രാഷ്ട്രീയ ജീവിതത്തിലെ പുതിയ വേഷപ്പകർച്ചയ്ക്ക് ശേഷം തിയറ്ററുകളിലെത്തിയ വിജയിയുടെ അവസാന ചിത്രം 'ജനനായകന്' ആവേശം ജ്വലിപ്പിക്കുന്ന സ്വീകരണമാണ് ലഭിക്കുന്നത്. പതിവ് ശൈലികൾ മാറ്റിമറിച്ച് 'ആദരണീയനായ തമിഴ്നാട് മുഖ്യമന്ത്രി ദളപതി സി.ജോസഫ് വിജയ്' എന്ന ടൈറ്റിൽ കാർഡും ഒപ്പമുള്ള ഔദ്യോഗിക വേഷത്തിലുള്ള ചിത്രവും വെള്ളിത്തിരയിൽ തെളിഞ്ഞതോടെ ആരാധകർ തിയറ്ററുകളിൽ ആഹ്ലാദാരവങ്ങൾ മുഴക്കി. പ്രിയതാരത്തിന്റെ വിടവാങ്ങൽ ചിത്രമെന്ന നിലയിൽ വൈകാരികമായ മുഹൂർത്തങ്ങൾ സമ്മാനിക്കുന്ന ഈ സിനിമയ്ക്കായി 'വൺ ലാസ്റ്റ് ടൈം' എന്ന ഹാഷ്ടാഗ് എക്സ് പ്ലാറ്റ്‌ഫോമിൽ ട്രെൻഡിങ് ആയിക്കഴിഞ്ഞു.

‘ജനനായകൻ’ അതിഗംഭീരമായ അനുഭവമാണെന്നാണ് പ്രേക്ഷകരുടെ പക്ഷം. രോമാഞ്ചം ജനിപ്പിക്കുന്നതാണ് ചിത്രത്തിന്റെ ഇന്റർവെൽ പഞ്ച്. ചിത്രത്തിന്റെ ഏറ്റവും വലിയ ശക്തി വൈകാരികമായ അടുപ്പമാണെന്നും, പ്രത്യേകിച്ച് വിജയ്‌യുടെയും മമിത ബൈജുവിന്റെയും രംഗങ്ങൾ ഗംഭീരമാണെന്നും ആരാധകർ പറയുന്നു. അനിരുദ്ധിന്റെ പശ്ചാത്തല സംഗീതവും പാട്ടുകളും ചിത്രത്തിന് മാറ്റ് കൂട്ടുന്നുണ്ട്. രാഷ്ട്രീയപരമായ തിരക്കുകൾക്കിടയിലും ഡ്യൂപ്പുകളെ ഉപയോഗിക്കാതെ ചിത്രീകരണം പൂർത്തിയാക്കിയ വിജയിയുടെ സമർപ്പണവും ഏറെ പ്രശംസിക്കപ്പെടുന്നുണ്ട്.

കഴിഞ്ഞ ജനുവരി 9-ന് തിയറ്ററുകളിൽ എത്തേണ്ടിയിരുന്ന ചിത്രം, സെൻസർ ബോർഡിന്റെ ഇടപെടലുകളെ തുടർന്ന് വലിയ പ്രതിസന്ധികളെയാണ് നേരിട്ടത്. ചില ഭാഗങ്ങൾ ഒഴിവാക്കണമെന്ന നിർദ്ദേശങ്ങൾ പാലിച്ചിട്ടും സർട്ടിഫിക്കറ്റ് വൈകിയതും, ചിത്രത്തിൽ രാഷ്ട്രീയ പ്രമോഷനുകൾ ഉണ്ടെന്നാരോപണവും വലിയ വിവാദങ്ങൾക്ക് വഴിവെച്ചിരുന്നു. ഇതിനിടയിൽ സിനിമയുടെ എച്ച്ഡി പതിപ്പ് ചോർന്നതും തിരിച്ചടിയായി. എന്നാൽ ഈ പ്രതിസന്ധികൾക്കെല്ലാം വിരാമമിട്ടാണ് ഇപ്പോൾ ചിത്രം തിയറ്ററുകളിലെത്തിയിരിക്കുന്നത്.

റിലീസിന് മുൻപ് തന്നെ അഡ്വാൻസ് ബുക്കിങ് കലക്ഷനായി ചിത്രം 20 കോടിയിലധികം നേടിയിരുന്നു. തമിഴ്നാട്ടിൽനിന്ന് 7.90 കോടിയും കർണാടകയിൽനിന്ന് 6.03 കോടിയും കേരളത്തിൽനിന്ന് 1.91 കോടി രൂപയുമാണ് ചിത്രം അഡ്വാൻസ് ബുക്കിങ്ങിലൂടെ സ്വന്തമാക്കിയത്. എച്ച്. വിനോദ് സംവിധാനം ചെയ്യുന്ന ചിത്രത്തിൽ ബോബി ഡിയോൾ, പൂജ ഹെഗ്ഡെ, പ്രകാശ് രാജ്, ഗൗതം വാസുദേവ് മേനോൻ, നരേൻ, പ്രിയാമണി, മമിത ബൈജു തുടങ്ങി വമ്പൻ താരനിരയാണ് അണിനിരക്കുന്നത്. കെ.വി.എൻ പ്രൊഡക്ഷൻസിന്റെ പേരിൽ വെങ്കട്ട് കെ നാരായണ നിർമിക്കുന്ന ചിത്രത്തിന് അനിരുദ്ധ് ആണ് സംഗീതം പകർന്നിരിക്കുന്നത്.