തലശ്ശേരി ബ്രണ്ണന്‍ കോളേജിലെ എല്ലാവരുടേയും പ്രിയങ്കരനായിരുന്ന വിദ്യാര്‍ത്ഥി പ്രവര്‍ത്തകനായിരുന്നു അതുല്‍ ശശിധരന്‍. സംഘാടകന്‍, എല്ലാവരുടേയും കൂട്ടുകാരന്‍, സര്‍വകലാശാലാ യൂണിയന്‍ കൗണ്‍സിലര്‍. കാമ്പസില്‍ നിന്നുതന്നെ ജീവിതപങ്കാളിയേയും കണ്ടെത്തി. പഠനത്തിന് ശേഷം ജ്വല്ലറി തൊഴിലാളിയായി. നാലരയും ഒന്നരയും വയസ്സുള്ള രണ്ട് കുഞ്ഞുങ്ങളും ഭാര്യയും അമ്മയും രണ്ട് സഹോദരിമാരുമുള്ള കുടുംബത്തിന്റെ ആശ്രയമായി. കൊച്ചുകൊച്ച് സന്തോഷങ്ങളും സങ്കടങ്ങളുമൊക്കെയായി ജീവിതം ഒഴുകിക്കൊണ്ടിരുന്നതിടയിലാണ് അതുലിനെ രോഗം കീഴടക്കിയത്.

രണ്ട് വൃക്കകളുടേയും പ്രവര്‍ത്തനം തകരാറിലായ അതുല്‍ ഇപ്പോള്‍ കോഴിക്കോട് മെഡിക്കല്‍ കോളേജില്‍ ചികിത്സയിലാണ്. അടിയന്തിരമായി വൃക്ക മാറ്റിവച്ചാലേ അതുലിന്റെ ജീവന്‍ രക്ഷിക്കാനാകൂ എന്ന് ഡോക്ടര്‍മാര്‍ ഉറപ്പിച്ചു. തുടര്‍ച്ചയായ ഡയാലിസിസ് കൊണ്ടാണ് ഇപ്പോള്‍ അതുലിന്റെ ജീവര്‍ പിടിച്ചുനിര്‍ത്തുന്നത്. വൃക്ക നല്‍കാന്‍ അമ്മ തയ്യാറാണ്. പക്ഷേ ശസ്ത്രക്രിയക്കും തുടര്‍ചികിത്സക്കുമായി ഇരുപത് ലക്ഷത്തോളം രൂപ വേണം. അത് അതുലിന്റെ കുടുംബത്തിന് താങ്ങാവുന്നതിനും എത്രയോ ഇരട്ടി മേലെയുള്ള തുകയാണ്. എത്രയും പെട്ടെന്ന് ശസ്ത്ക്രിയ നടത്തണമെന്ന് ഡോക്ടര്‍മാര്‍ കഴിഞ്ഞ ദിവസം ആവര്‍ത്തിച്ച് അറിയിക്കുകയും ചെയ്തു. മാസങ്ങള്‍ നീണ്ട ചികിത്സ ഉണ്ടാക്കിയ സാമ്പത്തിക ബാധ്യത കൊണ്ടുതന്നെ വലയുകയാണ് അതുലിന്റെ കുടുംബം.

ബ്രണ്ണന്‍ കോളേജിലെ അതുലിന്റെ സഹപാഠികളും അധ്യാപകരും ചേര്‍ന്ന് മൂന്ന് ലക്ഷത്തോളം രൂപ സ്വരൂപിച്ചിട്ടുണ്ട്. സ്വദേശത്തും വിദേശത്തുമുള്ള സുഹൃത്തുക്കളും സഹപാഠികളും അധ്യാപകരും അവരുടെ പ്രിയപ്പെട്ടവനെ ജീവിതത്തിലേക്ക് തിരിച്ചുപിടിക്കാന്‍ ആവുംവിധമെല്ലാം പരിശ്രമിക്കുന്നുണ്ട്. പക്ഷേ കുറഞ്ഞ ദിവസങ്ങള്‍ക്കുള്ളില്‍ ഇരുപത് ലക്ഷം രൂപ ഉണ്ടാക്കാന്‍ അവര്‍ക്ക് സുമനസ്സുകളുടെ സഹായം കൂടി വേണം. എസ്ബിഐയുടെ ചെറുപുഴ ബ്രാഞ്ചില്‍ അതുലിന് വേണ്ടി കൈകോര്‍ത്തവര്‍ ഒരു അക്കൗണ്ട് തുടങ്ങിയിട്ടുണ്ട്.
അതുല്‍ ശശിധരന്‍
അക്കൗണ്ട് നമ്പര്‍: 67145631183
ഐഫ്എസി; എസ്ബിഐന്‍ 0070812
എസ് ബി ഐ ചെറുപുഴ ബ്രാഞ്ച്‌