ഉയരുന്ന തൊഴിലില്ലായ്മ പരിഹരിക്കാന്‍ കേന്ദ്ര സര്‍ക്കാര്‍ ബജറ്റില്‍ എന്ത് നടപടിയെടുക്കുമെന്ന് ഉറ്റുനോക്കി രാജ്യം... തൊഴിലുറപ്പ് പദ്ധതി വിഹിതം കാര്യമായി കൂട്ടുന്നതുള്‍പ്പടെ പ്രധാന പ്രഖ്യാപനങ്ങള്‍ ബജറ്റില്‍ ഇത്തവണ ഉണ്ടാകുമെന്നാണ് സൂചനകള്‍.

കൊവിഡ് സൃഷ്ടിച്ച സാമ്പത്തിക പ്രതിസന്ധി തുടരുമ്പോള്‍ രാജ്യത്തെ തൊഴില്‍ മേഖല ചരിത്രത്തിലെ ഏറ്റവും കടുത്ത പ്രതിസന്ധിയിലൂടെയാണ് കടന്നുപോകുന്നത്. ആകെ ജനസംഖ്യയുടെ 65 ശതമാനവും യുവാക്കളായ ഇന്ത്യയില്‍ കുത്തനെ ഉയരുന്ന തൊഴിലില്ലായ്മ നിരക്ക് വലിയ ആശങ്കയാണ്.

ഗ്രാമീണ മേഖലയിലാണ് പ്രതിസന്ധി രൂക്ഷം. രാജ്യത്തെ 20 നും 24 നും ഇടയില്‍ പ്രായമുള്ളവരിലെ തൊഴിലില്ലായ്മ നിരക്ക് 44.49 ശതമാനമായി ഉയര്‍ന്നു. 25 നും 29നും ഇടയില്‍ പ്രായമുള്ളവരിലെ തൊഴിലില്ലായ്മ കൂടി, 14.33 ശതമാനത്തിലെത്തി. 30 നും 34 നും ഇടയില്‍ പ്രായമുള്ളവരിലെ തൊഴിലില്ലായ്മ 2.49 ശതമാനമായും ഉയര്‍ന്നതായി റിപ്പോര്‍ട്ടില്‍ പറയുന്നു.

നോട്ട് നിരോധനവും കൊവിഡും പ്രതിസന്ധിയിലാക്കിയ സൂക്ഷ്മ, ചെറുകിട, ഇടത്തരം സ്ഥാപനങ്ങളാണ് രാജ്യത്തെ പ്രധാന തൊഴില്‍ ദാതാക്കള്‍. രാജ്യത്തെ മൊത്ത ആഭ്യന്തര ഉല്‍പാദനത്തിന്റെ 29 ശതമാനം സംഭാവന ചെയ്യുന്നത് എംഎസ്എംഇകളാണ്.

തകര്‍ച്ചയില്‍ നിന്നും കരകയറുന്നതിനായുള്ള പ്രഖ്യാപനങ്ങളാണ് ഇതടക്കമുള്ള മേഖലകള്‍ ഇത്തവണ ബജറ്റില്‍ പ്രതീക്ഷിക്കുന്നത്. ഗ്രാമീണ തൊഴിലുറപ്പ് പദ്ധതി വിഹിതം 47 ശതമാനം വര്‍ദ്ധിപ്പിച്ച് 88000 കോടി വകയിരുത്തുമെന്നാണ് റിപ്പോര്‍ട്ടുകളുള്ളത്. വരുന്ന സാമ്പത്തിക വര്‍ഷത്തില്‍ ഗ്രാമീണ തൊഴിലുറപ്പ് പദ്ധതിക്കായി 1.1 ലക്ഷം കോടി രൂപ അനുവദിക്കണമെന്നും വേതനം വര്‍ദ്ധിപ്പിക്കണമെന്നുമാണ് ഗ്രാമീണ വിസകന മന്ത്രാലയത്തിന്റെ ശുപാര്‍ശയിലുള്ളത്.