മാനഭംഗത്തിന് ശേഷം ബലമായി ആസിഡ് കുടിപ്പിച്ച 14കാരി വേദനയുടെ ലോകത്തു നിന്നും വിടപറഞ്ഞു
ഡല്ഹി സ്വദേശിയായ 14കാരിയെ മാനഭംഗത്തിനിരയാക്കിയ ശേഷം ബലമായി ആസിഡ് കുടിപ്പിച്ച സംഭവത്തില് പെണ്കുട്ടി മരണമടഞ്ഞു. ഒരു മാസത്തിലേറെയായി ചികിത്സയിലായിരുന്ന പെണ്കുട്ടി ജീവനു വേണ്ടി പോരാടുകയായിരുന്നു. ഉപകരണങ്ങളുടെ സഹായത്തോടെ ജീവന് നിലനിര്ത്തിയ പെണ്കുട്ടി ഇന്നലെ വേദനയുടെ ലോകത്തുനിന്ന് വിടപറഞ്ഞു.
ആസിഡ് ഉള്ളില് ചെന്നതിനെ തുടര്ന്ന് ആന്തരികാവയവങ്ങള് നശിച്ച നിലയിലാണ് പെണ്കുട്ടിയെ ആശുപത്രിയില് പ്രവേശിപ്പച്ചത്. കഴിഞ്ഞ ഡിസംബറില് പെണ്കുട്ടിയെ തട്ടിക്കൊണ്ടുപോയി പീഡിപ്പിച്ചിരുന്നു. സംഭവത്തില് ശിവശങ്കര് എന്നയാള്ക്കെരതിരെ വീട്ടുകാര് പരാതിയും നല്കിയിരുന്നു. ഈ കേസില് ഇക്കഴിഞ്ഞ മേയില് വാദം കേള്ക്കാനിരിക്കേയാണ് കുട്ടിയെ വീണ്ടും കാണാതായത്. ആദ്യകേസില് പ്രതിയായ ശിവശങ്കറിന്റെ ബന്ധുവായ സ്ത്രീയാണ് തന്നെ തട്ടിക്കൊണ്ടുപോയതെന്നും വീട്ടില് തടവിലാക്കിയ തന്നെ ശിവശങ്കര് പല തവണ മാനഭംഗപ്പെടുത്തിയെന്നും പെണ്കുട്ടി മൊഴി നല്കിയിരുന്നു. കൈകാലുകള് കെട്ടിയിട്ട് തനിക്ക് ഭക്ഷണം നിഷേധിച്ചു. ആസിഡ് കലര്ത്തിയ ജ്യൂസ് കുടിപ്പിച്ചു. മര്ദ്ദിച്ച ശേഷം ഉപേക്ഷിക്കുകയായിരുന്നുവെന്നും കുട്ടി പോലീസിനു നല്കിയ മൊഴിയില് പറയുന്നു.
വൈദ്യ പരിശോധന ഫലം അറിഞ്ഞ ശേഷമേ സത്യം വ്യക്തമാകൂവെന്ന നിലയിപാടിലാണ് പോലീസ്. പെണ്കുട്ടിയുടെ ആദ്യ പരാതിയില് ശിവശങ്കറിനെ ഡിസംബറില് അറസ്റ്റുചെയ്തുവെങ്കിലും മാനഭംഗം നടന്നുവെന്ന ആരോപണം പെണ്കുട്ടി പിന്വലിച്ചതിനെ തുടര്ന്ന് ജാമ്യത്തില് വിടുകയായിരുന്നുവെന്നും പോലീസ് അറിയിച്ചു.
അതിനിടെ, പോലീസിനെതിരെ വിമര്ശനവുമായി ഡല്ഹി വനിതാ കമ്മീഷന് ചെയര്പേഴ്സണ് സ്വാതി മലിവാളും രംഗത്തെത്തി. എത്ര നിര്ഭയമാരെ ഡല്ഹിക്ക് വേണമെന്ന് മാലിവാള് ഡല്ഹി കമ്മീഷണറെ വിമര്ശിച്ച് ട്വീറ്റ് ചെയ്തു. പീഡനത്തിനിരയായ പെണ്കുട്ടി വെന്റിലേറ്ററില് കഴിയുമ്പോള് പ്രതി സ്വതന്ത്രനായി നടക്കുകയാണ്. അടുത്ത ഒരു നിര്ഭയ കൂടി കൊല്ലപ്പെടുന്നതുവരെ പോലീസ് കാത്തിരിക്കുകയാണെന്നും മലിവാള് വിമര്ശിച്ചു.
https://www.facebook.com/Malayalivartha
