പേട്ടയില്‍ പെണ്‍സുഹൃത്തിന്റെ വീട്ടില്‍ വെച്ച് ഡിഗ്രി രണ്ടാം വര്‍ഷ വിദ്യാര്‍ത്ഥി അനീഷ് ജോര്‍ജിനെ (19) കൊലപ്പെടുത്തിയ കേസില്‍ പ്രതിയെ ഹാജരാക്കാന്‍ തിരുവനന്തപുരം അഡീ. ചീഫ് ജുഡീഷ്യല്‍ മജിസ്‌ട്രേട്ട് കോടതി ഉത്തരവിട്ടു..

പ്രതിയായ പെണ്‍ സുഹൃത്തിന്റെ പിതാവ് പ്രവാസിയായ പേട്ട ഏദന്‍ വീട്ടില്‍ സൈമണ്‍ ലാലയെന്ന ലാലനെ ഏപ്രില്‍ 19 ന് ഹാജരാക്കാന്‍ പേട്ട സര്‍ക്കിള്‍ ഇന്‍സ്‌പെക്ടറോടാണ് എ സി ജെ എം വിവിജ രവീന്ദ്രന്‍ ഉത്തരവിട്ടത്.

കൊലക്കേസ് വിചാരണക്കായി സെഷന്‍സ് കോടതിയില്‍ കമ്മിറ്റ് ചെയ്തയക്കുന്നതിന് മുന്നോടിയായി പ്രതിയുടെ ജാമ്യം പുതുക്കുന്നതിനും കുറ്റപത്ര പകര്‍പ്പും അനുബന്ധ രേഖകള്‍ക്ക് പകര്‍പ്പും പ്രതിക്ക് നല്‍കുന്നതിനായാണ് പ്രതിയെ കോടതി വിളിച്ചു വരുത്തുന്നത്.

ഇന്ത്യന്‍ ശിക്ഷാ നിയമത്തിലെ 341 (അന്യായമായി തടഞ്ഞു വെക്കല്‍) , 342 ( അന്യായ തടങ്കലില്‍ വക്കല്‍) , 302 ( കൊലപാതകം ) എന്നീ കുറ്റങ്ങള്‍ക്കാണ് കോടതി പ്രതിക്കെതിരെ കേസെടുത്തത്.

2021 ഡിസംബര്‍ 28 വെളുപ്പിനാണ് തലസ്ഥാനം നടുങ്ങിയ അരും കൊലപാതകം നടന്നത്. അനീഷ് രാത്രി 1.37 ന് ശേഷമാണ് പെണ്‍ സുഹൃത്തിന്റെ വീട്ടിലെത്തിയതെന്നാണ് പോലീസ് കേസ്. അനീഷിന്റെ ഫോണില്‍ നിന്ന് രാത്രി 1.37 വരെ പെണ്‍ സുഹൃത്തിന്റെ ഫോണിലേക്ക് കോളുകള്‍ വന്നിരുന്നു. ഇതിന് ശേഷമാണ് അനീഷ് ഈ വിട്ടിലേക്കെത്തിയത്.


വീടിന്റെ പിന്‍ഭാഗത്തു കൂടിയാണ് അനീഷ് ഇവിടേക്കെത്തിയത്. പ്രധാന റോഡ് ഒഴിവാക്കി പിന്നിലുള്ള കാടുകയറിയ പ്രദേശത്തു കൂടിയുള്ള വഴിയിലൂടെയാണ് എത്തിയതെന്ന് ഡോഗ് സ്‌ക്വാഡ് പരിശോധനയില്‍ വ്യക്തമായിരുന്നു.