21കാരനെ വീട്ടിനുള്ളില്‍ ദുരൂഹസാഹചര്യത്തില്‍ മരിച്ചനിലയില്‍ കണ്ടെത്തിയ സംഭവത്തില്‍ ദൂരൂഹത നീങ്ങി. ചിതറ ചല്ലിമുക്ക് സൊസൈറ്റിയില്‍ ആദര്‍ശിനെ (21) കൊലപ്പെടുത്തിയ സംബവത്തില്‍ മാതാപിതാക്കളെയും സഹോദരനെയും പോലീസ് അറസ്റ്റ് ചെയ്തു. ആദര്‍ശിനെ മരിച്ച നിലയില്‍ കണ്ടെത്തിയതിന് പിന്നാലെ തന്നെ മൂവരെയും പൊലീസ് കസ്റ്റഡിയിലെടുത്തിരുന്നു. പോസ്റ്റുമോര്‍ട്ടം റിപ്പോര്‍ട്ട് പുറത്തുവന്നതോടെ കൊലപാതകം സ്ഥിരീകരിക്കുകയായിരുന്നു. പിന്നാലെ തന്നെ മൂവരെയും കൊലക്കുറ്റം ചുമത്തി അറസ്റ്റ് ചെയ്തു.

ആദര്‍ശിന്റെ അച്ഛന്‍ തുളസീധരന്‍, അമ്മ മണിയമ്മാള്‍, സഹോദരന്‍ അഭിലാഷ് എന്നിവരാണ് അറസ്റ്റിലായത്. മദ്യപിച്ച് സ്ഥിരം പ്രശ്‌നമുണ്ടാക്കി വരുന്ന ആദര്‍ശിനെ മൂവരും ചേര്‍ന്ന് കെട്ടിയിട്ട് കഴുത്തില്‍ കയര്‍ മുറുക്കി കൊലപ്പെടുത്തുകയായിരുന്നു. ഞായറാഴ്ച രാത്രിയാണ് ആദര്‍ശിനെ മരിച്ച നിലയില്‍ വീട്ടില്‍ നിന്നും കണ്ടെത്തിയത്. ആദര്‍ശിന്റെ അമ്മ മണിയമ്മയാണ് മകന്റെ മരണവിവരം നാട്ടുകാരില്‍ ചിലരെ വിളിച്ച് അറിയിച്ചത്.

കഴിഞ്ഞ ദിവസം ആദര്‍ശ് മറ്റൊരിടത്ത് പോയി പ്രശ്‌നമുണ്ടാക്കിയിരുന്നു. തുടര്‍ന്ന് തുളസീധരന്‍ മകനെ വിളിച്ചുകൊണ്ടുവന്നിരുന്നു. എന്നാല്‍ തിരികെയെത്തിയ ആദര്‍ശ് വീട്ടിലും വധഭീഷണി മുഴക്കി. പിന്നാലെ മൂന്ന് പ്രതികളും ചേര്‍ന്ന് ആദര്‍ശിനെ കെട്ടിയിട്ട് കഴുത്ത് ഞെരിച്ച് കൊലപ്പെടുത്തുകയായിരുന്നു. വീട്ടില്‍ അടുക്കളയോട് ചേര്‍ന്നുള്ള മുറിയിലാണ് ആദര്‍ശിന്റെ മൃതദേഹം കണ്ടത്. കൊലപാതകമാണെന്ന നിഗമനത്തില്‍ ആദര്‍ശിന്റെ സഹോദരനെയും മാതാപിതാക്കളെയും പൊലീസ് കസ്റ്റഡിയിലെടുത്ത് ചോദ്യം ചെയ്തിരുന്നു.