സംസ്ഥാനത്ത് കോവിഡ് കുതിച്ചുയരുമ്പോള്‍ ആശങ്കയായും ആശ്വാസമായും പഠന റിപ്പോര്‍ട്ട്. അടുത്ത രണ്ടാഴ്ചയ്ക്കുള്ളില്‍ മൂന്നാം തരംഗം ഇന്ത്യയില്‍ മൂര്‍ദ്ധന്യത്തിലെത്തുമെന്ന് മദ്രാസ് ഐ.ഐ.ടി.യുടെ പഠനം. കഴിഞ്ഞ രണ്ടാഴ്ചയിലെ കോവിഡ് ആര്‍. വാല്യുവിന്റെ (പകര്‍ച്ചവ്യാപനശേഷി) അടിസ്ഥാനത്തില്‍ ഐ.ഐ.ടി.യിലെ ഗണിതവകുപ്പും സെന്റര്‍ ഓഫ് എക്‌സലന്‍സ് ഫോര്‍ കംപ്യൂട്ടേഷണല്‍ മാത്തമാറ്റിക്‌സ് ആന്‍ഡ് ഡേറ്റ സയന്‍സും നടത്തിയ പഠനത്തിന്റെ അടിസ്ഥാനത്തിലാണ് റിപ്പോര്‍ട്ട്.

ആര്‍. വാല്യുവില്‍ കുറവ് രേഖപ്പെടുത്തുന്നുണ്ടെങ്കിലും രോഗബാധിതരുടെ എണ്ണത്തില്‍ വര്‍ധനയുണ്ടെന്ന് ഐ.ഐ.ടി.യിലെ അസിസ്റ്റന്റ് പ്രൊഫസര്‍ ഡോ. ജയന്ത് ഝാ പറഞ്ഞു.

രോഗിയുമായി സമ്പര്‍ക്കത്തിലെത്തുന്നവര്‍ ലക്ഷണമില്ലെങ്കില്‍ പരിശോധിക്കേണ്ടെന്ന ഐ.സി.എം.ആറിന്റെ പുതിയ മാര്‍ഗരേഖയാണ് ആര്‍. വാല്യു കുറയാന്‍ കാരണം. എന്നാല്‍ ലക്ഷണമില്ലാത്ത രോഗികള്‍ പരിശോധനയോ നിരീക്ഷണമോ ഇല്ലാതെ സ്വതന്ത്രസഞ്ചാരം നടത്തുന്നത് വ്യാപനത്തോത് വര്‍ധിപ്പിക്കും. രണ്ടാം തരംഗത്തെ അപേക്ഷിച്ച് കേസുകളില്‍ ക്രമാതീതമായ വര്‍ധന ഇനിയുണ്ടാകും.

ഓരോ രോഗബാധിതരില്‍നിന്നും എത്രപേര്‍ക്ക് അണുബാധ പകരുമെന്ന കണക്കാണ് ആര്‍. വാല്യു. ജനുവരി 14നും 21നും ഇടയില്‍ ആര്‍.മൂല്യം 1.57 രേഖപ്പെടുത്തിയിട്ടുണ്ട്. ജനുവരി ഒന്നുമുതല്‍ ആറുവരെ ഇത് 4 ആയിരുന്നു. ഡിസംബര്‍ 25 മുതല്‍ 31 വരെ 2.9 ആയിരുന്നു ആര്‍. മൂല്യം. ആര്‍. വാല്യു ഒന്നിന് മുകളിലാകുന്നത് വൈറസ് വ്യാപിക്കുന്നതിന്റെ സൂചനയാണ്. ഒന്നിന് താഴെയെത്തിയാല്‍ മാത്രമേ മഹാമാരി അവസാനിച്ചുവെന്ന് കണക്കാക്കാന്‍ സാധിക്കൂ.

