രഹസ്യാന്വേഷണ വിഭാഗത്തിന് ലഭിച്ച വിവരത്തിന്റെ അടിസ്ഥാനത്തില്‍ ആറു ഭാഷകള്‍ സംസാരിക്കുന്ന പൂജാരിയായി സ്വയം പരിചയപ്പെടുത്തി യുവാവിനെയും കുടുംബത്തെയും ഒന്നടങ്കം കബളിപ്പിച്ച യുവാവ് അറസ്റ്റില്‍. കട്ടയോട് തോണിക്കടവന്‍ വീട്ടില്‍ ഫൈസലിനെ(36)യാണ് അറസ്റ്റ് ചെയ്തത്.

ട്രെയിനില്‍ വച്ച് പരിചയപ്പെട്ടയാളുടെ വീട്ടില്‍ ഇയാള്‍ പൂജാരി ചമഞ്ഞ് താമസിക്കുകയും വീട്ടുകാരുമായി ആത്മബന്ധം പുലര്‍ത്തുകയും ചെയ്തു. തുടര്‍ന്ന് വീട്ടുകാരെ സാമ്പത്തികമായി കബളിപ്പിക്കുകയും ചെയ്തു.

വിശാല്‍ നമ്പൂതിരിയെന്ന് സ്വയം പരിചയപ്പെടുത്തിയ ഇയാള്‍ക്ക് ആറു ഭാഷകള്‍ അറിയാമെന്നും ഇയാള്‍ കുടുംബാംഗങ്ങളെ വിശ്വസിപ്പിച്ചു. യുവാവിന്റെ ജ്യേഷ്ഠന് ജോലി തരപ്പെടുത്തിക്കൊടുക്കാമെന്ന് പറഞ്ഞ് ഇയാള്‍ അന്‍പതിനായിരം രൂപ വാങ്ങി. കഴിഞ്ഞ ദിവസങ്ങളില്‍ വീട്ടില്‍ പൂജകളും നടത്തി.

ഒരു യുവാവ് കോമല്ലൂരിലെ ഒരു വീട്ടില്‍ സംശയകരമായ നിലയില്‍ വന്ന് പോകുന്നുവെന്ന് രഹസ്യാന്വേഷണ വിഭാഗത്തിന് അറിയിപ്പ് കിട്ടിയതിനെ തുടര്‍ന്നുള്ള അന്വേഷണത്തിലാണ് യുവാവ് വ്യാജപൂജാരിയാണെന്നത് വെളിച്ചത്തായത്.

ഇയാള്‍ കഴിഞ്ഞ 2 വര്‍ഷമായി ചെങ്ങന്നൂര്‍ ആല നെടുവരങ്കോട്ട് താമസിച്ച് ഒരു വീട്ടില്‍ കൃഷിപ്പണി ചെയ്യുകയായിരുന്നെന്ന് പോലീസിനോട് പറഞ്ഞു. അവിടെ ഇയാള്‍ സ്വന്തം പേരിലാണ് കഴിഞ്ഞിരുന്നത്. ഇയാള്‍ പല തവണ വന്‍തോതില്‍ പലയിടത്തേക്കും പണം അയച്ചിട്ടുണ്ടെന്നും അന്വേഷണത്തില്‍ കണ്ടെത്തി. ഇതേപ്പറ്റിയും അന്വേഷിക്കും.