തിരുവനന്തപുരം കോര്‍പ്പറേഷനിലെ മേയറും ബിജെപി നേതാവുമായ വി വി രാജേഷിനെ താന്‍ ഫോണില്‍ വിളിച്ച് അഭിനന്ദനം അറിയിച്ചു എന്ന തരത്തില്‍ പ്രചരിക്കുന്ന വാര്‍ത്ത തെറ്റാണെന്ന് മുഖ്യമന്ത്രി പിണറായി വിജയന്‍. ഇന്നുരാവിലെ വി വി രാജേഷ് മുഖ്യമന്ത്രിയോട് സംസാരിക്കാന്‍ പേഴ്‌സണല്‍ അസിസ്റ്റന്റിനെ വിളിച്ചിരുന്നു. ആ സമയത്ത് മുഖ്യമന്ത്രിയുടെ അടുത്ത് ഇല്ലാതിരുന്നതിനാല്‍ പിന്നീട് കണക്ട് ചെയ്യാം എന്ന് പി എ അറിയിച്ചു. അതുകഴിഞ്ഞ് പി എ വിളിച്ച് കണക്ട് ചെയ്യുകയായിരുന്നു എന്നാണ് മുഖ്യമന്ത്രിയുടെ ഓഫീസില്‍ നിന്നുള്ള വാര്‍ത്താകുറിപ്പില്‍ പറയുന്നത്.

താന്‍ മേയറായി തിരഞ്ഞെടുക്കപ്പെടാന്‍ പോവുകയാണെന്നും അത് കഴിഞ്ഞ് നേരിട്ട് വന്നു കാണാമെന്നും രാജേഷ് മുഖ്യമന്ത്രിയോട് പറഞ്ഞു. ആവട്ടെ; അഭിനന്ദനങ്ങള്‍ എന്ന് മുഖ്യമന്ത്രി പ്രതികരിക്കുകയും ചെയ്തു. എന്നാല്‍, പിന്നീട് പ്രചരിപ്പിക്കപ്പെട്ട വാര്‍ത്ത വി വി രാജേഷിനെ മുഖ്യമന്ത്രി വിളിച്ച് ആശംസകള്‍ അറിയിച്ചു എന്നാണ്. ഇത് വസ്തുതാ വിരുദ്ധവും തെറ്റിദ്ധാരണ സൃഷ്ടിക്കുന്നതുമാണെന്നും വാര്‍ത്താകുറിപ്പില്‍ പറയുന്നുണ്ട്.

ഇന്ന് നടന്ന മേയര്‍ തിരഞ്ഞെടുപ്പില്‍ 51 വോട്ടുകള്‍ നേടിയാണ് വിവി രാജേഷ് മേയറായത്. ബിജെപിയുടെ 50 വോട്ടുകളും കണ്ണമ്മൂല കൗണ്‍സിലറും സ്വതന്ത്രനുമായ രാധാകൃഷ്ണന്റെ വോട്ടുമാണ് വിവി രാജേഷിന് ലഭിച്ചത്. കൊടുങ്ങാനൂര്‍ വാര്‍ഡില്‍ നിന്ന് വിജയിച്ച വി വി രാജേഷിനെ ദീര്‍ഘനാളത്തെ ചര്‍ച്ചകള്‍ക്കൊടുവിലാണ് പാര്‍ട്ടി മേയര്‍ സ്ഥാനത്തേക്ക് തീരുമാനിച്ചത്. മുന്‍ ഡിജിപി ആര്‍ ശ്രീലേഖയുടെ പേരും പരിഗണനയിലുണ്ടായിരുന്നു. എന്നാല്‍, രാഷ്ട്രീയ പരിചയം മുന്‍നിര്‍ത്തി രാജേഷിനെ മേയര്‍ സ്ഥാനത്തേക്ക് നിര്‍ദേശിക്കുകയായിരുന്നു. ആശാനാഥ് ആണ് ബിജെപിയുടെ ഡെപ്യൂട്ടി മേയര്‍.