ബൈക്ക് അപകടത്തില്‍ ഗുരുതര പരിക്കേറ്റതോടെ ജീവന്‍രക്ഷിക്കാനായി റോഡില്‍ തന്നെ ശസ്ത്രക്രിയയ്ക്ക് വിധേയനായ ലിനു(40) ചികിത്സയിലിരിക്കെ മരിച്ചു. ബൈക്ക് അപകടത്തില്‍ പെട്ട് ഗുരുതരാവസ്ഥയിലായ കൊല്ലം സ്വദേശിയായ ലിനുവിന്റെ ജീവന്‍ രക്ഷിക്കാന്‍ യുവഡോക്ടര്‍മാര്‍ നടുറോഡില്‍ ശസ്ത്രക്രിയ നടത്തിയത് ശ്രദ്ധേയമായിരുന്നു. ശേഷം ഉടന്‍ കൊച്ചിയിലെ സ്വകാര്യ ആശുപത്രിയില്‍ എത്തിച്ചെങ്കിലും പരിക്ക് ഗുരുതരമായിരുന്നതിനാല്‍ അന്ത്യം സംഭവിക്കുകയായിരുന്നു.

കൊച്ചി ഉദയംപേരൂരില്‍ വച്ചാണ് അപകടമുണ്ടായത്. മൂന്നുപേര്‍ക്കായിരുന്നു അപകടത്തില്‍ പരിക്കേറ്റത്. അപകടത്തിലുണ്ടായ പരിക്കിനെ തുടര്‍ന്ന് ശ്വാസകോശത്തില്‍ രക്തവും മണ്ണും കയറി ശ്വസനം തടസപ്പെട്ടതിനാലാണ് ലിനുവിന് അടിയന്തര ശസ്ത്രക്രിയ നല്‍കാന്‍ ഡോക്ടര്‍മാര്‍ തീരുമാനിച്ചത്. ആവശ്യത്തിനുള്ള മെഡിക്കല്‍ ഉപകരണങ്ങള്‍ ലഭ്യമല്ലാതിരുന്ന സാഹചര്യത്തില്‍ നാട്ടുകാര്‍ സംഘടിപ്പിച്ചുനല്‍കിയ ബ്ലേയ്ഡും പേപ്പര്‍ സ്‌ട്രോയും ഉപയോഗിച്ചാണ് ശസ്ത്രക്രിയ നടത്തിയത്.

ആശുപത്രി ഡ്യൂട്ടിക്ക് ശേഷം ക്രിസ്മസ് ആഘോഷിക്കാനായി തെക്കന്‍ പറവൂരിലെ സെയ്ന്റ് ജോണ്‍സ് ദി ബാപ്റ്റിപസ് പള്ളിയിലേക്ക് പോകുകയായിരുന്നു ഡോക്ടര്‍ തോമസ് പീറ്ററും ഭാര്യ ദിദിയയും. പള്ളിയിലെത്തുന്നതിന് കുറച്ച് മുന്‍പായി അപകടത്തില്‍ പരക്കേറ്റ് കിടക്കുന്ന യുവാക്കളെ കാണാന്‍ ഇടയായി. അതിലൊരാള്‍ ഗുരുതര പരിക്കുകളില്ലാതെ എഴുന്നേറ്റ് നില്‍ക്കുന്നുണ്ടായിരുന്നു. മറ്റൊരാളുടെ വായില്‍ നിന്ന് രക്തം വരുന്നുണ്ടെങ്കിലും അയാള്‍ സംസാരിക്കുന്നുണ്ടായിരുന്നു.

എന്നാല്‍ മൂന്നാമനായ ലിനുവിന്റെ അവസ്ഥ ഗുരുതരമായിരുന്നു. മുഖത്തും മറ്റും പരക്കേറ്റ് രക്തം വാര്‍ന്നുപോകുന്നുണ്ടായിരുന്നു. അയാളുടെ കഴുത്ത് ഒരാള്‍ പ്രത്യേക രീതിയില്‍ പിടിച്ചിരിക്കുന്നത് മാത്യുവും ദിദിയയും ശ്രദ്ധിച്ചു. പരിചരിക്കുന്ന രീതിയില്‍ നിന്ന് അതൊരു ഡോക്ടറാണെന്ന് ഇരുവര്‍ക്കും മനസിലായി. ആശുപത്രിയില്‍ എത്തുന്നതുവരെ യുവാവിന്റെ ജീവന്‍ നിലനില്‍ക്കില്ലെന്ന് മനസിലായതിനാല്‍ മൂന്ന് ഡോക്ടര്‍മാരും ചേര്‍ന്ന് റോഡരികില്‍ തന്നെ ശസ്ത്രക്രിയ നടത്തുകയായിരുന്നു. മൊബൈല്‍ വെളിച്ചത്തിലായിരുന്നു ശസ്ത്രക്രിയ.