അതേസമയം രാജ്യത്ത് കോവിഡ് തീവ്രവ്യാപനം അവസാനിക്കുന്നതായും പഠന റിപ്പോര്‍ട്ട് സൂചിപ്പിക്കുന്നു. ആര്‍ വാല്യുവിലെ കുറവ് മുന്‍നിര്‍ത്തിയാണ് മദ്രാസ് ഐഐടിയുടെ റിപ്പോര്‍ട്ട്. ഒരാളില്‍ നിന്ന് എത്ര പേരിലേക്കു രോഗം പകരാം എന്നതിനെ അടിസ്ഥാനമാക്കിയാണ് ആര്‍ വാല്യു കണക്കാക്കുന്നത്.

ജനുവരി 1 മുതല്‍ 6 വരെ 4 ആയിരുന്നു ആര്‍ വാല്യു. ജനുവരി 7 മുതല്‍ 13 വരെ 2.2 ആയി. 14 മുതല്‍ 21 വരെ 1.57 ആയി കുറഞ്ഞു. മുംൈബയിലെ ആര്‍ വാല്യു 0.67 ഉം ഡല്‍ഹിയിലേത് 0.98 ഉം കൊല്‍ക്കത്തയിലേത് 0.56 ഉം ആണ്.

കൊല്‍ക്കത്തയിലേയും മുംബൈയിലേയും ആര്‍ വാല്യു പ്രകാരം കോവിഡ് വ്യാപനം അവസാനിച്ചതായി അനുമാനിക്കാമെന്ന് മദ്രാസ് ഐഐടി അസിസ്റ്റന്റ് പ്രഫ.ഡോ.ജയന്ത് ഝാ പറഞ്ഞു. ഡല്‍ഹിയിലും ചെന്നൈയിലും അവസാനത്തിലേക്കടുക്കുകയാണെന്നും അദ്ദേഹം പറഞ്ഞു. ഫെബ്രുവരി 6 വരെയെ രൂക്ഷമായ വ്യാപനത്തിന് സാധ്യതയുള്ളു.

ഫെബ്രുവരി 1 മുതല്‍ 15 വരെയായിരിക്കും രൂക്ഷവ്യാപനത്തിന് സാധ്യതയെന്നായിരുന്നു ആദ്യ പഠനങ്ങള്‍. ഞായറാഴ്ച 3,33,533 പേര്‍ക്കാണ് രാജ്യത്ത് കോവിഡ് സ്ഥിരീകരിച്ചത്. മുംബൈ, ഡല്‍ഹി തുടങ്ങിയ നഗരങ്ങളിലും കോവിഡ് കേസുകള്‍ കുറയുന്നുണ്ട്.

അതേസമയം കേരളത്തില്‍ കോവിഡ് കേസുകള്‍ കുതിച്ചുയരുകയാണ്. 45,449 പേര്‍ക്കാണ് ഇന്നലെ കോവിഡ് സ്ഥിരീകരിച്ചത്. 1,01,252 സാംപിളുകളാണ് പരിശോധിച്ചത്. രോഗം സ്ഥിരീകരിച്ച് ചികിത്സയിലായിരുന്ന 27,961 പേര്‍ രോഗമുക്തി നേടി.

കഴിഞ്ഞ ദിവസങ്ങളിലുണ്ടായ 38 മരണങ്ങളാണ് കോവിഡ് മൂലമാണെന്ന് ഇന്ന് സ്ഥിരീകരിച്ചത്. ഇതുകൂടാതെ സുപ്രീംകോടതി വിധിപ്രകാരം കേന്ദ്രസര്‍ക്കാരിന്റെ പുതിയ മാര്‍ഗനിര്‍ദേശമനുസരിച്ച് അപ്പീല്‍ നല്‍കിയ 39 മരണങ്ങളും റിപ്പോര്‍ട്ട് ചെയ്തിട്ടുണ്ട്. ഇതോടെ സംസ്ഥാനത്തെ ആകെ മരണം 51,816 ആയി. നിലവില്‍ കോവിഡ് 2,64,638 കേസുകളില്‍, 3.5 ശതമാനം വ്യക്തികള്‍ മാത്രമാണ് ആശുപത്രി/ഫീല്‍ഡ് ആശുപത്രികളില്‍ പ്രവേശിപ്പിക്കപ്പെട്ടിട്ടുള്ളത്.