ബംഗാള്‍ മുഖ്യമന്ത്രി മമത ബാനര്‍ജിയുടെ അനന്തരവനും തൃണമൂല്‍ കോണ്‍ഗ്രസ് നേതാവുമായ അഭിഷേക് ബാനര്‍ജിയാണ് ബിജെപി ഉന്നമിടുന്ന പ്രധാന നേതാക്കളിലൊരാളാള്‍. സൗത്ത് 24 പര്‍ഗാനാസ് ജില്ലയിലെ ഡയമണ്ട് ഹാര്‍ബറില്‍നിന്ന് രണ്ടാം തവണ എംപിയായ ഈ മുപ്പത്തിമൂന്നുകാരനെ തൃണമൂലിന്റെ ഭാവി നേതാവായാണ് രാഷ്ട്രീയ നിരീക്ഷകരടക്കം വിലയിരുത്തുന്നത്.

കഴിഞ്ഞ കുറച്ചു വര്‍ഷങ്ങള്‍ക്കിടെ, പാര്‍ട്ടിയിലെ അഭിഷേകിന്റെ സ്വാധീനവും നേതാവെന്ന നിലയിലുള്ള മികവും വളര്‍ന്നിട്ടുണ്ട്. ബംഗാളില്‍ കേന്ദ്ര ആഭ്യന്തരമന്ത്രി അമിത് ഷാ നടത്തിയ അവസാന രണ്ടു പ്രചാരണ പര്യടനങ്ങളിലും അഭിഷേക് ബാനര്‍ജിയെ രൂക്ഷമായി വിമര്‍ശിച്ചിരുന്നു.

തൃണമൂല്‍ കോണ്‍ഗ്രസില്‍ അഭിഷേക് ബാനര്‍ജിയുടെ സ്വാധീനം കഴിഞ്ഞ കുറച്ച് വര്‍ഷങ്ങളായി ഗണ്യമായി ഉയര്‍ന്നിട്ടുണ്ട്. 2019 ല്‍ വിജയിച്ച ഡയമണ്ട് ഹാര്‍ബറില്‍നിന്ന് ലോക്‌സഭയിലേക്കു തിരഞ്ഞെടുക്കപ്പെട്ടതു മുതല്‍ തൃണമൂലിന്റെ പ്രധാന തന്ത്രജ്ഞരില്‍ ഒരാളായി അദ്ദേഹം മാറി.

തിരഞ്ഞെടുപ്പു തന്ത്രജ്ഞന്‍ പ്രശാന്ത് കിഷോറിനെ കൊണ്ടുവരുന്നതില്‍ പ്രധാന പങ്കുവഹിച്ചതും അഭിഷേകാണ്. മമത കഴിഞ്ഞാല്‍, തൃണമൂലില്‍ യാത്രകള്‍ക്കായി ഹെലികോപ്ടര്‍ ഉപയോഗിക്കുന്ന നേതാവുകൂടിയാണ് അഭിഷേക്. എന്നാല്‍ അഭിഷേക് ബാനര്‍ജിയെ ബിജെപി തുടര്‍ച്ചയായി ആക്ഷേപിക്കുന്നു.

സൗത്ത് 24 പര്‍ഗാനയില്‍ നടന്ന ഒരു റാലിയില്‍ ബാനര്‍ജി പറഞ്ഞു, 'അവര്‍ എന്നെ ആക്രമിക്കുകയാണ്. അത് നല്ലതാണ്. രാഷ്ട്രീയ യുദ്ധക്കളത്തില്‍ മമതയെ നേരിടുന്നതിനുമുന്‍പു പത്തു ഗോളുകള്‍ക്ക് ഞാന്‍ അവരെ പരാജയപ്പെടുത്തും. ചിലര്‍ ഭൈപ്പോ അനന്തരവന്‍ യെന്നും ചിലര്‍ തോലാബാസ് ഭൈപ്പോ (കൊള്ളയടിക്കുന്ന മരുമകന്‍) എന്നും പറയുന്നു. പേരുകള്‍ എടുത്ത് പറയാന്‍ നിങ്ങള്‍ക്ക് ധൈര്യമില്ല, പക്ഷേ ഞാന്‍ പേരുകള്‍ എടുത്ത് പറയുന്നു. ദിലീപ് ഘോഷ് ഒരു ഗുണ്ടയാണ്.

അമിത് ഷാ പുറംനാട്ടുകാരനാണ്. കൈലാഷ് വിജയവര്‍ഗിയ പുറംനാട്ടുകാരനാണ്. സുവേന്ദു അധികാരി കോഴ വാങ്ങുന്നയാളാണ്. നിങ്ങള്‍ക്ക് കഴിയുന്നതെല്ലാം ചെയ്യുക. നിങ്ങള്‍ക്ക് ധൈര്യമുണ്ടെങ്കില്‍ ഒരു കേസ് ഉണ്ടാക്കി എന്നെ ജയിലിലടയ്ക്കുക. അവര്‍ എന്നെ നാടുവാഴി രാഷ്ട്രീയത്തിന്റെ പേരില്‍ ആക്ഷേപിക്കുന്നു.' അഭിഷേക് പറഞ്ഞു.

അഭിഷേക് ബാനര്‍ജിയെപ്പറ്റി തനിക്കുള്ള കണക്കുകൂട്ടലുകള്‍ എന്താണെന്ന് മമത ഇതുവരെ വെളിപ്പെടുത്തിയിട്ടില്ല. അഭിഷേകിന്റെ പ്രസംഗങ്ങള്‍ ആള്‍ക്കൂട്ടത്തെ ആകര്‍ഷിക്കുന്നുണ്ട്. യുവജന സംഘടനയെ നയിക്കുന്ന അഭിഷേകിന്റെ റാലികള്‍ക്ക് ചെറുപ്പക്കാരടക്കം എത്തുന്നത് തൃണമൂല്‍ പ്രതീക്ഷയോടെ കാണുന്നു.

പ്രതിപക്ഷ പാര്‍ട്ടികളുടെ യുവ നേതാക്കള്‍ക്കെതിരെ ബിജെപി നടത്തുന്നത് കടുത്ത ആക്രമണങ്ങളാണ്. മഹാരാഷ്ട്രയില്‍ ആദിത്യ താക്കറെ, ബിഹാറില്‍ തേജസ്വി യാദവ്, ബംഗാളില്‍ അഭിഷേക് ബാനര്‍ജി എന്നിവരെ ബിജെപി കടുത്ത ഭാഷയിലാണ് നേരിട്ടിട്ടുള്ളത്. ബിജെപിയെപ്പോലെ കരുത്തുറ്റ ഒരു എതിരാളിയോട് പോരാടാന്‍ തനിക്കു കഴിയുമെന്ന് തെളിയിക്കാനുള്ള ഉത്തരവാദിത്തം അഭിഷേക് ബാനര്‍ജിക്കാണ്. അതുകൊണ്ടുതന്നെ 2021 ലെ തിരഞ്ഞെടുപ്പ് അദ്ദേഹത്തിന്റെ രാഷ്ട്രീയ ഭാവിയില്‍ നിര്‍ണായകമാകും.