നല്ല മനസ്സുള്ളവര്‍ക്ക് ദൈവം തുണ ഏതെങ്കിലും രൂപത്തില്‍. വ്യത്യസ്ത നിലപാടു കൊണ്ട് സമൂഹത്തിനു മാതൃകയായ ആദിത്യ തിവാരിയുടെ വിവാഹവും വ്യത്യസ്തമായി. അതിവിശിഷ്ടരായ 10000 അതിഥികളാണ് ജൂലൈ 16 ന് നടന്ന വിവാഹത്തിന് സാക്ഷ്യം വഹിച്ചത്. ഇന്‍ഡോറിലെ സോഫ്റ്റ്‌വെയര്‍ എഞ്ചിനീയറായ ആദിത്യ തിവാരി എന്ന യുവാവ് ഒരു ആണ്‍കുഞ്ഞിനെ ദത്തെടുക്കാന്‍ തീരുമാനിച്ചതോടെയാണ് വാര്‍ത്തകളില്‍ നിറഞ്ഞത്. അവിവാഹിതനായ ഒരു ചെറുപ്പക്കാരന്‍ ഡൗണ്‍ സിന്‍ഡ്രോം ബാധിതനായ ഒരു കുഞ്ഞിനെ ദത്തെടുക്കാന്‍ നടത്തിയ നിയമപോരാട്ടങ്ങളും എല്ലാ പ്രതിസന്ധിയെയും അതിജീവിച്ച് അദ്ദേഹം കുഞ്ഞിനെ സ്വന്തമാക്കിയതുമെല്ലാം വാര്‍ത്തകളായി.

ആദിത്യ ദത്തെടുക്കാനായി തിരഞ്ഞെടുത്ത കുഞ്ഞിന് ഡൗണ്‍സിന്‍ഡ്രോം കൂടാതെ ഹൃദയത്തില്‍ സുഷിരവുമുണ്ടായിരുന്നു. കുഞ്ഞിന്റെ ആരോഗ്യാവസ്ഥയും ഒരാള്‍ക്ക് 30 വയസായാല്‍ മാത്രമേ ദത്തെടുക്കാന്‍ അവകാശമുള്ളൂ എന്ന നിയമവും ഈ ദത്തെടുക്കലിന് തടസമായി നിന്നു. എന്നാല്‍ തോറ്റുപിന്മാറാന്‍ തയാറാവാതെ ആദിത്യ തന്റെ പോരാട്ടം തുടര്‍ന്നു. വിമന്‍ ആന്‍ഡ് ചൈല്‍ഡ് വെല്‍ഫെയര്‍ ഡിപ്പാര്‍മെന്റ് മിനിസ്റ്ററായ മേനകാഗാന്ധിയെ നേരിട്ടുകണ്ട് തന്റെ അപേക്ഷ ബോധിപ്പിച്ചു. ദത്തെടുക്കലിനുള്ള ഏറ്റവും കുറഞ്ഞ പ്രായം 25 വയസ് ആവുന്നതുവരെ കാത്തിരുന്ന അദ്ദേഹം 2016 ജനുവരിയില്‍ ചാരിറ്റി മെഷിനറിയില്‍ നിന്നും ബിന്നി എന്ന കുഞ്ഞിനെ ദത്തെടുത്തു. ഇതോടെ ഇന്ത്യയിലെ ഏറ്റവും പ്രായംകുറഞ്ഞ അവിവാഹിതനായ അച്ഛന്‍ (സിംഗിള്‍ ഫാദര്‍) ആയിമാറി ആദിത്യ.

ഏറെ നിയപ്പോരാട്ടങ്ങള്‍ക്ക് ശേഷം സ്വന്തമാക്കിയ ബിന്നിയുടെ പേര് അവിനാശ് തിവാരി എന്നാക്കി.
അവിവാഹിതനായരിക്കെ കുഞ്ഞിനെ ദത്തെടുത്തതുകൊണ്ട് ആരും ആദിത്യയെ വിവാഹം കഴിക്കാന്‍ തയാറാവില്ലയെന്നു പരിഹസിച്ചവര്‍ക്കുള്ള ചുട്ടമറുപടിയാണ് ആദിത്യയുടെ വിവാഹം. അവിനാശിനെ സ്വന്തം കുഞ്ഞിനെപ്പോലെ നോക്കാനും പരിചരിക്കാനും മനസുള്ള ഒരു പെണ്‍കുട്ടിയാണ് ആദിത്യയുടെ ജീവിത പങ്കാളിയായെത്തിയത്. ആദിത്യയുടെ വിവാഹത്തിനെത്തിയ അതിഥികള്‍ക്കുമുണ്ടായിരുന്നു ഏറെ പ്രത്യേകതകള്‍ അനാഥാലയത്തിലെ കുഞ്ഞുങ്ങളും വൃദ്ധരും സ്വന്തമായി ഒരു വീടില്ലാതെ തെരുവിലലയുന്നവരും അടുത്തുള്ള മൃഗശാലയിലെ ജീവികളും തെരുവു നായ്ക്കളും ഉള്‍പ്പെടെ 10000 ഓളം പേരുണ്ടായിരുന്നു. സാധാരണഗതിയില്‍ ഒരു വിവാഹത്തിനു ക്ഷണിക്കാന്‍ യോഗ്യതയില്ലെന്നു സമൂഹം കരുതുന്നവരെയാണ് ആദിത്യ വിവാഹത്തിന് പങ്കെടുപ്പിച്ചത്. മാത്രമല്ല വിവാഹത്തോടനുബന്ധിച്ച് 100 വൃക്ഷത്തൈകളും നട്ടുപിടിപ്പിച്ചു.