സിറ്റി മെഡിക്കല്‍ കോളേജ് പ്രിയദര്‍ശിനി നഗറില്‍ നടന്ന മോഷണക്കേസില്‍ 100 ഓളം കേസുകളില്‍ പ്രതിയായ കുപ്രസിദ്ധ മോഷ്ടാവ് കൊട്ടാരം ബാബുവിന്റെ വിരലടയാള റിപ്പോര്‍ട്ട് ഹാജരാക്കാന്‍ കോടതി ഉത്തരവ്.

തിരുവനന്തപുരം അഡീഷണല്‍ ചീഫ് ജുഡീഷ്യല്‍ മജിസ്‌ട്രേട്ട് കോടതിയാണ് പ്രതിയെ വിചാരണ ചെയ്യുന്നത്. കൃത്യവീട്ടില്‍ നിന്ന് ശേഖരിച്ച പ്രതി തര്‍ക്കിക്കുന്ന വിരലടയാളങ്ങളും അറസ്റ്റ് ചെയ്ത് പോലീസ് എടുത്ത പ്രതിയുടെ വിരലടയാളങ്ങളും കംപാരിസണ്‍ നടത്തിയുള്ള ഫിംഗര്‍ പ്രിന്റ് അനാലിസിസ് റിപ്പോര്‍ട്ട് ഫെബ്രുവരി 15 നകം ഹാജരാക്കാന്‍ ഫിംഗര്‍ പ്രിന്റ് ബ്യൂറോ ഡയറക്ടറോടാണ് എ സി ജെ എം വിവിജാ രവീന്ദ്രന്‍ ഉത്തരവിട്ടത്.

2021 മെയ് മാസത്തിലാണ് കേസിനാസ്പദമായ സംഭവം നടന്നത്. പൂജപ്പുര സെന്‍ട്രല്‍ ജയിലില്‍ ശിക്ഷാ പ്രതിയായി കഴിയവേ കോവിഡ് - ലോക് ഡൗണ്‍ പശ്ചാത്തലത്തില്‍ നല്‍കിയ പരോള്‍ ഇളവില്‍ പുറത്തിറങ്ങിയാണ് പ്രതി വീണ്ടും മോഷണം നടത്തിയത്.

തലസ്ഥാന ജില്ലയിലെ മെഡിക്കല്‍ കോളേജ് പോലീസ് സ്റ്റേഷന്‍ പരിധിയിലുള്ള പ്രിയദര്‍ശിനി നഗറിലെ വീട്ടില്‍ ഭവനഭേദനം നടത്തി അലമാര കുത്തിത്തുറന്ന് പണവും സ്വര്‍ണ്ണാഭരണങ്ങളും മോഷണം നടത്തിയ കേസിലാണ് വിചാരണ പുരോഗമിക്കുന്നത്. കേസില്‍ ഇതിനോടകം 6 സാക്ഷികളെ വിസ്തരിച്ചു. കോടതിയില്‍ ഹാജരാകാത്ത ഏഴാം സാക്ഷിയെ ഫെബ്രുവരി 15 നകം അറസ്റ്റ് ചെയ്ത് ഹാജരാക്കാനും കോടതി ഉത്തരവിട്ടു.

പോത്തന്‍കോട് കോലിയക്കോട് ശാന്തിഗിരി നെല്ലിക്കോട് വീട്ടില്‍ ബാബു എന്ന കൊട്ടാരം ബാബു (55) വിനെയാണ് വിചാരണ ചെയ്യുന്നത്. പോത്തന്‍കോട് മണിമല കൊട്ടാരത്തിലെ വാതിലുകളും ഫര്‍ണിച്ചറുകളും മോഷ്ടിച്ചു മറിച്ചു വിറ്റ കേസില്‍ പ്രതിയായതോടെയാണ് കൊട്ടാരം ബാബു എന്ന വിളിപ്പേര് വീണത്.

ഇന്ത്യന്‍ ശിക്ഷാ നിയമത്തിലെ 454 (പതുങ്ങിയിരുന്നു കൊണ്ടുള്ള ഭവനഭേദനം) , 461 (വസ്തു അടങ്ങിയ അലമാര നേരുകേടായി കുത്തിതത്തുറക്കല്‍) , 380 (വാസ ഗൃഹത്തില്‍ വച്ചുള്ള മോഷണം) എന്നീ ശിക്ഷാര്‍ഹമായ വകുപ്പുകള്‍ പ്രകാരമുള്ള കുറ്റങ്ങള്‍ വിചാരണക്ക് മുന്നോടിയായി പ്രതിക്ക് മേല്‍ ചുമത്തിയാണ് കോടതി പ്രതിയെ വിചാരണ ചെയ്യുന്നത്.

