കെ.മുരളീധരനെതിരെ ഒളിയമ്പെയ്ത ജോസഫ് വാഴയ്ക്കനെതിരെ പരോക്ഷവിമര്‍ശനവുമായി സഹോദരിയും കോണ്‍ഗ്രസ് നേതാവുമായ പത്മജ വേണുഗോപാല്‍ രംഗത്തെത്തി. രണ്ടു ദിവസമായി ചാനല്‍ ചര്‍ച്ചകളില്‍ മുരളിയേട്ടനെ പറ്റി പലരും വിമര്‍ശിച്ചു കണ്ടു .അതിനുള്ള മറുപടി അല്ല .പക്ഷെ മരിച്ചു പോയ ഞങ്ങളുടെ അച്ഛനെ ഇതില്‍ വലിച്ചു ഇഴക്കേണ്ട കാര്യം ഇല്ല. ഒരു വീടാകുമ്പോള്‍ ചില ഇണക്കങ്ങളും പിണക്കങ്ങളും ഉണ്ടാകും.ഞങ്ങളുടെ വീടായതു കൊണ്ട് അതിനു കൂടുതല്‍ ശ്രദ്ധ കിട്ടി എന്ന് മാത്രം.

ഒരു കാര്യം ഞാന്‍ പറയാം. ഈ പറയുന്ന ആളുകളുടെ ചരിത്രം പലതും ഞങ്ങള്‍ പറയാന്‍ തുടങ്ങിയാല്‍ അത് അവര്‍ക്കു ബുദ്ധിമുട്ടാകും.ദയവു ചെയ്തു അത് പറയിപ്പിക്കരുത്.എന്തായാലും ഈ ആളുകള്‍ വേദനിപ്പിച്ചതിന്‌ടെ പകുതി മുരളിയേട്ടന്‍ അച്ഛനെ വേദനിപ്പിച്ചിട്ടില്ല.ഞങ്ങളുടെ അച്ഛനെ കുറെ വേദനിപ്പിച്ചതല്ലേ? ഇനി മകനെ വെറുതെ വിട്ടു കൂടെ? എന്ന് പത്മജ ഫെയിസ്ബുക്കിലൂടെ ചോദിക്കുന്നു.

രമേശ് ചെന്നിത്തലയുടെ വീടിരിക്കുന്ന ബൂത്തില്‍ യു.ഡി.എഫിന് വോട്ട് കുറഞ്ഞതിനെ കെ. മുരളീധരന്‍ പരിഹസിച്ചിരുന്നു. തുടര്‍ന്ന്, സ്വന്തം അച്ഛനെ ചൊറിഞ്ഞിട്ടുള്ള ആളെ നമ്മള്‍ നന്നാക്കണമെന്ന് വിചാരിച്ചാല്‍ നടക്കുമോ ? ഇത്തവണ ബൂത്തിലെ റിസല്‍ട്ടായിരുന്നു വിഷയം.തന്റെ ബൂത്ത് ഭദ്രമാണെന്നാണ് ചൊറിച്ചലിന്റെ ഭാഗമായി അവകാശപ്പെട്ടത്.കേരളത്തില്‍ ഒരുപാട് സ്ഥലത്ത് മത്സരിച്ചത് കൊണ്ട് അദ്ധേഹത്തിന്റെ ബൂത്ത് ഏതാണെന്ന് ആര്‍ക്കും നിശ്ചയമില്ല.നമുക്കറിയാവുന്ന ബൂത്തിലൊക്കെ പാര്‍ട്ടിയുടെ സ്ഥിതി ദയനീയമാണ്- എന്ന് ജോസഫ് വാഴയ്ക്കന്‍ ഫെയിസ് ബുക്ക് പോസ്റ്റിട്ടു. പോസ്റ്റില്‍ കരുണാകരനെ കുറിച്ച് പരാമര്‍ശം ഉണ്ടായതിനെ തുടര്‍ന്നാണ് മകള്‍ പത്മജ രംഗത്തെത്തിയത്. 

രാജ്യസഭാ സീറ്റിലേക്ക് ആരു വേണം ആര് വേണ്ട എന്ന് തീരുമാനിക്കാന്‍ കഴിയുന്ന രാഹുല്‍ജിയെ പോലുള്ള ഒരു യുവ നേതൃത്വം ഇന്ന് കോണ്‍ഗ്രസിന് ഉണ്ട്.അത് കൊണ്ട് എല്ലാവരും കാത്തിരിക്കണമെന്നും പത്മജ ആവശ്യപ്പെട്ടു. കോണ്‍ഗ്രസ് ഒരിക്കലും തകരില്ല .ഒരു തോല്‍വി തീര്‍ച്ചയായും ചിന്തിക്കേണ്ട കാര്യമാണ്.പക്ഷെ അത് ഒരിക്കലും അവസാന വാക്കല്ല .ഒറ്റ കാര്യം ചെയ്താല്‍ ഈ പാര്‍ട്ടി രക്ഷപെടും. ഗ്രൂപ്പ് നേതാക്കന്മാര്‍ തങ്ങളുടെ വീട്ടില്‍ ഡ്രൈവര്‍ ജോലിക്കും മറ്റു അത്യാവശ്യ പണികള്‍ക്കും നില്‍ക്കുന്നവരെ പാര്‍ട്ടി ഭാരവാഹികള്‍ ആക്കാതിരിക്കുക .പാര്‍ട്ടി പരിപാടികള്‍ നടത്താന്‍ അറിയുന്നവര്‍ ആ പണി ഏല്‍പ്പിക്കുക. പണി ചെയ്യുന്നവനെ നിരുത്സാഹപ്പെടുത്താതിരിക്കുക .ഒരു യഥാര്‍ത്ഥ പ്രവര്‍ത്തകന്‍ വളരെ അപൂര്‍വമായി മാത്രമേ ഒരു നേതാവിന്റെ വീട്ടില്‍ കാണു .കാരണം അയാള്‍ എപ്പൊഴും ഫീല്‍ഡില്‍ ആയിരിക്കും