കഷ്ടപ്പാടുകള്‍ അറിയിക്കാതെ മക്കളെ വളര്‍ത്തുന്ന ആധുനിക മാതാപിതാക്കള്‍ക്ക് വലിയൊരു പാഠമായിരുന്നു സാവ്ജി ധോലാക്കിയ നല്‍കിയത്. ഗുജറാത്തിലെ കോടീശ്വരപുത്രനായ ദ്രവ്യ ധോലാക്കിയയെ ഇതരസംസ്ഥാന തൊഴിലാളിയായി കൊച്ചിയില്‍ എത്തിച്ചതും ഇത്തരത്തില്‍ ജീവിതാനുഭവങ്ങള്‍ പഠിപ്പിക്കുന്നതിന് വേണ്ടിയായിരുന്നു. മേശ തുടച്ചും കടയില്‍ ജോലി ചെയ്തും ഒരു മാസത്തോളം നമ്മുടെ കൊച്ചിയില്‍.

അന്യസംസ്ഥാന തൊഴിലാളിയായി കോടീശ്വരപുത്രന്‍ അലഞ്ഞു തിരിഞ്ഞു ജോലി ചെയ്ത കഥ കഴിഞ്ഞ ദിവസങ്ങളില്‍ വൈറലായിരുന്നു. ന്യൂയോര്‍ക്കിലെ പേസ് യൂണിവേഴ്സിറ്റിയില്‍ ബിസിനസ് മാനേജ്മെന്റില്‍ ബിരുദത്തിനു പഠിക്കുന്ന ദ്രവ്യ കഴിഞ്ഞ മാസം അവധിക്ക് എത്തിയപ്പോഴായിരുന്നു പിതാവിന്റെ നിര്‍ദേശമനുസരിച്ച് അന്യസംസ്ഥാന തൊഴിലാളിയായി കേരളത്തില്‍ ജോലിക്കു വന്നത്. കേരളത്തില്‍ നിന്നു ലഭിച്ച ജീവിതാനുഭവവുമായി അടുത്ത മാസം അഞ്ചിനു ദ്രവ്യ ന്യൂയോര്‍ക്കിലെ യൂണിവേഴ്സിറ്റിയിലേക്ക് മടങ്ങും.കൊച്ചിയിലെ സാമ്പത്തിക സ്ഥാപനമായ ഗ്രീക്കോ ലൊജിസ്റ്റിക്‌സിലെ സാമ്പത്തിക വിഭാഗം ഹെഡും വടകര സ്വദേശിയുമായ ശ്രീജിത്തിനോടാണു ദ്രവ്യ തന്നെക്കുറിച്ചുള്ള കാര്യങ്ങള്‍ വെളിപ്പെടുത്തിയത്. കൊച്ചിയിലെ താമസത്തിനിടെ തന്നെ ഏറ്റവും കൂടുതല്‍ സ്വാധീനിച്ചതും ശ്രീജിത്ത് ആണെന്നു ദ്രവ്യ പറയുന്നു.

ഒരേ സ്ഥലത്ത് ഒരാഴ്ചയില്‍ കൂടുതല്‍ ജോലി ചെയ്യാന്‍ പാടില്ല, പിതാവിന്റെ സ്വാധീനം യാതൊരു തരത്തിലും ഉപയോഗിക്കരുത്, കൈവശമുള്ള 7,000 രൂപ അടിയന്തര സാഹചര്യത്തിലല്ലാതെ ഉപയോഗിക്കരുത് എന്നീ ഉപാധികളോടെയാണു ദ്രവ്യയെ സാവ്ജി കൊച്ചിയിലേക്ക് അയച്ചത്. ഭാഷ പ്രശ്നമാണെന്ന് അറിയാമെങ്കിലും പിതാവിന്റെ വെല്ലുവിളി ഏറ്റെടുത്തു. മൂന്നു ജോഡി വസ്ത്രവും പിതാവ് നല്‍കിയ 7,000 രൂപയുമായി ദ്രവ്യ കഴിഞ്ഞ മാസം 21ന് കൊച്ചിയിലെത്തി. ആദ്യ നാലുദിവസം തൊഴിലൊന്നും ലഭിക്കാതെ അലഞ്ഞു. തുടര്‍ന്ന് ചേരാനെല്ലൂരിലെ ഒരു ബേക്കറിയില്‍ ജോലി കിട്ടി. പിന്നീട് ആര്യാസ് ഹോട്ടലില്‍ വെയിറ്ററായും ഒരു കോള്‍സെന്ററിലും ചെരുപ്പുകടയിലും മക്ഡൊണാള്‍ഡ്സ് ഔട്ട്ലെറ്റിലും ജോലി ചെയ്തു. ഒരു മാസത്തിനിടെ അഞ്ചു ദിവസത്തോളം തൊഴിലൊന്നും ലഭിക്കാതെയും കിടക്കാനിടമില്ലാതെയും അലഞ്ഞതായി ദ്രവ്യ പറയുന്നു.

ശതകോടീശ്വരനായ സാവ്ജി ധൊലാക്കിയ ലോകമെങ്ങും അറിയപ്പെടുന്ന വ്യവസായിയാണ്. പ്രതിവര്‍ഷം 1,000 കോടി രൂപ വിറ്റുവരവുള്ള തന്റെ കമ്പനികളിലെ 1,200 ജീവനക്കാര്‍ക്ക് 2013ല്‍ സൗജന്യമായി ഫ്ളാറ്റുകളും കാറുകളും സ്വര്‍ണാഭരണങ്ങളും സമ്മാനിച്ചതിലൂടെയാണു സാവ്ജി പ്രശസ്തനായത്. കമ്പനിയുടെ വളര്‍ച്ചയില്‍ ജീവനക്കാര്‍ വഹിക്കുന്ന പങ്ക് മാനിച്ചായിരുന്നു ഈ പ്രത്യുപകാരം.