2020 ആഗസ്റ്റ് 8 ന് കല്ലമ്പലം പോലിസ് കൊട്ടാരം ബാബുവിനെയും കൂട്ടുപ്രതിയായ കൊല്ലം പുത്തന്‍കുളം നന്ദു ഭവനില്‍ ബാബു എന്ന തീവെട്ടി ബാബുവിനെയും പിടി കൂടിയിരുന്നു. നിരവധി കേസില്‍ ഇരുവരും ജയില്‍ ശിക്ഷ അനുഭവിച്ചിട്ടുണ്ട്. മോഷണമുതല്‍ വിറ്റു കിട്ടുന്ന പണം ആഢംബര ജീവിതം നയിക്കാനാണ് പ്രതികള്‍ വിനിയോഗിക്കുന്നത്. തീവെട്ടി ബാബുവിന് കൊട്ടാരം ബാബുവുമായി ജയിലില്‍ വച്ചുചുള്ള പരിചയമാണ്. 2020 വരെ 26 മോഷണ കേസുകള്‍ തീ വെട്ടി ബാബുവിന്റെ പേരിലുണ്ട്.

ക്ഷേത്രങ്ങളിലെ കാണിക്ക വഞ്ചികള്‍ പ്രദക്ഷിണ എണ്ണ വിളക്കുകള്‍ക്ക് എണ്ണയൊഴിക്കുന്ന തീവെട്ടിക്കമ്പി കൊണ്ട് കുത്തിത്തുറന്ന് മോഷണം നടത്തിയതിനാലാണ് തീവെട്ടി ബാബുവെന്ന പേര് വീണത്. 2020 ല്‍ ജയിലില്‍ നിന്ന് പുറത്തിറങ്ങിയ ഇവര്‍ പദ്ധതികള്‍ ആസൂത്രണം ചെയ്യുകയും കല്ലമ്പലം - ആറ്റിങ്ങല്‍ ദേശീയ പാതയില്‍ കടുവയില്‍ പള്ളിക്ക് സമീപമുള്ള വീട്ടില്‍ മോഷണം നടത്തി രക്ഷപ്പെട്ടു. തുടര്‍ന്ന് കല്ലമ്പലം പോലീസ് നടത്തിയ തെരച്ചിലിലാണ് ഇരുവരും പിടിയിലായത്.

2021 ല്‍ പരോളിലിറങ്ങിയ കൊട്ടാരം ബാബു ജൂണ്‍ 21 ന് കോട്ടയം ഗാന്ധിനഗര്‍ പോലീസിന്റെ പിടിയിലായി. കോട്ടയം മെഡിക്കല്‍ കോളേജ് പരിസരത്ത് നിന്നാണ് പിടിയിലായത്. ഒപ്പമുണ്ടായിരുന്ന കാര്‍ത്തികപ്പള്ളിക്കാരനായ മറ്റൊരു മോഷ്ടാവ് ഓടി രക്ഷപ്പെട്ടു.

35 വര്‍ഷങ്ങളായി മോഷണക്കുറ്റകൃത്യങ്ങളില്‍ വ്യാപൃതനാണ് ബാബു. കോട്ടയം ഗാന്ധിനഗര്‍ പോലീസിന്റെ ചോദ്യം ചെയ്യലിലാണ് തിരുവനന്തപുരം മെഡിക്കല്‍ കോളേജ് പ്രിയദര്‍ശിനി നഗറിലെ മോഷണം പ്രതി 'ഏറ്റുപറഞ്ഞ് കുറ്റസമ്മതം നടത്തിയത്. തുടര്‍ന്ന് കുറ്റസമ്മത മൊഴിയുടെ പ്രസക്തഭാഗങ്ങള്‍ കേസ് ഡയറി സഹിതം തിരുവനന്തപുരം മെഡിക്കല്‍ കോളേജ് പോലീസിന് ഗാന്ധിനഗര്‍ പോലീസ് കൈമാറുകയായിരുന്നു. 2021 ജൂലൈ 29 നാണ് മെഡിക്കല്‍ കോളേജ് പോലീസ് കേസില്‍ കുറ്റപത്രം സമര്‍പ്പിച്ചത്.