താംബരം വ്യോമതാവളത്തില്‍നിന്നു ആന്‍ഡമാനിലെ പോര്‍ട് ബ്ലെയറിലേക്കു പോകും വഴി ബംഗാള്‍ ഉള്‍ക്കടലില്‍ കാണാതായ വ്യോമസേനാ വിമാനത്തില്‍ മലയാളിയും ഉള്‍പ്പെട്ടതായി സംശയം. 29 ജീവനക്കാരുമായി പുറപ്പെട്ട എഎന്‍ 32 വിമാനത്തില്‍ കോഴിക്കോട് കക്കോടി സ്വദേശി ഉണ്ടായിരുന്നതായാണ് സംശയിക്കുന്നത്. ഇയാള്‍ ആന്‍ഡമാനിലേക്ക് പോവുകയാണെന്ന് വീട്ടില്‍ വിളിച്ചു പറഞ്ഞിരുന്നു. ഇതാണ് സംശയത്തിനാധാരം.

വിമാനത്തിനായി വ്യാപക തിരച്ചിലാണ് നടത്തുന്നത്. വ്യോമ, നാവിക, തീരസംരക്ഷണ സേനകള്‍ സംയുക്തമായാണു തിരച്ചില്‍ നടത്തുന്നത്. രണ്ടു വിമാനങ്ങളും നാലു നാവികസേനാ കപ്പലുകളും ഒരു അന്തര്‍വാഹിനിയും തിരച്ചില്‍സംഘത്തിലുണ്ട്. ഇന്ത്യയുടെ അഭ്യര്‍ഥനയെ തുടര്‍ന്ന് ശ്രീലങ്ക, മലേഷ്യ, സിംഗപ്പൂര്‍ എന്നീ രാജ്യങ്ങളും തിരച്ചിലിന് ഒപ്പം ചേര്‍ന്നു. ദേശീയ ദുരന്തനിവാരണ സേനയുടെ സഹായവും ആഭ്യന്തരമന്ത്രി വാഗ്ദാനം ചെയ്തിടുണ്ട്. രാത്രിയിലും തിരച്ചില്‍ തുടരുമെന്ന് പ്രതിരോധ വക്താവ് അറിയിച്ചു.

കാണാതായ വിമാനത്തില്‍ 17 പേര്‍ വ്യോമസേനയിലെ വിവിധ തസ്തികയില്‍ ഉള്‍പ്പെടുന്ന ഉദ്യോഗസ്ഥരാണ്. രണ്ട് കരസേന സൈനികര്‍, കോസ്റ്റ്ഗാര്‍ഡ് ഉദ്യോഗസ്ഥന്‍, ഏഴ് നാവികസേന ഉദ്യോഗസ്ഥര്‍ എന്നിവരുള്‍പ്പെട്ട സംഘത്തെയാണ് കാണാതായത്. അവധികഴിഞ്ഞ് തിരികെ ജോലിയില്‍ പ്രവേശിക്കാന്‍ സൈനികര്‍ പ്രധാനമായും ഉപയോഗിക്കുന്ന റൂട്ടാണിത്.
ഇന്നു രാവിലെ 7.30നാണു താംബരം വ്യോമതാവളത്തില്‍നിന്നു വിമാനം പുറപ്പെട്ടത്. 8.12 നാണു ചെന്നൈ എയര്‍ട്രോഫിക് കണ്‍ട്രോളില്‍ വിമാനത്തില്‍ നിന്നുള്ള അവസാന സന്ദേശം ലഭിച്ചത്. പോര്‍ട്‌ബ്ലെയറില്‍ രാവിലെ 11.30 നാണു വിമാനം ഇറങ്ങേണ്ടിയിരുന്നത്. എന്നാല്‍ ഇതിനിടെയാണ് വിമാനത്തെ കാണാതായത്.

ഇന്ത്യന്‍ വ്യോമസേനയുടെ വിശ്വാസ്യതേയറിയ വിമാനമാണ് എഎന്‍ 32. ഇന്ധനം നിറച്ചാല്‍ തുടര്‍ച്ചയായി നാല് മണിക്കൂര്‍ പറക്കാനാകും. അത്യാധുനിക സുരക്ഷാ സംവിധാനങ്ങളും വിമാനത്തിലുണ്ട്. ഇരട്ട എന്‍ജിനുള്ള മിലിട്ടറി ട്രാന്‍സ്‌പോര്‍ട് വിമാനമാണ് എഎന്‍– 32. കഴിഞ്ഞ വര്‍ഷം ജൂലൈയില്‍ ഒരു ഡോണിയര്‍ വിമാനവും സമാനമായ രീതിയില്‍ ബംഗാള്‍ ഉള്‍ക്കടലില്‍ കാണാതായിരുന്നു.