ബ്രിട്ടീഷുകാര്‍ ഇന്ത്യ വിട്ടതിന് പ്രധാന കാരണമായത് നേതാജി സുഭാഷ് ചന്ദ്രബോസിന്റെ സൈനിക പ്രതിരോധമാണെന്ന് തമിഴ്നാട് ഗവര്‍ണര്‍ ആര്‍എന്‍ രവി. ബ്രിട്ടീഷുകാര്‍ ഇന്ത്യ വിടുന്നതില്‍ മഹാത്മാഗാന്ധിയുടെ നിസ്സഹകരണ പ്രസ്ഥാനം കാര്യമായ സ്വാധീനം ചെലുത്തിയിട്ടില്ല. നമ്മുടെ സ്വാതന്ത്ര്യത്തിന് നേതാജിയോട് ഇന്ത്യ ഒരുപാട് കടപ്പെട്ടിരിക്കുന്നുവെന്ന് പറയുന്നതില്‍ അതിശയോക്തിയാകില്ലെന്നും അദ്ദേഹം പറഞ്ഞു. ചെന്നൈയിലെ അണ്ണാ യൂണിവേഴ്‌സിറ്റിയില്‍ നേതാജിയുടെ 127-ാം ജന്മവാര്‍ഷികത്തില്‍ ഒരു പരിപാടിയില്‍ പങ്കെടുത്ത് സംസാരിക്കുകയായിരുന്നു ആര്‍എന്‍ രവി.

'രണ്ടാം ലോകമഹായുദ്ധം ആരംഭിച്ചതിന് ശേഷം ഇന്ത്യന്‍ നാഷണല്‍ കോണ്‍ഗ്രസിന്റെ നിസ്സഹകരണ പ്രസ്ഥാനം പരാജയപ്പെട്ടു. മഹാത്മാഗാന്ധിയുടെ ദേശീയ സ്വാതന്ത്ര്യ സമരത്തിന്റെ ചരിത്രം പരിശോധിച്ചാല്‍, 1942 ന് ശേഷം അതൊരു സംഭവമായിരുന്നില്ല. മുസ്ലിംലീഗ് പ്രത്യേക ഭൂമിക്കുവേണ്ടി പോരാടുന്നതിനാല്‍ ഞങ്ങളെല്ലാം തമ്മില്‍ വഴക്കിട്ടു. ഞങ്ങള്‍ക്കിടയില്‍ ഭിന്നിപ്പുണ്ടായി. ഒന്നും സംഭവിച്ചില്ല. 1942 ന് ശേഷം ബ്രിട്ടീഷുകാര്‍ അത് ആസ്വദിക്കുകയായിരുന്നു.', ഗവര്‍ണര്‍ പറഞ്ഞു.

'ഇന്ത്യയില്‍ ബ്രിട്ടീഷുകാര്‍ക്ക് ഒരു പ്രശ്നവുമുണ്ടായിരുന്നില്ല. അവര്‍ക്ക് വര്‍ഷങ്ങളോളം ഇവിടെ തുടരാമായിരുന്നു. പക്ഷേ നേതാജി പ്രവാസത്തിരുന്ന് തന്നെ ഒരു സര്‍ക്കാര്‍ സ്ഥാപിച്ചു. പ്രഗത്ഭനായ ഒരു കമാന്‍ഡറുടെ നേതൃത്വത്തിലുള്ള സൈന്യത്തിന്റെ പിന്തുണയോടെ ആസാദ് ഹിന്ദ് സര്‍ക്കാര്‍ ബ്രിട്ടീഷുകാരോട് നിലത്ത് യുദ്ധം ചെയ്യുകയും ബ്രിട്ടീഷുകാരെ അവരുടെ കോട്ടയുടെ നിരവധി സ്ഥലങ്ങളില്‍ പരാജയപ്പെടുത്തുകയും ചെയ്തു,'ഗവര്‍ണര്‍ കൂട്ടിച്ചേര്‍ത്തു.

ബ്രിട്ടീഷ് നാവികസേനയിലെ ഇന്ത്യക്കാര്‍ 1946-ല്‍ കലാപം നടത്തി 20 യുദ്ധക്കപ്പലുകളുടെ നിയന്ത്രണം ഏറ്റെടുത്തു. ഇത് റോയല്‍ നേവിയെ തളര്‍ത്തി. നേതാജിയില്‍ നിന്ന് പ്രചോദനം ഉള്‍ക്കൊണ്ടാണ് ഇന്ത്യന്‍ വ്യോമസേനയിലെ ഇന്ത്യക്കാര്‍ സമരത്തിനിറങ്ങിയതെന്നും അദ്ദേഹം പറഞ്ഞു. 'ഒരു ഇന്ത്യക്കാരന്‍ (നേതാജി) രാജ്യത്തിന്റെ സ്വാതന്ത്ര്യത്തിനായി ബ്രിട്ടീഷുകാര്‍ക്കെതിരെ പോരാടുന്നു എന്ന വസ്തുത, നിരവധി യൂണിഫോം സേനങ്ങളില്‍ കലാപത്തിന് കാരണമായി. തങ്ങള്‍ ഇന്ത്യയില്‍ സുരക്ഷിതരല്ലെന്ന് ബ്രിട്ടീഷുകാര്‍ മനസ്സിലാക്കി,' അദ്ദേഹം പറഞ്ഞു.

അന്നത്തെ ബ്രിട്ടീഷ് പ്രധാനമന്ത്രി ക്ലെമന്റ് ആറ്റ്‌ലിയും പശ്ചിമ ബംഗാള്‍ ആക്ടിംഗ് ഗവര്‍ണര്‍ ജസ്റ്റിസ് പി ബി ചക്രവര്‍ത്തിയും പ്രഭാതഭക്ഷണത്തിനിടെ നടത്തിയ സംഭാഷണവും ഗവര്‍ണര്‍ പരാമര്‍ശിച്ചു. ബ്രിട്ടീഷുകാര്‍ ഇന്ത്യ വിട്ടതിന് പിന്നിലെ കാരണം ഗവര്‍ണര്‍ അറ്റ്‌ലിയോട് ചോദിച്ചപ്പോള്‍, ബ്രിട്ടീഷുകാര്‍ ഇന്ത്യയില്‍ സുരക്ഷിതരല്ലെന്ന ഭയം കൊണ്ടാണെന്ന് അറ്റ്‌ലി പറഞ്ഞു. ഇന്ത്യന്‍ നാഷണല്‍ കോണ്‍ഗ്രസിന്റെ നിസ്സഹകരണം കൊണ്ടാണോ ബ്രിട്ടീഷുകാര്‍ ഇന്ത്യ വിട്ടത് എന്ന് ജസ്റ്റിസ് ചക്രവര്‍ത്തി ചോദിച്ചപ്പോള്‍, അതിന്റെ ഫലം വളരെ കുറവാണെന്ന് ആറ്റ്‌ലി പറഞ്ഞു. എന്നാല്‍ നാവിക കലാപത്തിനും വ്യോമസേനയുടെ കലാപത്തിനും ശേഷം അരക്ഷിതാവസ്ഥ തോന്നിയതിനാല്‍ അവര്‍ പോയെന്നും ഗവര്‍ണര്‍ പറഞ്ഞു. 'ഇത്രയും മഹത്തായ വ്യക്തിയെ എങ്ങനെയാണ് നമ്മുടെ ദേശീയ സ്വാതന്ത്ര്യ ചരിത്രത്തിന്റെ വശത്ത് നിര്‍ത്താന്‍ കഴിയുക' അദ്ദേഹം ചോദിച്ചു.