ജീവിതകാലം മുഴുവന്‍ വാക്കിലും പ്രവൃത്തിയിലും ജന മനസ്സുകളെ പ്രചോദിപ്പിച്ചുകൊണ്ടിരുന്ന ഡോ.എ.പി. ജെ അബ്ദുല്‍കലാമിന്റെ ഓര്‍മകള്‍ക്ക് ഇന്ന് ഒരുവയസ്സ് തികയുന്നു. പ്രതിഭാധനനായ ആണവശാസ്ത്രജ്ഞന്‍, മനുഷ്യസ്‌നേഹിയായ രാഷ്ട്രപതി എന്നതിനപ്പുറം സമൂഹത്തെ മുന്നോട്ടുനയിക്കുന്ന വഴിവിളക്കായിരുന്നു ഡോ. കലാം. 
സ്വപ്‌നം കാണുക, ഊര്‍ജ്ജത്തോടെ പ്രവര്‍ത്തിക്കുക, കഠിനാധ്വാനത്തിലൂടെ മാത്രമേ വിജയം നേടാനാവു തു
ടങ്ങിയ ചിന്തകളില്‍ കൂടിയാണ് അദ്ദേഹം ജീവിതലക്ഷ്യം നേടിയത്. അച്ഛനും അമ്മയും പിന്നെ പ്രൈമറി സ്‌കൂള്‍ ടീച്ചറുമാണ് നാടിനെ വാര്‍ത്തെടുക്കുന്നതെന്ന് വിശ്വസിച്ച കലാം സ്വപ്നംകാണാന്‍ പ്രേരിപ്പിച്ചുകൊണ്ടേയിരുന്നു. മുഖ്യധാരയില്‍ നിന്ന് കടലോളം അകലത്താണ് ജനിച്ചതെങ്കിലും സ്വപ്നം കാണാനുള്ള കഴിവ് കലാമിന്റെ പ്രതിഭയെ കടലുകള്‍ക്കപ്പുറമെത്തിച്ചത്. വാസ്തവത്തില്‍ സ്വന്തം അനുഭവമാണ് കലാം കലവറയില്ലാതെ പറഞ്ഞുകൊണ്ടിരുന്നത്. 
രാമേശ്വരമെന്ന കൊച്ചു ദ്വീപില്‍ 1931 ഒക്ടോബര്‍ 15 ന് പിറന്ന അവുള്‍ പക്കീര്‍ ജയിനുലാബ്ദീന്‍ കലാമിന് കുട്ടിക്കാലത്തെ വാനോളമായിരുന്ന സ്വപ്നങ്ങള്‍. ഫിസിക്‌സും എയ്‌റോസ്‌പേസ് എഞ്ചിനീയറിങ്ങും തലയ്ക്കുപിടിച്ച കലാം നാലുപതിറ്റാണ്ടിലേറെ ഇന്ത്യന്‍ ബഹിരാകാശ ഗവേണഷ രംഗത്തെ അടിമുടി പരിഷ്‌കരിച്ച ശാസ്ത്രജ്ഞനായിരുന്നു. പിന്നീട് അദ്ദഹം പ്രതിരോധ ഗവേഷണത്തിലേക്ക് ചുവടുമാറ്റിയപ്പോഴാണ് രാജ്യം സ്വന്തമായി മിസൈലുകളുണ്ടാക്കിയത്. 

1998 ലെ പൊഖ്‌റാന്‍ രണ്ട് ആണവപരീക്ഷണത്തിന്റെ സൂത്രധാരനായ കലാം പിന്നീട് 2002 ല്‍ ഭരണ പ്രതിപക്ഷ കക്ഷികളുടെ സര്‍വസമ്മതത്തോടെ സര്‍വസൈന്യാധിപന്‍ കൂടിയായ രാഷ്ട്രപതിയായി. പക്ഷേ കലാമിന് അത് ജനസേവനത്തിനുള്ള മറ്റൊരുമാര്‍ഗം മാത്രമായിരുന്നു. നിരന്തരം സംവദിച്ചുകൊണ്ട് വിശേഷിച്ച് യുവതലമുറയ്ക്ക് സ്വപ്നങ്ങള്‍ പകര്‍ന്നുകൊണ്ട് കഴിഞ്ഞ ജൂലൈ 27 വരെ നമ്മോടൊപ്പം ഉണ്ടായിരുന്നു. ഷില്ലോംഗിലെ ഇന്ത്യന്‍ ഇന്‍സ്റ്റിറ്റിയൂട്ട് ഓഫ് മാനേജ്‌മെന്റില്‍ വച്ച്, 'വാസയോഗ്യമായ ഗ്രഹങ്ങള്‍' എന്ന വിഷയത്തിന്റെ പേരില്‍ കുട്ടികള്‍ക്ക് ക്ലാസെടുത്തുകൊണ്ടിരിയ്ക്കൂമ്പോള്‍ പെട്ടെന്നുണ്ടായ ഹൃദയാഘാതത്തെ ത്തുടര്‍ന്ന് അദ്ദേഹം കുഴഞ്ഞുവീഴുകയായിരുന്നു.

സംഭവസ്ഥലത്തുവച്ചുതന്നെ അദ്ദേഹം ഈ ലോകത്തോട് വിടപറഞ്ഞു. അപ്പോള്‍ അദ്ദേഹത്തിന് 83 വയസ്സായിരുന്നു. രാഷ്ട്രത്തിന്റെ എല്ലാ ആദരവും ഏറ്റുവാങ്ങി ജനിച്ച മണ്ണില്‍ കലാം മടങ്ങി. പക്ഷേ ജീവിക്കുന്നു ലക്ഷങ്ങളുടെ മനസ്സില്‍ അഗ്‌നിച്ചിറകുള്ള പ്രജോദകനായി