കോഴിയിറച്ചിയുടെ വിലയിൽ വർദ്ധനവ്. കോഴിത്തീറ്റയുടെ വിലവദ്ധിച്ചതാണ് ഇറച്ചിക്ക് വില കുത്തനെ ഉയരാൻ കാരണമായത്. ഇതോടെ വിൽപനയും ഇടിഞ്ഞു. കോഴിത്തീറ്റ ഒരു ചാക്കിന് 500 രൂപയുടെ വർദ്ധനയാണ് ഉണ്ടായത്. ഇതോടെ 1,350 രൂപയുണ്ടായിരുന്ന 50 കിലോഗ്രാമിന്റെ ഒരു ചാക്ക് കോഴിത്തീറ്റയ്ക്ക് 1,850 രൂപയായി. ഇതോടെ കോഴിയിറച്ചി വില കിലോയ്ക്ക് 240 മുതൽ 250 രൂപ വരെയാണ് വില.

തീറ്റയുണ്ടാക്കാനുള്ള അസംസ്‌കൃതവസ്തുക്കളായ ചോളം, സോയാബീൻ, ഗോതമ്പ്, ഉണക്കമീൻ തുടങ്ങിയവ കിട്ടാനില്ലാത്തതാണ് വില വർദ്ധിക്കാൻ ഇടയാക്കിയതെന്നാണ് സൂചനകളുള്ളത്. ചോളവും മറ്റും എഥനോൾ നിർമാണത്തിന് വഴിതിരിച്ചുവിടുന്നതും തിരിച്ചടിയാകുന്നുവെന്നാണ് വിലയിരുത്തപ്പെടുന്നത്.

മഴ കുറഞ്ഞതിനാൽ ഈ വർഷം ഉത്പാദനം കുറയുമെന്ന ഭീതിയുമുണ്ട്. ഇറച്ചിക്ക് പിന്നാലെ കോഴിമുട്ടയുടെ വില 8.50 രൂപയായും ഉയരുകയായിരുന്നു.