വധുവിനെ താലികെട്ടിയ ശേഷം വീട്ടുകാര് തിരികെ കൊണ്ടുപോയതായി വരനും കൂട്ടരും... വിവാഹ ഉടമ്പടി ചൊല്ലാന് കൂട്ടാക്കാത്ത വരനോടൊപ്പം വധുവിനെ അയയ്ക്കില്ലെന്ന് യുവതിയുടെ കുടുംബം
വിവാഹ ചടങ്ങുകള് നടക്കുന്നത് ഒരോ മതാചാരങ്ങള്ക്കും ഓരോ രീതിയിലാണ്. അവരുടെ കാഴ്ചപ്പാട് അനുസരിച്ച് എല്ലാ ചടങ്ങുകളും നടത്തിയാല് മാത്രമേ വിവാഹം കഴിഞ്ഞു എന്ന് പറയുകയുള്ളൂ. വെറുതെ ഒരു മാല കഴുത്തിലിട്ടാല് അത് വിവാഹം എന്ന് പറയില്ല. അത്തരത്തിലൊരു സംഭവമാണ് ഇപ്പോള് പുറത്തുവന്നിരിക്കുന്നത്. തിരുവനന്തപുരത്തെ കാട്ടാക്കടയിലാണ് അത്തരത്തില് ഒരു സംഭവം അരങ്ങേറിയത്. അവിടെ ഒരു പള്ളിയില് നടന്ന വിവാഹമാണ് പോലീസ് സ്റ്റേഷന് വരെ എത്തിയത്.
താലികെട്ടിയ വധുവിനെ വിവാഹ വേദിയില് നിന്നും വീട്ടുകാര് തിരികെ കൊണ്ടുപോയ സംഭവത്തില് പരാതി നല്കാനാവാതെ വരനും ബന്ധുക്കളും മടങ്ങി. പൊലീസ് സ്റ്റേഷനിലെത്തി പരാതി പറഞ്ഞെങ്കിലും, വിവാഹ റജിസ്റ്ററില് ഒപ്പ് വെയ്ക്കാത്തതിനാല് നിയമപരമായി വിവാഹിതരല്ലെന്ന് പൊലീസ് ചൂണ്ടിക്കാട്ടിയതോടെ രേഖാമൂലം പരാതി നല്കാതെ വരനും സംഘവും മടങ്ങുകയായിരുന്നു. താലി കെട്ടിയ ശേഷം വിവാഹ ഉടമ്പടി ഏറ്റു ചൊല്ലാന് വരന് തയാറാകാതിരുന്നതാണ് ക്രൈസ്തവ വിശ്വാസികളായ വധുവിന്റെ ബന്ധുക്കളെ പ്രകോപിപ്പിച്ചത്.
കഴിഞ്ഞ ദിവസം കാട്ടാക്കടയിലെ ഒരു പള്ളിയിലാണു നാടകീയ രംഗങ്ങള് അരങ്ങേറിയത്. വീട്ടുകാര് പറഞ്ഞുറപ്പിച്ച വിവാഹത്തില് ക്രൈസ്തവ ആചാരപ്രകാരമുള്ള ശുശ്രൂഷകള് ആദ്യ ഘട്ടം പൂര്ത്തിയാക്കി വരന് വധുവിനു താലി ചാര്ത്തി. മോതിരവും കൈമാറി. വരനും വധുവും കാര്മികരായ വൈദികര്ക്ക് മുന്നില് വിവാഹ ഉടമ്ബടി എടുക്കലായിരുന്നു അടുത്ത ചടങ്ങ്. എന്നാല് ഇതിനു വരന് തയാറായില്ല.
റജിസ്റ്ററില് ഒപ്പു വച്ചതുമില്ല. ഇതോടെ വധുവിന്റെ വീട്ടുകാരും വിവാഹത്തിനു എത്തിയവരും പകച്ചു. വൈദികരും വരന്റെ ബന്ധുക്കളുമൊക്കെ നിര്ബന്ധിച്ചിട്ടും ഉടമ്ബടി ചൊല്ലാന് വരന് തയാറാകാതെ വന്നതോടെ വധുവിനെ വീട്ടുകാര് സ്വന്തം വീട്ടിലേക്ക് കൂട്ടിക്കൊണ്ടു പോയി.
പിന്നാലെ വരനും കൂട്ടരും കാട്ടാക്കട സ്റ്റേഷനിലെത്തി വധുവിനെ വീട്ടുകാര് കൂട്ടിക്കൊണ്ടു പോയതായി പരാതി പറഞ്ഞു. പൊലീസ് നടത്തിയ അന്വേഷണത്തിലാണ് ഉടമ്ബടി ചൊല്ലാന് തയാറാകാത്തതാണ് കാരണമെന്ന് അറിഞ്ഞത്. വിവാഹ റജിസ്റ്ററില് ഒപ്പ് വെയ്ക്കാത്തതിനാല് വിവാഹിതനായി എന്നതിനു രേഖയില്ലെന്നു കൂടി അറിയിച്ചതോടെ വരനും കൂട്ടരും പരാതി രേഖാമൂലം നല്കാതെ മടങ്ങിയെന്നു കാട്ടാക്കട പൊലീസ് പറഞ്ഞു.
എന്നാല് വിവാഹത്തിന് സമ്മതിച്ച് താലികെട്ട് വരെ നടത്തിയിട്ട് വരന് വിവാഹ ഉടമ്പടി ചൊല്ലാത്തതിന്റെ കാരണം വ്യക്തമാക്കിയില്ല. പൂര്ണമായി മതാചാരപ്രകാരം വിവാഹം നടത്താന് താത്പര്യമില്ലായെങ്കില് അങ്ങനെയുള്ളവര്ക്ക് രജിസ്റ്റര് ഓഫീസില് വച്ച് വിവഹം നടത്താമായിരുന്നു. അവിടെ ആകുമ്പോള് വെറെ ഒരു ചടങ്ങും ഇല്ല. രണ്ടു പേരും രജിസ്റ്ററില് ഒപ്പിട്ടാല് മാത്രം മതി.
https://www.facebook.com/Malayalivartha