മാലിന്യ മുക്തം നവകേരളം പദ്ധതിയുടെ ഭാഗമായി ചെങ്ങോട്ടുകാവ് ഗ്രാമ പഞ്ചായത്തിൽ നടപ്പാക്കുന്ന 'ചേലോടെ ചെങ്ങോട്ടുകാവ് ' മാലിന്യമുക്ത കർമ്മ പദ്ധതിയുടെ വിദഗ്ധ സമിതി യോഗം ചേർന്നു. സുസ്ഥിര മാലിന്യ പരിപാലന സംവിധാനങ്ങൾ ശക്തിപ്പെടുത്തി 'ചേലോടെ ചെങ്ങോട്ടു കാവ് എന്ന പദ്ധതി വിജയിപ്പിക്കാൻ പഞ്ചായത്ത് ഹാളിൽ ചേർന്ന മാലിന്യമുക്തം നവകേരളം വിദഗ്ധ സമിതിയോഗം തീരുമാനിച്ചു.

ക്യാമ്പയിനിന്റെ ഇതുവരെ നടന്ന പ്രവർത്തനങ്ങൾ വിലയിരുത്തി പോരായ്മകൾ പരിഹരിക്കാനുള്ള കർമപദ്ധതി യോഗത്തിൽ ചർച്ച ചെയ്തു. പദ്ധതികൾ സമയബന്ധിതമായി നടപ്പാക്കാനും വിലയിരുത്താനുമുള്ള മോണിറ്ററിംഗ് സമിതിക്ക് രൂപം നൽകി.

17 വാർഡുകളെയും 150 ൽ പരം അയൽക്കൂട്ടങ്ങളെയും സന്നദ്ധ സാമൂഹ്യ സംഘടനകൾ, വിദ്യാലയങ്ങൾ, റസിഡൻസ് അസോസിയേഷനുകൾ എന്നിവരുടെയെല്ലാം പങ്കാളിത്തത്തോടെയുള്ള സമഗ്രമായ മാലിന്യ പരിപാലന പരിപാടിയാണ് പഞ്ചായത്തിൽ നടപ്പാക്കാനുദ്ദേശിക്കുന്നത്. ഇതിനായി വിവിധ കമ്മിറ്റികൾക്ക് യോഗത്തിൽ രൂപം നൽകി.

യോഗത്തിൽ ഐ ആർ ടി സി ഹരിത സഹായ സംഘം റീജിനൽ കോ ഓഡിനേറ്റർ ജയ്സോമനാഥൻ ആമുഖാവതരണം നടത്തി. ചെങ്ങോട്ട്കാവ് ഗ്രാമപഞ്ചായത്ത് പ്രസിഡന്റ് ഷീബ മലയിൽ അധ്യക്ഷത വഹിച്ചു. വൈസ് പ്രസിഡൻറ് പി വേണു, ബ്ലോക്ക് പഞ്ചായത്ത് മെമ്പർ ഇ കെ ജുബീഷ്, ആരോഗ്യ വിദ്യാഭ്യാസ സ്റ്റാൻഡിംഗ് കമ്മറ്റി അധ്യക്ഷ ബിന്ദു മുതിരക്കണ്ടത്തിൽ, ആസൂത്രണ സമിതി ഉപാധ്യക്ഷൻ കെ ടി രാധാകൃഷ്ണൻ, സെക്രട്ടറി എൻ പ്രദീപൻ , എച്ച് എം എം.ജി ബൽരാജ്, ആസൂത്രണ സമിതി അംഗം ഇ നാരായണൻ തുടങ്ങിയവർ സംസാരിച്ചു.