കര്‍ഷക ​പ്രക്ഷോഭം തുടരുന്ന വേളയിൽ ബി.ജെ.പിക്ക്​ വമ്പൻ തിരിച്ചടി നൽകി പഞ്ചാബിലെ തദ്ദേശ തെരഞ്ഞെടുപ്പ്​ ഫലം. ഗ്രാമങ്ങളിലും നഗരങ്ങളിലുമെല്ലാം കോണ്‍ഗ്രസ്​ മുന്നേറുകയാണ്​. ആദ്യ ഫലസൂചനകള്‍ പുറത്തുവന്നപ്പോള്‍ പരമ്പരാഗത ശക്തി കേന്ദ്രങ്ങള്‍ പോലും ബി.ജെ.പിക്കൊപ്പം നിന്നില്ല . കാര്‍ഷിക പ്രശ്​നത്തെ തുടര്‍ന്ന്​ എന്‍.ഡി.എ വിട്ട ശിരോമണി അകാലിദളില്ലാതെ ബി.ജെ.പി തനിച്ചാണ്​ തെരഞ്ഞെടുപ്പിനെ നേരിട്ടത്​.

ഫെബ്രുവരി 14നായിരുന്നു തെരഞ്ഞെടുപ്പ്​ നടന്നത്​. എട്ട്​ കോര്‍പറേഷനുകളില്‍ എട്ടിടത്തും 109 കൗണ്‍സിലുകളില്‍ 63 ഇടത്തും കോണ്‍ഗ്രസാണ്​ ലീഡ്​ ചെയ്യുന്നത്​. എട്ടിടത്ത്​ ശിരോമണി അകാലിദളും രണ്ടിടത്ത്​ ആംആദ്​മിയും മുന്നിട്ട്​ നില്‍ക്കുന്നുണ്ട്​. പത്താന്‍കോട്ട്​, ഹോഷിയാര്‍പൂര്‍, ബതിന്‍ഡ, രോപര്‍, ബട്ടാല അടക്കമുള്ള മുനിസിപ്പാലിറ്റികളില്‍ കോണ്‍ഗ്രസ്​ വ്യക്തമായ ഭൂരിപക്ഷം നേടി. ഏറിയസ്ഥലത്തും ശിരോമണി അകാലിദളിനും ആംആദ്​മി പാര്‍ട്ടിക്കും പിന്നിലായാണ്​ ബി.ജെ.പി ഫിനിഷ്​ ചെയ്​തത്​. ഹോഷിയാര്‍പൂരില്‍ ബി.ജെ.പി നേതാവും മുന്‍ കേന്ദ്രമന്ത്രിയുമായ തിക്ഷണ്‍ സൂദിന്‍റെ ഭാര്യ പരാജയപ്പെട്ടു. അന്തിമഫലസൂചനകള്‍ പുറത്തുവന്നിട്ടില്ലെങ്കിലും കോണ്‍ഗ്രസ്​ ക്യാമ്ബുകളില്‍ ആഹ്ലാദ പ്രകടനം ആരംഭിച്ചിട്ടുണ്ട്​.