മണ്ഡലകാല തീര്‍ഥാടനം പൂര്‍ത്തിയായപ്പോള്‍ ശബരിമലയിലെ വരുമാനം 100 കോടിയിലേക്ക്. മണ്ഡല തീര്‍ഥാടന കാലത്ത് 11 ലക്ഷത്തില്‍പ്പരം ഭക്തര്‍ ദര്‍ശനത്തിനെത്തി. ഇതുവരെ കണക്കാക്കിയ വരുമാനം 90 കോടി കവിഞ്ഞു.

ഭണ്ഡാരത്തിലെ വരുമാനത്തിന് പുറമെയാണിത്. ഭണ്ഡാരം എണ്ണി തിട്ടപ്പെടുത്തല്‍ പൂര്‍ത്തിയാകുമ്പോള്‍ ആകെ വരുമാനം 100 കോടിയിലേക്കെത്തും. ദര്‍ശനത്തിനെത്തിയവരുടെ എണ്ണത്തിന് ആനുപാതികമായി കണക്കാക്കുമ്പോള്‍ ഇത് റെക്കോര്‍ഡാണ്.

ഇത്തവണ സീസണ്‍ തുടക്കകാലത്ത് 10000 ന് അടുത്ത് തീര്‍ഥാടകരാണ് എത്തിയത്. എന്നാല്‍ സമാപന ദിനങ്ങളില്‍ തീര്‍ഥാടകരുടെ എണ്ണം 45000 ത്തിലേക്ക് എത്തി. മകരവിളക്ക് തീര്‍ഥാടന കാലത്തും വന്‍ ഭക്തജന തിരക്ക് ദേവസ്വം അധികൃതര്‍ പ്രതീക്ഷിക്കുന്നുണ്ട്.

കോവിഡ് നിയന്ത്രണങ്ങള്‍ ഉണ്ടായിരുന്നതിനാല്‍ കഴിഞ്ഞ വര്‍ഷം ശബരിമലയില്‍ ലഭിച്ച വരുമാനം എട്ട് കോടി മാത്രമാണ്.