈലറ്റ്, നീല, ഓറഞ്ച് തുടങ്ങിയ നിറങ്ങള്‍ക്കാണ് ആരാധകര്‍ ഏറെയും. മള്‍ട്ടി കളേഴ്‌സിലുള്ള ബാഗുകളുമുണ്ട് പെണ്‍കുട്ടികള്‍ മാത്രമല്ല, ആണ്‍കുട്ടികളും രാജസ്ഥാനി ക്ലോത്ത് ബാഗുകളുടെ ഫാന്‍സാണ്. ആണ്‍കുട്ടികള്‍ തെരഞ്ഞെടുക്കുന്നത് ബ്ലാക്ക്, ബ്രൗണ്‍, ഫേഡഡ്ഡ് ബ്യൂ നിറങ്ങളാണ്.
ഈ ബാഗു തോളില്‍ തൂക്കിയാല്‍ രാജകീയ പ്രൗഢി കൈവരുമെന്നതില്‍ സംശയമില്ല. പരമ്പരാഗത രാജസ്ഥാനി ഡിസൈനുകളിലാണ് ബാഗ് നിര്‍മിച്ചിരിക്കുന്നത്. ആധുനിക ഫാഷനും കൂട്ടിനുണ്ട്്. രാജസ്ഥാനിലെ പരമ്പരാഗത കലാകാരന്മാരുടെ കരവിരുതാണ് ഇത്തരം ക്ലോത്ത് ബാഗുകളെ കൂടുതല്‍ മനോഹരമാക്കുന്നത്. മുത്തുകളും കൊച്ചു ശംഖുകളും മള്‍ട്ടി കളര്‍ സ്‌റ്റോണുകളും ബാഗില്‍ സ്ഥാനം പിടിച്ചിട്ടുണ്ട്്. ആകൃതിയിലും പുതുമ ഏറെയാണ്. വൃത്താകൃതിയിലും ചതുരത്തിലും പണക്കിഴി മോഡലിലും കുട്ടയുടെ രൂപത്തിലുമൊക്കെ ക്ലോത്ത് ബാഗുകള്‍ ആവശ്യക്കാരെ ആകര്‍ഷിക്കുന്നു. സിബ്ബുകള്‍ക്കൊപ്പം കളര്‍ഫുളായിട്ടുള്ള ത്രെഡുകളാണ് മറ്റൊരു പ്രത്യേകത.
സ്ട്രാപ്പുകള്‍ നീളം കൂടിയതും കുറഞ്ഞതുമുണ്ട്്. എങ്കിലും നീളം കൂടിയ സ്ട്രാപ്പുകള്‍ക്കാണ് ആവശ്യക്കാരേറെയും. കാരണം വണ്‍സൈഡായോ, തോളില്‍ കുറുകെയോ ഇട്ട് ഷൈന്‍ ചെയ്യാം. ക്ലച്ച് ടൈപ്പ് ബാഗുകളും ഇക്കൂട്ടത്തിലുണ്ട്്. 300 രൂപ മുതലാണ് ഇവയുടെ വില.