ആണ്‍കൂട്ടത്തിന്റെ വെര്‍ബല്‍ ഗ്യാംഗ്‌റേപ്പിന് അങ്ങനെ വര്‍ഗ്ഗ/ ശ്രേണീ വ്യത്യാസമൊന്നുമില്ലെന്നും സമൂഹത്തിന്റെ താഴെത്തട്ടു മുതല്‍ അങ്ങ് നിയമനിര്‍മ്മാണ സഭ വരെ 'ഒരു ഹൃദയം ഒരുമാനസം ഒരേ വികാരമായി അതങ്ങനെ കിടക്കുകയാണെന്ന് കാട്ടി രാജീവ് രാമചന്ദ്രന്‍ എന്നയാള്‍ എഴുതിയ കുറിപ്പ് സമൂഹമാധ്യമങ്ങളില്‍ വൈറലാകുന്നു...

നേരിട്ട് അനുഭവമുള്ള മൂന്ന് കഥകള്‍ പറയാം

ഒന്ന് 1995-1996

കേരളത്തിലെ ഒരു എംഎല്‍എ അദ്ദേഹത്തിന്റെ പൂര്‍വാശ്രമത്തില്‍ സഹപ്രവര്‍ത്തകയെ നോക്കി 'അവിവാഹിതയായ അമ്മ'യാണെന്ന് തോന്നുന്നു എന്ന് അടുത്തിരിക്കുന്ന ഞങ്ങളോട് അടക്കം പറഞ്ഞത് കേട്ടപ്പോള്‍ അന്ന് ചെറുതായി ഞെട്ടിയിരുന്നു. നിങ്ങളെന്താണീ പറയുന്നതെന്ന് അത്ഭുതപ്പെട്ടപ്പോള്‍ 'അമ്മിഞ്ഞ കണ്ടാലറിഞ്ഞൂടേ' എന്ന് വിശദീകരിക്കാനും അദ്ദേഹത്തിന് മടിയുണ്ടായില്ല. 'നിങ്ങളതും നോക്കിയിരിക്കുകയാണോ?' എന്ന് മുഷിഞ്ഞ് ചോദിച്ചപ്പോള്‍, 'ഒരു തമാശയല്ലേടോ...നീയൊക്കെ 
ഫെമിനിസ്റ്റാണെന്നത് അറിഞ്ഞിേേല്ലയെന്ന്' പൊട്ടിച്ചിരിച്ച് ഇറങ്ങിപ്പോയി.

രണ്ട് 2002-2003

കുഞ്ഞുങ്ങള്‍ക്ക് 'ഒരു കപ്പ് പാലും ഷെയ്ക്ക് ഹാന്‍ഡു'മെന്ന ആന്റണി സര്‍ക്കാര്‍ കാലത്തെ 
പദ്ധതിയെ കുറിച്ചുള്ള ചര്‍ച്ചക്കു ശേഷം സഭയില്‍ നിന്നിറങ്ങിവരുന്ന അന്നത്തെ ഒരു മുതിര്‍ന്ന വനിതാ എംഎല്‍എയുടെ അടുത്തുവന്ന് 'അമ്മക്കൊരുമ്മേം കുഞ്ഞിക്കൊരു ഷേക്കഹാന്‍ഡുമായിരുന്നേല്‍ ഉദ്ഘാടനത്തിനൊക്കെ ഒരു രസമുണ്ടായിരുന്നു' എന്ന് വിടന്റെ ചിരിയോടെ പറയുന്ന മറ്റൊരു എം എഎല്‍എ

മൂന്ന് 2011 -2012

പല നിലയിലും പ്രശസ്തനായ മറ്റൊരു എംഎല്‍എക്കെതിരെ സഹപ്രവര്‍ത്തക ഒരു ആരോപണം ഉന്നയിച്ചപ്പോളുണ്ടായ പ്രതികരണം. 'ഓ, കയ്യേ കേറീ പിടിച്ചെന്നോ മറ്റോ ആണത്രെ പരാതി. കയ്യേലല്ല എവിടെ പിടിച്ചാലും ഒരു പ്രശ്‌നോമില്ലാത്ത ടീമാരുന്നു, ഇപ്പൊ ഞാനല്പം തളര്‍ന്നു നിക്കുവാന്നല്ലോ, അതിന്റെയാ'...

എണ്‍പതു കഴിഞ്ഞ കെ ആര്‍ ഗൗരിയമ്മ സഭയില്‍ പ്രസംഗിക്കുമ്പോള്‍, വഴങ്ങിക്കൊടുക്കൂ ഗൗരിയമ്മേ എന്ന് ഊളച്ചിരിയോടെ പരസ്യമായി ദ്വയാര്‍ത്ഥം പ്രയോഗിക്കുന്ന അശ്ലീലമൊക്കെ വരുന്നത് അസ്തമനക്കിളികളുടെ മനോ നിലയുടെ എക്സ്റ്റന്‍ഷനായിട്ടാണ്.

ഇതിലൊന്നും ഭരണപ്രതിപക്ഷ ഭേദമില്ല എന്ന് പറയേണ്ടതില്ലല്ലോ എന്ന് പറഞ്ഞാണ് കുറിപ്പ് അവസാനിക്കുന്നത്.