രഹസ്യമായി രണ്ടെണ്ണം ആകാമോ... കോണ്ഗ്രസിന്റെ സെമി കേഡറിലൂടെ മുഖഛായ മാറ്റാനൊരുങ്ങി സുധാകരന്; പരസ്യ മദ്യപാനം ശീലമാക്കിയവരെ പുറത്താക്കും; ജനവിരുദ്ധ സമരം ഇല്ല; കോണ്ഗ്രസിലെ പരിഷ്കാരങ്ങളില് ഏറെ പുതുമ
സെമി കേഡറിലേക്ക് കടന്ന കെ സുധാകരന്റെ കോണ്ഗ്രസ് പാര്ട്ടിയുടെ പരസ്യ മദ്യപാനം പാടില്ലെന്ന പ്രസ്താവന കണ്ടതോടെ അപ്പോള് രഹസ്യമായി ആകാമോ എന്ന ചോദ്യമാണ് ഉയരുന്നത്. വളരെ കൗതുകം നിറഞ്ഞ കാര്യങ്ങളാണ് കോണ്ഗ്രസിന്റെ പുതിയ രീതി.
ഗതാഗത തടസ്സത്തിനു വഴിവയ്ക്കുന്നതും മറ്റുള്ളവര്ക്കു ദ്രോഹമുണ്ടാക്കുന്നതുമായ ജനവിരുദ്ധ സമരങ്ങള് ഒഴിവാക്കാന് കോണ്ഗ്രസ് തീരുമാനിച്ചു. പരസ്യ മദ്യപാനം ശീലമാക്കിയവരെ എല്ലാ ഭാരവാഹിത്വത്തില്നിന്നും മാറ്റി നിര്ത്താനും കെപിസിസി നേതൃത്വം നിര്ദേശിച്ചു.
അച്ചടക്കവും കാര്യക്ഷമതയും ഉറപ്പാക്കുന്ന സെമി കേഡര് സ്വഭാവത്തിലേക്കു പാര്ട്ടിയെ മാറ്റാന് കെപിസിസി തയാറാക്കിയ ഈ മാര്ഗനിര്ദേശങ്ങള് താഴെത്തട്ടുവരെ റിപ്പോര്ട് ചെയ്യാന് തുടങ്ങി.
രാഷ്ട്രീയ എതിരാളികളുമായി ക്രമം വിട്ട ബന്ധവും അനാവശ്യ ധാരണയും ഉണ്ടാക്കുന്നവരെ നിരീക്ഷിക്കും. കോണ്ഗ്രസുകാര് തമ്മിലെ തര്ക്കവും വഴക്കും തീര്ക്കാന് ഓരോ ഘടകവും സമിതികളെ വയ്ക്കാനും ധാരണയായി. പാര്ട്ടിയുടെ പൊതുവേദികളില് വനിത, പട്ടികജാതി നേതാക്കള് ഓരോരുത്തര്ക്ക് എങ്കിലും ഇരിപ്പിടം നല്കും. വ്യക്തി വിരോധത്തിന്റെ പേരില് നേതാക്കന്മാരെ ഒരു ഘടകത്തിലും മാറ്റിനിര്ത്തില്ല
മറ്റു പ്രധാന തീരുമാനങ്ങള് ഇതൊക്കെയാണ്
തിരഞ്ഞെടുപ്പുകളില് നിസ്സംഗത പാലിക്കുകയോ എതിരായി പ്രവര്ത്തിക്കുകയോ ചെയ്യുന്ന പ്രവര്ത്തകരെ കണ്ടെത്തി നടപടി സ്വീകരിക്കണം.
ഓഫിസുകള് പുരുഷ കേന്ദ്രീകൃതം എന്ന ദുഷ്പേര് ഒഴിവാക്കണം.
ഓരോ ബൂത്തിനും കീഴില് ഒരു കുടുംബ ഡയറി തയാറാക്കണം. ഒരു വീട്ടിലെ ആരെല്ലാം കോണ്ഗ്രസിന്റെ ഭാഗമാണ്, മറ്റുള്ള പാര്ട്ടികളുടെ ഭാഗമാണ് എന്നതെല്ലാം ഉണ്ടാകണം.
മദ്യപാനം, പുകവലി, ചീട്ടുകളി തുടങ്ങിയവ പാര്ട്ടി ഓഫിസുകളില് പാടില്ല.
ഭീഷണിപ്പെടുത്തിയുള്ള പിരിവ്, പ്രതികാര രാഷ്ട്രീയം എന്നിവ അനുവദിക്കില്ല.
സമൂഹമാധ്യമങ്ങളിലെ ഇടപെടലുകളും ഫോണ് സംഭാഷണവും മാന്യതയുടെ അതിര്വരമ്പ് ലംഘിക്കുന്നതാകരുത്.
ജില്ലാ, സംസ്ഥാന ജാഥകള്ക്കു വ്യക്തിപരമായി ആശംസ നേരുന്ന ഫ്ലെക്സ് പാടില്ല. പകരം ഔദ്യോഗിക കമ്മിറ്റിയുടെ പേരിലാവണം.
എല്ലാ പാര്ട്ടി പരിപാടികള്ക്കും ഗാന്ധിജിയുടെ ചിത്രം നിര്ബന്ധമായി ഉപയോഗിക്കണം.
കോണ്ഗ്രസ് പ്രവര്ത്തകര്ക്കു സുരക്ഷിതത്വ ബോധം നല്കണം. കേസുകള് വന്നാല് അതു നടത്താനുള്ള സംവിധാനം അവര്ക്കായി ഏര്പ്പെടുത്തണം.
വ്യക്തികളുടെ പിരിവുകള് ഒഴിവാക്കണം.
അതേസമയം ആറു മാസത്തിനുശേഷം ഡി.സി.സി അദ്ധ്യക്ഷന്മാരുടെ പ്രവര്ത്തനം വിലയിരുത്തുമെന്നും ഏല്പിച്ച ചുമതലകള് നിറവേറ്റാത്ത നേതാക്കള്ക്ക് പുറത്തുപോകേണ്ടിവരുമെന്നും കെ.പി.സി.സി പ്രസിഡന്റ് കെ. സുധാകരന് പറഞ്ഞു. സര്വേ നടത്തി പഠിച്ചതിന്റെ അടിസ്ഥാനത്തിലാണ് പാര്ട്ടിയില് മാറ്റങ്ങള് വരുന്നത്. പാര്ട്ടിയെ ശക്തിപ്പെടുത്തുന്നതിന്റെ ഭാഗമായി രണ്ട് സര്വേകള് നടത്തി. എറണാകുളത്ത് സര്വേ നടന്നുവരികയാണ്. കേഡര് സംവിധാനം എന്താണെന്ന് പ്രവര്ത്തകരെ പഠിപ്പിക്കും. കേഡര് എന്നതുകൊണ്ട് തീവ്രഅച്ചടക്കമല്ല, പാര്ട്ടിയോടുള്ള സമര്പ്പണമാണ് ഉദ്ദേശിക്കുന്നത്. 3000 പേര് കേഡര്മാരായി ബൂത്തുതലത്തില് പ്രവര്ത്തിക്കാന് സന്നദ്ധത അറിയിച്ചിട്ടുണ്ടെന്നും സുധാകരന് വ്യക്തമാക്കി.
"
https://www.facebook.com/Malayalivartha