രാജ്യത്തെ പുതിയ സബ്സ്‌ക്രൈബര്‍മാരുടെ എണ്ണത്തില്‍ റിലയന്‍സ് ജിയോയെ മറികടന്ന് ഭാരതി എയര്‍ടെല്‍. ഡിസംബറില്‍ 55 ലക്ഷം പേരെ എയര്‍ടെല്‍ തങ്ങളുടെ ഭാഗമാക്കിയപ്പോള്‍ ജിയോയ്ക്ക് 32 ലക്ഷം പേരെ മാത്രമാണ് ചേര്‍ക്കാനായത്. കഴിഞ്ഞ 14 മാസത്തിനിടെ ഉണ്ടായ ഏറ്റവും വലിയ വര്‍ധനവാണിത്. ഇതോടെ ആക്ടീവ് സബ്സ്‌ക്രൈബര്‍മാരുടെ കാര്യത്തില്‍ രാജ്യത്ത് ഏറ്റവും കൂടുതല്‍ വിപണിവിഹിതമുളള ടെലികോം കമ്ബനിയെന്ന സ്ഥാനം എയര്‍ടെല്‍ കരസ്ഥമാക്കി.

ജിയോയെ അപേക്ഷിച്ച്‌ ഇരട്ടിയോളം വളരാന്‍ സാധിച്ചത് എയര്‍ടെലിന് നല്‍കുന്ന ആത്മവിശ്വാസം വളരെവലുതാണ്. 2020 ലെ രണ്ടാം അര്‍ദ്ധവാര്‍ഷികത്തില്‍ എയര്‍ടെല്‍ വന്‍ മുന്നേറ്റമാണ് നടത്തിയത്. 2.2 കോടി പേരെ കൂടി സബ്സ്‌ക്രൈബര്‍മാരാക്കാന്‍ കമ്ബനിക്ക് സാധിച്ചു. എന്നാല്‍ ജിയോയ്ക്കാകട്ടെ 1.1 കോടി പേരെ മാത്രമാണ് അധികമായി ചേര്‍ക്കാനായത്. ഓരോ മാസവും സബ്സ്‌ക്രൈബര്‍മാരുടെ എണ്ണം കുത്തനെ ഉയര്‍ന്നതോടെ എയര്‍ടെലിന്റെ ഓഹരി വിലയിലും വന്‍ കുതിപ്പുണ്ടായി. സെപ്തംബര്‍ മാസത്തിന് ശേഷം 40 ശതമാനമാണ് കമ്ബനിയുടെ ഓഹരി വില വര്‍ധിച്ചത്.

വൊഡഫോണ്‍ ഐഡിയയില്‍ നിന്ന് കൂടുതല്‍ ഉപഭോക്താക്കള്‍ വിട്ടുപോകുന്നതും എയര്‍ടെലിന്റെ ഇപ്പോഴത്തെ വളര്‍ച്ചയ്ക്ക് കാരണമായിട്ടുണ്ട്. മൂന്നാം സ്ഥാനത്തുള്ള വൊഡഫോണ്‍ ഇന്ത്യയുടെ പ്രകടനം ഓരോ മാസവും താഴേക്ക് പോവുകയാണ്. വൊഡഫോണ്‍ ഇന്ത്യയ്ക്ക് 2020 ജനുവരി 20 ന് 30.1 ദശലക്ഷം ഉപഭോക്താക്കളുണ്ടായിരുന്നതെങ്കില്‍ അത് ഡിസംബര്‍ ആയപ്പോഴേക്കും 26.3 ദശലക്ഷത്തിലേക്ക് ഇടിയുകയായിരുന്നു.