വാലന്റൈന്‍സ് ദിനത്തില്‍ ഭാര്യയെ കഴുത്തുഞെരിച്ച് കൊലപ്പെടുത്തിയ ഭര്‍ത്താവിനെ കൈ ഞരമ്ബ് മുറിച്ച് അവശ നിലയില്‍ കണ്ടെത്തി. സംഭവത്തില്‍ യുവാവിനെ ആശുപത്രിയില്‍ പ്രവേശിപ്പിച്ചു. വ്യക്തിപരമായ കാരണങ്ങളാല്‍ ആണ് കൊലപാതകമെന്ന് വ്യക്തമാക്കുന്ന യുവാവിന്റെ ആത്മഹത്യാക്കുറിപ്പ് കണ്ടെടുത്തിട്ടുണ്ട്. ഉത്തര്‍പ്രദേശിലെ ഗാസിയാബാദിലാണ് സംഭവം.വാലന്റൈന്‍സ് ദിനത്തില്‍ പുറത്തുപോയി ഭക്ഷണം കഴിച്ച് വീട്ടില്‍ മടങ്ങിയെത്തിയതിന് ശേഷമാണ് കൊലപാതകം നടന്നതെന്ന് പൊലീസ് പറയുന്നു. വീടിന്റെ പുറത്ത് ദേവ്ജീത്ത് അവശനിലയില്‍ കിടക്കുന്നത് കണ്ട അയല്‍വാസികള്‍ പൊലീസിനെ വിവരം അറിയിക്കുകയായിരുന്നു. പൊലീസെത്തി യുവാവിനെ ആശുപത്രിയിലാക്കി. തുടര്‍ന്ന് ഭാര്യയെ അറിയിക്കാന്‍ വീട്ടില്‍ ചെന്ന് നോക്കിയപ്പോഴാണ് യുവതിയെ കൊല്ലപ്പെട്ട നിലയില്‍ കണ്ടെത്തിയതെന്ന് പൊലീസ് പറയുന്നു.

വാലന്റൈന്‍സ് ദിനത്തില്‍ പുറത്തുപോയി ഭക്ഷണം കഴിച്ച ശേഷം ബന്ധുവിന്റെ വീട്ടില്‍ പോയി. രാത്രി വൈകിയാണ് വീട്ടില്‍ തിരിച്ചെത്തിയത്. അതിനിടെ മകനെ ബന്ധുക്കളുടെ വീട്ടിലാക്കി. തുടര്‍ന്നായിരുന്നു കൊലപാതകവും ആത്മഹത്യാശ്രമവുമെന്ന് പൊലീസ് പറയുന്നു. ഭാര്യയെ കഴുത്തുഞെരിച്ച് കൊന്ന ശേഷം കൈ ഞരമ്ബ് മുറിച്ച് യുവാവ് ആത്മഹത്യയ്ക്ക് ശ്രമിക്കുകയായിരുന്നു.