10 മാസത്തെ അസ്വാസ്ഥ്യങ്ങള്‍ക്ക് അറുതിവരുത്തി പാംഗോങ് തടാകത്തിന്റെ വടക്കന്‍ ഭാഗത്ത് നിന്ന് ചൈനീസ് സൈന്യം പിന്മാറി തുടങ്ങി. ഈ 10 മാസത്തിനിടെ ഒമ്പത് തവണയാണ് ഇന്ത്യയും ചൈനയും സൈനീക തലത്തില്‍ സേനാ പിന്മാറ്റത്തെ കുറിച്ച് ചര്‍ച്ച നടത്തിയത്.

ഇന്ത്യ-ചൈന അതിര്‍ത്തിയില്‍ പാംഗോങ് തടാകതീരത്തു നിന്നുള്ള ചൈനീസ് പിന്‍മാറ്റം അതിവേഗത്തില്‍ നടക്കുന്നതായാണ് റിപ്പോര്‍ട്ട്. എട്ടു മണിക്കൂറിനിടയില്‍ 200 ചൈനീസ് ടാങ്കുകള്‍ നൂറു കിലോ മീറ്ററോളം പിന്‍വാങ്ങിയതായാണ് റിപ്പോര്‍ട്ട്. ഇന്ത്യ-ചൈന ചര്‍ച്ചകള്‍ക്കു പിന്നാലെയാണ് ഇരുസേനകളും മേഖലയില്‍നിന്നുള്ള പിന്മാറ്റം എത്രയും വേഗം പൂര്‍ത്തിയാക്കാനുള്ള നടപടികള്‍ കൈക്കൊള്ളുന്നത്. കഴിഞ്ഞ 10 മാസങ്ങള്‍ക്കിടെ ചൈന നിര്‍മിച്ചവയാണ് സൈനിക സന്നാഹങ്ങളാണ് പൊളിച്ചുനീക്കുന്നത്. ക്രെയിനുകളും മറ്റും ഉപയോഗിച്ച് ചൈനീസ് സൈന്യം നിര്‍മാണങ്ങള്‍ പൊളിക്കുന്നതിന്റെ ദൃശ്യങ്ങള്‍ പുറത്തുവന്നിട്ടുണ്ട്. മേഖലയിലെ ചൈനീസ് നിര്‍മിതികളായ ഹെലിപാഡ്, ടെന്റുകള്‍, നിരീക്ഷണ കേന്ദ്രങ്ങള്‍ തുടങ്ങിയവയും പൊളിച്ചുനീക്കിയിട്ടുമുണ്ട്. മേഖലയില്‍നിന്ന് ചൈനീസ് സൈന്യത്തിന്റെ പിന്‍മാറ്റം വളരെ വേഗതയിലാണെന്ന് സര്‍ക്കാര്‍ വൃത്തങ്ങള്‍ വ്യക്തമാക്കുന്നു. ധാരണ അനുസരിച്ച് ചൈനീസ് സേന ഫിംഗര്‍ എട്ടിന്റെ കിഴക്കുഭാഗത്തേക്കാണ് മാറുന്നത്. രണ്ടാഴ്ചയ്ക്കുള്ളില്‍ പിന്മാറ്റം പൂര്‍ത്തിയാക്കി, അടുത്തഘട്ട ചര്‍ച്ചകളിലേക്ക് നീങ്ങാനാണ് തീരുമാനം. വടക്കന്‍ ലഡാക്കിലെ മേഖലകളിലുള്ള ചൈനയുടെ കയ്യേറ്റം സംബന്ധിച്ച ചര്‍ച്ചകളാവും അടുത്ത ഘട്ടത്തില്‍ നടക്കുക. ഇവിടെ നിന്ന് പിന്മാറണമെന്ന ആവശ്യം നിരന്തരമായി ഇന്ത്യ ഉന്നയിച്ചു വരികയാണ്.

ഇടയ്ക്ക് പാങ്കോങ്ങില്‍ നിലയുറപ്പിച്ച ഇരുസൈനീകരും തമ്മില്‍ സംഘര്‍ഷം വരെ ഉടലെടുത്തിരുന്നു. എന്നാല്‍, നീണ്ട ചര്‍ച്ചകളുടെ ഫലമായി ഇപ്പോള്‍ ഉണ്ടായ പ്രശ്‌ന പരിഹാരം ഏറെ ആശ്വാസകരമാണ്. ചര്‍ച്ചയില്‍ ഇന്ത്യ മുന്നോട്ട് വച്ച നിര്‍ദ്ദേശങ്ങള്‍ അംഗീകരിച്ചുകൊണ്ടുള്ള പിന്മാറ്റമാണ് ഇപ്പോള്‍ ചൈന നടത്തുന്നതെന്നാണ് പുറത്ത് വരുന്ന റിപ്പോര്‍ട്ടുകള്‍. ഒമ്പത് മാസങ്ങള്‍ക്ക് മുമ്പ് ചൈനീസ് സൈന്യം അതിക്രമിച്ച് കീഴടക്കിയ പാംഗോങ് തടാകത്തിന് സമീപത്തെ ഫിംഗര്‍ 4 ല്‍ നിന്ന് ചൈനീസ് സൈന്യം പിന്‍മാറണമെന്നത് ഇന്ത്യയുടെ പ്രധാന ആവശ്യങ്ങളില്‍ ഒന്നായിരുന്നു. എന്നാല്‍ ആദ്യം ഇതിന് തയ്യാറാകാതിരുന്ന ചൈന, ഇടയ്ക്ക് ഇന്ത്യന്‍ സൈന്യത്തെ തോക്കിതര ആയുധങ്ങള്‍ ഉപയോഗിച്ച് ആക്രമിക്കാന്‍ ശ്രമിച്ചത് സംഘര്‍ഷം രൂക്ഷമാക്കി.

ഇരുസൈനീക വിഭാഗങ്ങള്‍ക്കുമിടയില്‍ പിന്നീട് നീണ്ട ചര്‍ച്ചകള്‍ നടന്നു. ഈ ചര്‍ച്ചകളുടെ അടിസ്ഥാനത്തിലാണ് ഇപ്പോള്‍ ചൈനീസ് സൈന്യം പാംഗോങ് തടാകത്തിന് സമീപത്തെ ഫിംഗര്‍ 4 നില്‍ നിന്നും പിന്‍മാറാന്‍ തയ്യാറായത്. അതിര്‍ത്തി പിന്മാറ്റത്തിന് പരസ്പരധാരണയായതോടെയാണ് ഫിഗംര്‍ 4 ല്‍ നിന്ന് ചൈന സൈനിക സന്നാഹങ്ങള്‍ പിന്‍വലിച്ചിരിക്കുന്നത്. പാംഗോങ് തടാകത്തിന്റെ വടക്കന്‍ ഭാഗത്ത് ചൈന അതിക്രമിച്ച് കടന്നുകയറി നിര്‍മ്മിച്ച ഷെല്‍റ്ററുകളും മറ്റ് സൈനീക നിര്‍മിതികളുമാണ് ഇപ്പോള്‍ പൊളിച്ച് നീക്കി തുടങ്ങിയത്.

കഴിഞ്ഞ വര്‍ഷമാണ് ഇന്ത്യ ചൈന അതിര്‍ത്തിയിലെ ഫിംഗര്‍ 4 ലേക്ക് ചൈനീസ് സൈന്യം അതിക്രമിച്ചു കയറിയത്. ഇതേത്തുടര്‍ന്ന് മേഖലയില്‍ ഇരുസേനകളും മുഖാമുഖം ഏറ്റുമുട്ടലിന്റെ അവസ്ഥയിലേക്ക് വരെ കാര്യങ്ങള്‍ നീങ്ങുമെന്ന സ്ഥിതിയായിരുന്നു. കൈയേറിയ സ്ഥലങ്ങളില്‍ ചൈന ഹെലിപ്പാഡ്, സൈനീക ടെന്റുകള്‍, നിരീക്ഷണ പോസ്റ്റുകള്‍ തുടങ്ങിയവ പണിതിരുന്നു. ഈ നിര്‍മ്മിതികളാണ് ഇപ്പോള്‍ ചൈന പൊളിച്ചു മാറ്റുന്നത്.

മറ്റൊരു തീരുമാനമുണ്ടാകും വരെ പാംഗോങ് തടാകത്തിന്റെ വടക്ക് ഭാഗത്ത് ഫിംഗര്‍ 3 മുതല്‍ 8 വരെയുള്ള പ്രദേശത്ത് ഇരുസൈന്യങ്ങളുടെയും പട്രോളിങ് ഉണ്ടാകില്ലെന്നതാണ് പുതിയ തീരുമാനം. ഈ മേഖലയില്‍ പട്രോളിങ് അടക്കമുള്ള സൈനിക നടപടികള്‍ക്ക് ഇരുസേനകളും താല്‍ക്കാലിക മൊറട്ടോറിയം പ്രഖ്യാപിച്ചു. തന്ത്രപ്രധാന മലനിരകളായ ഫിംഗര്‍ 4 ല്‍ നിന്ന് ഫിംഗര്‍ 8 ന്റെ കിഴക്കന്‍ മേഖലയിലേക്കാണ് ഇപ്പോള്‍ ചൈനീസ് സൈന്യം പിന്മാറുന്നത്. എന്നാല്‍, ഇന്ത്യന്‍ സൈന്യം മുന്‍നിശ്ചയപ്രകാരം സ്ഥിരം താവളമായ ഫിംഗര്‍ 3 യിലെ ധന്‍ സിങ് ഥാപ്പ പോസ്റ്റില്‍ ക്യാംപ് തുടരും.

നയതന്ത്രതലത്തില്‍ പുതിയ തീരുമാനങ്ങള്‍ ഉണ്ടാകുന്നത് വരെ ഫിംഗര്‍ 3 നും 8 നും ഇടയ്ക്ക് ഇന്ത്യയുടെയും ചൈനയുടെയും സൈന്യങ്ങള്‍ പട്രോളിങ് നടത്തില്ലെന്നും തീരുമാനമായി.ഫിംഗര്‍ 4, ഫിംഗര്‍ 8 മലനിരകള്‍ക്കിടയില്‍ ബങ്കറുകള്‍ നിര്‍മ്മിച്ച ചൈന ഫിംഗര്‍ 4 ന് അപ്പുറത്തേക്കുള്ള ഇന്ത്യയുടെ പട്രോളിങ് തടഞ്ഞിരുന്നു. ഇതാണ് അതിര്‍ത്തിയില്‍ ഇരുസൈനീക വിഭാഗങ്ങളും തമ്മില്‍ സങ്കര്‍ഷത്തിലേക്ക് കാര്യങ്ങള്‍ നീക്കിയത് ചൈനീസ് പിന്‍മാറ്റം സംബന്ധിച്ച് പ്രതിരോധ മന്ത്രി രാജ്‌നാഥ് സിംഗ് വ്യാഴാഴ്ച പാര്‍ലമെന്റിനെ അഭിസംബോധന ചെയ്ത് സംസാരിക്കും.